Retour page précédente - Accueil - Menu

 

 

PSAUMES 23-52

(Traductions wallonnes)

 

Ce texte précieux et rare est l'oeuvre de "On P'tit Monne" ("Un Petit Moine"). Ce "monne" en question, un enfant spirituel du père Hubert, est un moine trappiste de pure souche wallonne. Comme exercice spirituel, le père Hubert lui avait demandé de s'atteler à cette longue et la délicate tâche de traduire tous les psaumes en wallon à partir de quatre traductions françaises différentes. Le "P'tit Monne", sur sa lancée, a aussi traduit l'Évangile de Marc (cf. infra) et les trois lettres de Jean.

Je présente ici une version bénévolement dactylographiée et corrigée selon les dernières conventions orthographiques par monsieur Jean Hamblenne à partir des photos prises aux archives de l'abbaye de Rochefort. Merci M. Hamblenne pour ce travail long et exigeant.

 

 

22-23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

 

23 (Vulgate 22) -Deux versions-

Yahvé, li bon bèrdjî, èst plin d’akeûy !

1. Di Dåvid.
Yahvé èst m’bèrdjî,
Dji n’måke di rin.

2. D’vins dès cråsses prêrèyes
i m’fêt r’pwèzer,
i m’mine so dès påhûlès-èwes.

3. I fêt riv’ni a lèy mi åme,
i m’mine so lès pazês dèl djustice,
a cåse di l’amoûr di s’nom.

4. Alans minme èl valêye d’ombe-mwète,
dji n’a nole sogne d’on måleûr
ca il-è-st-avou mi.
Si baston èt s’palète di bèrdjî
Mi rapåf’têyeront.

5. Divant mi, i drèsse 'ne tåve
disconte lès-cis qui m’sipatèt ;
Il ambôme mi tièsse avou dès ôlemints.
Mi cålice dèbwèrdêye.

6. Bonheur èt gråce sont-st-avou mi
po tos lès djoûs di m’vèye.
Dji d’meûre ès l’mohone d’a Yahvé,
Å long dès djoûs.

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

 

Psaume 23 (Vulgate 22)

Li bon bèrdjî.

1. On tchant d’a Dåvid.
Mi, dji n’såreûs måké d’rin
Ca c’èst l’Signeûr qu’èst m’bèrdjî!

2. I m’fêt r’pwèzer so on bé fris curèdje,
adon, i m’monne so in’êwe tote påhûle.

3. Po l’amoûr di s’nom:
i ranimèye mi-åme,
i m’èmonne so lès vôyes dèl djustice.

4. Dji passereûs minme al havèye
qwand dj’n’åreûs nole sogne
pwice qu’il èst tofér ad’lé mi!
Dji m’ra tot rin qu’dè vèyî
S’baston d’bèrdjî ou l’ci di rwè!

5. Por mi v’s avez drèssî l’tåve
divant tos cès-la qui m’tinèt a gogne ;
vos m’avez-st-ossi froté avou dès ôlemints
èt dispôy dj’a m’tiesse qu’ode si bon !
C’èst co vos qui m’rimplihez m’coupe
Å pont qu’ci-chal ènnè d’bwèrdèye !

6. Dji so-st-èwalpé di v’gråce èt d’bonheûr
po tos lès djoûs di m’vèye.
Al longue dès djoûs
Dji d’meûre èl mohone d’å Signeûr !

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 24 (Vulgate 23) -Deux versions-

Intrêye d’a Jahvé ès s’mohone.

1 Po Jahvé èst l’tére
èt tote si ètîr’sté,
li monde
èt lès cis qu’î d’monèt !

2. Ca c’èst lu qu’l’a mètou so lès mérs,
qu’l’a-st-afwèrci so lès èwes.

3. Quî va griper so l’hôteûr d’a Jahvé,
quî porè aspiter a l’andrwèt di s’sint’té?

4. L’ènocint åx prôpès mins
qu’a l’consyince tote peûre,
lu, qui n’fwèrcih nin si åme ål minte
èt qui n’fêt nin dès rûses po djurer.

5. I pwète li bènèdicsion d’a Jahvé,
li djustice dè Diu qu’èl såve.

6. Vochal li siéke dès cis qui v’qwèrèt,
qui djêrèt po veûy vosse vizèdje,
ô Diu d’Djåcob !

7. Elèvez vos d’zeûrs, ô pwètes,
rihôssîz-v’ pwètes po tofer,
qui vinse li rwè plin d’glwère !

8. Quî èst-ce ci rwè plin d’glwère ?
Jahvé l’fwért, li corèdjeûs,
Jahvé l’corèdjeûs al bataye.

9. Elèvez vos d’zeûrs, ô pwètes,
rihôssîz-v’ pwètes po tofer,
qui vinse li rwè plin d’glwère !

10. Quî èst-ce ci rwè plin d’glwère ?
Jahvé dès årmêyes,
C’èst Lu li Rwè plin d’glwère.

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 24 (Vulgate 23)

Intrêye di l’ome èl mohone dè bon Diu.

1. On tchant d’a Dåvid.
Å Signeûr apartint l’totalité dèl tére,
Å Signeûr apartint l’monde ètîr
Avou tos lès cis qu’î d’monèt !

2. Ca c’èst lu
qu’a mètou l’tére å-d’zeûr dès mérs,
èt c’èst co lu
quèl rafwèrcih disconte lès èwes.

3. Quî porè griper so l’hôteûr dè bon Diu?
Quî porè s’mostrer la-dzeûr
wice qui s’sint’té d’meûre ?

4. C’èst l’ènocint åx blankès mins
èt qu’a ossi l’coûr tot clér,
c’èst l’ci qu’n’a nin ine-åme
qui hante avou l’mint’rèyes,
èt c’èst co l’ci
qui n’djure måy po tromper lès djins !

5. Ci-la pwète li bènèdicsion dè Bon Diu,
i pwète ossi l’djustice
dè Signeûr qu’a m’nou l’såver.

6. Vochal li tins dè cis qui v’qwèrèt,
dès cis qu’sayèt di v’vèyî d’face,
dès cis qui s’rafiyèt d’vèyî vosse vizèdje
a vos qu’èstez l’Diu d’a Djåcob.

7. Qui totes lès pwètes rimontèsse leû litê !
Sèyîz rihossèyes ossi, vos lès pwètes d’étèrnité,
Qu’insi li rwè d’glwère sèpe fé si-intrêye !

8. Mins quî èst-ce, ci rwè d’glwère ?
Ci rwè la, c’èst l’Signeûr,
Pwissant èt plin d’corèdje !
Ci rwè la, c’èst l’Signeûr,,
Il èst corèdjeûs al bataye !

9. Qui totes lès pwètes rimontèsse leû litê !
Sèyîz rihossèyes ossi, vos lès pwètes d’étèrnité,
Qu’insi li rwè d’glwère sèpe fé si-intrêye !

10. Mins quî èst-ce, ci rwè d’glwère ?
Li Signeûr des årmêyes...
c’èst Lu qu’èst li rwè d’glwère !

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 25 (Vulgate 24) -Deux versions-

Priyîre qwand on-z-èst strindou !

1. D’a Dåvid.
Ad’lé vos Jahvé, dj’èlive mi åme,
Ad’lé vos qu’èstez m’Diu!

2. Es vos dji m’abann’nèye,
èt djèl fêt sins nole honte,
mins qu’mès innemis
ni s’mokèsse nin d’mi !

3. Lès cis qu’ratindèt tot d’vos,
nèl f’ront vor’mint nin al vûde;
mins tot quî trahih po dès rins
ènnè rodjirèt d’vant turtos !

4. Dji voreûs tant k’nohe li vôye a sûre,
Jahvé, ac’sègnîz-m’ vos pazès !

5. Minez-m’ ès vosse vèrité,
ca v’èstez l’seûl Diu po nos såver.
A tos moumints,
C’èst vos qui dj’rawåde !

6. Sov’nez-v' di vosse mizèricôr,
ni roûvîz nin vos faveûrs, Jahvé,
ca èles sont po todi !

7. Roûvîz lès bièstrèyes di m’djonne tins,
totes mes fåtes èt mès rèvoles ;
Par vos-minme, sorlon vosse gråce,
ès vosse bonté sov’nez-v’ di mi !

8. Jahvé èst bon èt dreût,
c’èst poqwè i mosteûre li vôye åx pècheûrs.

9. I monne lès acåblés èl djustice,
il ac’sègne si vôye åx pôves.

10. Tos lès pazès d’a Jahvé sont gråce èt vèrité
po lès wårdeûs d’l’aliyance èt d’sès tèmwègnèdjes.

11. Par vosse nom Jahvé, r’mètez-m’ mi fåte,
ca èlle èst vrêmint foû mèzeûre !

12. Dês qu’ine saquî fruzih po Jahvé,
al vole, i lî mosteûre li vôye a sûre.

13. E påye, si åme trivièrs’rè l’nut,
si lignèdje riçûrè l’tére po-z-èritèdje.

14. Li mistére d’a Jahvé èst po lès cis quèl kinohèt,
ca ils ont l’aliyance qui lès ac’sègne !

15. Sins r’låke, mès oûys riloukèt vè Jahvé,
i n’a qu’Lu po d’gadjî mès pîds dè cèp,
qui l’måva mète so m’voye.

16. Jahvé, toûrnez-v’ di m’costé,
prindez-m’ ès vosse gråce,
ca dji so pôve èt tot seû!

17. Dj’a l’coûr strindou èt d’vins lès transes
sètchîz-m’ foû d’mès toûrmints!

18. Vèyez mès ponnes èt m’mizére,
pardonez tos mès pètchîs !

19. Vèyez mès innemis,
ènn’a la tot åtou,
èt is m’hayèt d’totes leûs fwèces,

20. mètez m’vèye a houte,
tot m’sètchant foû d’leûs mins,
ca dji n’voreus nin qu’on m’prince mi oneûr,
pwice qui dji m’fèye a vos !

21. L’ènocince èl dreûteûre mi wådront
pwice qui dji v’s èspère !

22. Jahvé, Israël èst d’vins lès transes,
sètchîz-l’ don foû d’la !

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 25 (Vulgate 24)

Priyîre po qwand on-z-èst strindou !

1. D’a Dåvid.
Signeûr,
C’è-st-ad’lé vos qu’dj’èlîve mi åme
Ad’lé vos qu’èstez m’Diu.

2. Es vos dji m’abann’nèye,
èt djèl fê sin nole honte
dji sé qu’mès innemis
ni l’èpwèrt’ront nin sor mi.

3. Ci qu’ratind tot d’vos,
ni ratindrè nin al vûde ;
mins tot qui trahih po dès rins
ènnè rodjirè d’vant turtos !

4. Dji voreûs tant k’nohe li vôye a sûre,
Signeûr, ac’sègnîz-m’ vos pazês !

5. Minez-m’ ès vosse vrêye,
mostrez-m’ kimint fé,
i-n-a qu’vos qui pout såver ;
èt c’èst vos qui dj’ratin tofér !

6. Signeûr,
sov’nez-v’ di vosse mizèricôr,
ni roûviz nin vos faveûrs,
èles sont la po tofér !

7. Roûvîz lès bièst’rèyes di m’djonne tins,
totes mès fåtes è mès rèvoles ;
Sorlon vosse gråce, par vos-minme,
ès vosse bonté sov’nez-v’ di mi !

8. Nosse Diu èst bon èt dreût,
ossi mosteûre-t-i l’vôye åx pècheûrs.

9. I monne lès acåblés èl djustice,
il ac’sègne si vôye åx pôves.

10. Tos lès pazês d’å Signeûr sont gråce èt vèrité,
po lès sintinèles di l’aliyance, di sès tèmwègnèdjes.

11. Signeûr, par vosse nom rimètez-m’ mi fåte,
ca èle èst vormint foû mèzeûre !

12. Dês qu’nosse Diu veût 'ne saquî fruzî pour lu,
al vole i lî mosteûre li vôye a sûre.

13. Tote påhûle si-åme pass’rè l’nut’,
èt s’lignèdje riçurè l’tére po-z-èritèdje.

14. Li mistére dè Signeûr èst po sès fruzihants,
l’aliyance èst la po lès s’sègnî !

15. Mès oûys loukèt todi après l’Signeûr
ca c’èst lu qu’disgadje mès pîds
qu’èstît èclawès ès cep.

16. Loukîz-m’ nosse Diu,
fez-m’ gråce,
ca dji so pôve èt tot seû!

17. Lès transes di m’coûr si sont tapèyes å lådje
sètchîz-m’ foû d’mès toûrmints!

18. R’loukîz bin totes mès mizéres èt mès ponnes,
pardonez-m’ tos mès pètchîs !

19. Vèyez mès innemis chal åtou,
kimint ènn’a bêcôp !
Mins vèyez ossi
Come is m’hayèt d’tote leû fwèce!

20. Wårdez mi-åme,
sètchîz-m’ foû d’leûs mins,
vos n’volez vor’mint nin q’on m’prinse mi-oneûr
pwice qui dji m'fèye a vos!

21. Pwice qui dji v's èspère:
l'inocinse èt l'dreûteûr mi wård'ront!

22. Signeûr,
Israël èst d'vins lès transes,
ratch'tez-l', sètchîz-l' don foû d'la!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 26 (Vulgate 25) -Deux versions-

Suplicåcion plinte di confiyance.

1. Di Dåvid.
Djudjez-m' Jahvé ca dj'rote d'adram!
Dji m'abann'nève ès vos, Jahvé,
èt dji n'brontch'rè vormint nin!

2. Awètez-m' Jahvé, èsprovez-m'!
Avou dè feû purifiyez mès rins èt m'coûr!

3. Dj'a tofér voste amoûr d'vant lès oûys
èt dj'rote tot hoûtant vosse vrêye.

4. Dji n'a nin stu m'assîr avou lès fås tchins,
dji n'a nin moussî amon lès toûrsiveûs.

5. Dji n'sé oder l'assimblêye dès calins,
dji n'dimeûre nin avou lès rèsprovés.

6. Dji nète mès mins ès l'ènocince,
èt dj'pou fé l'toûr d'voste åté, Jahvé:

7. po fé dès-èclameûres di riknohance
èt fé sèpi totes vos mèrvèyes.

8. Jahvé, dj'inme li sédjoû ès vosse mohone,
l'andrwèt, wice dimeûre vosse glwère!

9. N'èssèvlihez nin m'åme avou lès moudreûs,
mi vèye avå lès cis qu'inmèt l'song'.

10. Lès fôrfêts èlzî plakèt ås deûts
èt leû dreûte èst plinte di poûriteûre!

11. Mins mi, dji m'a todi miné d'adreût,
ratchtez-m' Jahvé, fez-m' gråce!

12. Mès pîs rotèt so l'dreûte vôye,
ås assimblêyes dji bènih Jahvé.

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 26 (Vulgate 25)

Priyîre dè ci qu'è-st-inocint!

1. D'a Dåvid.
Si vos l'volez, djudjez-m' Signeûr,
portant dj'rote so l'dreûte vôye!
Dji m'abann'nêye å Signeûr,
po èsse sûr di n'fé nou fås pas!

2. Awêtez-m' Signeûr,
mètez-m' frankemint a l'èsproûve,
å feû mès rins èt m'cour!

3. Ca vosse gråce a candjî mi r'gård,
dji rote ès vosse vèrité!

4. Dji n'håbite nin tos ces fås tchins,
dj'ènnè va nin ès li k'pagnèye dès toûrciveûs.

5. Dji hé ossi l'assimblêye dès calins,
èt dji n'm'achî nin ad'lé lès rèprovés.

6. Mins Signeûr:
dji nète mès mins ès l'inocinse,
dji toûne åtou d'voste-åté:

7. po v'brêre èt v'tchanter m'riknohance,
po fé sèpi a turtos vos mèrvèyes.

8. Signeûr:
dj' inme di sédjoûrner ès vosse mohone,
la wice qui vosse glwère dimeûre.

9. Ni rafûlez nin mi-åme avou lès pècheûrs,
ni fez nin disparèt' mi vèye avå lès omes di song':

10. Ca leû fôrfêt èlzî plake åx mins,
leû dreûte èst plinte di poûriteûrs!

11. Es mi, dj'rote ès mi-inocince.
Rachtez-m', prindez-m' ès vosse pîtié!

12. Mès pîds si t'nèt so l'dreûte vôye,
dji bènih li bon Diu
d'vins totes lès assimblèyes!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 27 (Vulgate 26) Deux versions.

Jahvé èst loumîre po Sion èt salut po lès sonk.

1. Di Dåvid.
Jahvé èst m'loumîre èt m'salut,
di quî åreûs-dj' sogne?
Jahvé èst l'fôrterèsse di m'vèye,
quî va-dju ridoter?

2. Quand lès måvas abrokèt sor mi
po lof'ter m'tchår,
zèls, qui m'acåblît èt m'akêmît todi,
vola qui trèbouhèt èt si stårèt.

3. Qui l'årmèye vinse mi mète èn-ètat d'sîdje,
mi coûr n'a nole sogne;
qui l'guére èclatèye disconte di mi,
adon minme dj'årè fwè!

4. Dji n'dimande qu'ine gråce,
èt djèl qwîre ès Jahvé:
poleur dimorer èl mohone d'a Jahvé
tot å long di m'vèye,
po èsse ravigoté ès s'doûce prèzince
èt aveûr l'intrêye di s'palå.

5. Ca i m'mète a houte d'zos s'bardakin
å djoû qu'li måleûr aspite,
i m'èwalpèye dèl teûle si s'tinte
èt so s'rotche i m'èlîve.

6. Et asteûre i m'fêt s'lèver l'tiesse
d'vant mès innemis qu'sont la tot åtoû;
ès s'tinte dji sacrifiyèye d'on coûr plin d'djôye
dji tchante èt dj'aclamèye Jahvé.

7. Jahvé!
hoûtez m'vwès,
prindez-m' ès vosse pîtché,
rèspondez-m'!

8. Por vos, mi coûr a dit: "Qwèrez s'vizèdje".
Dji qwîrs après vosse vizèdje, Jahvé.

9. Ni m'catchîz nin vosse vizèdje,
tot v'måvlant ni m'ritchoûkîz nin.
Vos èstez m'sécoûrs,
ni m'lèyîz nin la so l'costé,
ni m'abann'nez nin,
Jahvé di m'salut.

10. Qui m'pére èt m'mame m'abann'nèt,
Jahvé m'prindrèt ad'lé lu.

11. Fez k'noh vosse vôye, Jahvé,
minez-m so l'dreût pazê
a cåse dès cis qui m'èspiyonèt tofér!

12. Ni m'tapez nin å d'zîr di m'ravaler
dès cis qui m'acåblèt!
Ca la d'vant mi vinèt s'drèssî dès fås tèmons.
On sofèle li måle fwèce disconte di mi.

13. O si dj'naveûs l'fwè d'poleûr contimpler
l'bonté d'a Jahvé so l'tère dès vikants…

14. Åyez fwè ès Jahvé, sèyîz fwért!
Qui vosse coûr si rafèrmih,
åyez fwè ès Jahvé.

 

1à22 - 53à85 - 85à110 - 110à131 - 132à150

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

 

Psaume 27 (Vulgate 26)

Ad'lé l'bon Diu dji n'a pus sogne!

1. D'a Dåvid.
Nosse Diu èst m'loumîre,
il èst-ossi m'dilîvrance!
Di quî åreûs-dje bin sogne?
Nosse Diu èst l'fôrterèsse di m'vèye!
Divant quî va-dje tronner?

2. Qwand lès calins s'aminèt ad'lé mi
po v'ni m'boufer m'tchår,
vola qu'zèls qui m'acåblît,
vola qu'zèls qui m'akêmît tofér,
vo-l'zès-la don cès calins
qui halcotèt èt qu'toûmèt!

3. Quî lès årmèyes campèsse åtou d'mi
èt m'coûr n'årè nole sogne!
Qu'ine guére s'èlîve conte mi
adon dj'årè todi m'fwè!

4. Dji d'mande ine gråce,
èt djèl cwîre ès m'Signeûr:
poleûr dimani èl mohone dè bon Diu
chaskeun' dès djoûs di m'vèye,
po-z-èsse ravigoté ès s'doûce prèzince,
po-z-aveûr ossi l'intrêye di s'palå.

5. Ca po lès djoûs d'måleûr
i m'mète a covièrt d'zos s'bardakin,
i m'catche å s'crèt di s'tinte,
i m'èlîve so s'rotche.

6. Asteûre i m'a fêt r'lèver l'tièsse
d'vant mès innemis chal tot åtou.
Å-d'vins di s'tinte:
dji sacrifiyèye d'on coûr plin d'djôye,
dji tchante èt dj'aclamèye nosse Diu.

7. Signeûr, hoûtez m'vwès,
dji brê-st-après vos!
Prindez-m' ès vosse pîtiê,
rèspondez-m' !

8. Vos m'soflez ès l'orèye:
"Qwîre mi vizèdje"
C'èst sins r'låke Signeûr,
qui dj'qwîre vosse vizèdje,

9. ni mèl catchî pôr nin,
ès vosse colére ni m'ritchoûkîz nin!
C'èst vos qu'èst m'sécoûrs,
ni m'lèyîz nin å réz!
Ni m'abann'nez nin,
ca c'èst vos l'Diu qui rind lîbe!

10. Qui m'pére èt m'mame m'abann'nèsse
èt c'èst l'Signeûr qui m'prind'rè ad'lé lu.

11. Signeûr,
fez-m' sèpi vosse vôye!
A cåse dès èspiyons
minez-m' vè l'pazê dèl dreûteûr!

12. Ni m'lîvrez nin åx pwissances di mès innemis
ca dès fås tèmons s'drèsset conte di mi,
èt foû d'zèls
i vint dès hinêyes di rûdeûr.

13. Ureûs so-dju d'aveûr li fwè
qu'on djoû dj'porè contimpler
totes lès bèlès cålités d'nosse Diu,
chal so l'tére dès vikants.

14. Espérez l'Signeûr,
sèyîz fwért!
Qui vosse coûr s'afèrmih,
èspérez l'Signeûr!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 28

Suplians nosse Diu èt rindans lî gråce!

1. D'a Dåvid.
Signeûr, dji brê-st-après vos,
ca por mi v's èstez bati so rotche!
Ni fez nin l'soûrdô qwand dji v'hoûke,
ca, si d'vant mi vos d'meûrîz mouwê
i n'a grande tchance qui dji d'vince parèy
åx cis qu'on-z-a d'hindou èl fosse!

2. Hoûtez lès suplicåcions di m'priyîre,
ètindez mès cris qui montèt disqu'a vos
qwand dj'èlîve mès mins
vè vosse sint dès sints!

3. Ni m'èhèrtchîz nin avou lès rèprovés,
avou tos cès la qu'ovrèt-st-al vûde,
qui djåzèt d'påye tot-åtou d'zèls
tot n'vikant qu'po-z-èsse toûrciveûs!

4. I fåt 'lzî d'ner sorlon leûs oûves,
sorlon lès îdèyes qu'is ont podrî l'tièsse,
i fåt 'lzî d'ner sorlon l'ovrèdje di leûs mins,
èlzî compter on djusse salêre!

5. Ca çou qu'fêt l'Signeûr,
is nèl comprindèt nin!
Is comprindèt co mons
tote l'oûve di sès mins!
Pus rade qui d'lès bati,
nosse Diu lès spèy'rè a jamåy!

6. Qui nosse Diu seûye bèni,
Lu qu'a-z-ètindou lès suplicåcions di m'priyîre!

7. Li Signeûr èst m'fwèce,
li Signeûr èst m'prôtècsion.
Es lu, mi coûr mète si fwè,
di Lu, dj'a r'çu dès s'coûrs;
mi coûr ènn'è-st-èl fièsse
èt dj'lî rind gråce tot tchantant!

8. Nosse Diu è-st-ine fwèce po s'peûpe,
il èst li ç'tadèle dèl dilîvrance po s'Mèssîye!

9. Såvez vosse peûpe,
bènihez voste-èritèdje,
sèyîz' leû bèrdjî
asteûre èt a jamåy!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 29 (Vulgate 28) Deux versions.

Îmne å Signeûr dès orèdjes!

1. D'a Dåvid.
Ofrez a Jahvé, vos, l'coûr dè cîr,
ofrez a Jahvé li glwère èl fwèce!

2. Ofrez a Jahvé li glwère di s'nom,
mètez-v' a gngnos d'vant Lu avou vos mous'mints sacrés!

3. Li vwès d'a Jahvé èst so lès êwes,
li Diu dèl glwère a disloyî l'tonîre,
Jahvé èst so les grantès-êwes!

4. Li vwès d'a Jahvé è-st-èl fwèce,
li vwès d'a Jahvé è-st-å d'zeûr dès grandeûrs!

5. Li vwès d'a Jahvé spèye lès cêdes,
Jahvé fêt tos bokès avou lès cêdes dè Liban!

6. I fêt potchî l'Liban come on djonne di torê,
èt l'Siriyon come on djonne di bufe.

7. Li vwès d'a Jahvé tape feûs-èt flames,
Jahvé find lès flames di feû!

8. Li vwès d'a Jahvé k'heût lès dèzerts,
Jahvé a k'heyou l'dèzêrt di Kadesh!

9. Li vwès d'a Jahvé fêt skèpî lès djonnes cerfs,
èle fêt hossi lès tchinnes,
Jahvé dispouye lès grands bwès,
èt d'vins s'palå tot proclame "Glwère"!

10. Jahvé sîdje a d'zeûr dès grantès-êwes,
Jahvé sîdje, Il èst rwè a jamåy!

11. Jahvé done li fwèce a s'peûpe,
po lès bèni, èlzî done li påye!

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 29 (Vulgate 28)

Ime å Signeûr dès orèdjes.

1. D'a Dåvid.
Rindez å Signeûr, vos lès fis dè Bon Diu,
Rindez å Signeûr li glwère èt l'fwèce!

2. Rindez å Signeûr li glwère di s'nom,
Mètez-v' a gngnos d'vant lu d'vins vos mous'mints sacrés.

3. Li vwès d'å Signeûr èst so lès êwes.
Li Diu dèl glwère a d'lahî l'tonîre.
Nosse Diu èst so lès grantès êwes!

4. Li vwès d'å Signeûr èst-èl pwissance
Li vwès d'å Signeûr è-st-å d'zeûr dès grandeûrs!

5. Li vwès d'å Signeûr spèye lès cêdes,
Nosse Diu k'tèye a bokès lès cêdes dè Liban!

6. I fêt potchî l'Liban come potche li djonne dè torê,
I fêt potchî l'Siriyon come potche li djonne dè bufe.

7. Li vwès d' å Signeûr find lès flames di feû!
Nosse Diu tape feûs-èt-flames!

8. Li vwès d' å Signeûr fêt tronler lès dèzerts,
Nosse Diu fèt tronler l'dèzêrt di Kadesh!

9. Li vwès d'a Jahvé fêt skèpî lès djonnes cerfs,
èle fêt hossi lès tchinnes,
nosse Diu dispouye lès grands bwès!
èt d'vins s'palå tot brêt "glwère"!

10. Nosse Diu sîdje å d'zeûr dès grantès-êwes,
Li Signeûr sîdje, Il èst rwè a jamåy!

11. Li Signeûr done li fwèce a s'peûpe,
Tot lès bènihant, èlzî done li påye!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 30 (Vulgate 29) Deux versions.

Jahvé sètche foû d'on dandjî qui minez-v' al mwért!

1. D'a Dåvid, îmne po l'inôguråcion dè timpe.

2. Dji tchante vosse glwère, Jahvé,
ca vos m'avez r'lèvé,
vos n'avez nin d'né a mès innemis
l'ocåzion dè rîre di mi!

3. Jahvé nosse Diu:
dji v's a houkî
èt vos m'avez r'wèri!

4. Jahvé,
vos avez r'sètchî m'åme di l'infér,
awè, vos m'avez rindou l'vèye,
adon qu'djèsteûs dèdja ståré èl fosse
å mitan d'tos lès ôtes.

5. Tchantez Jahvé, vos tos sès binamés,
rindez gråce po l'sint'té di s'nom!

6. Po tot dire:
si s'colére s'èmonte
nos sèrans pièrdous!
Mins i done si amoûr
al dilongue d'ine vèye.
Si al vèsprèye vochal li nut'
èt lès tchoûl'rèyes,
dês l' å matin, tot timpe,
nos n' sårans pus rat'ni nosse djôye.

7. Tot-z-èstant si påhûle, dji m'dihéve:
"Nèni, dji n'pou må dè halcoter!".

8. Mins Jahvé, adon v's èstîz por mi,
vos m'avîz rindou l'pus fwért!
èt v'la qu'vos v'catchî, Jahvé,
dj'ènn'a hapé 'ne bèle pawe!

9. So l'côp, dj'a brê après vos,
a m'Signeûr dji d'mandéve gråce:

10. "Qu'årez-v' di pus avou m'song',
qwand dji d'hindrè èl fosse?
Li poussîre vis glorifiyèye-t-èle?
Fêt-èle sèpi vosse fidélité?

11. Hoûtez-m' Jahvé,
prindez-m' ès vosse pitché!
Abèye djans,
vinez a m'sècoûrs!"

12. Et v'la ti nin qui m'doû,
vos mèl discandjîz par 'ne danse!
Vos disloyîz ossi m'cingue di crin
po poleur m'èwalper di vosse djôye.

13. Adon m'coûr tchante por vos,
èt i n'såreût nin s'têre!
Jahvé vos m'Signeûr,
dji v'glorifiyèye a jamåy!

 

1à22 - 53à85 - 85à110 - 110à131 - 132à150

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

 

 

Psaume 30 (Vulgate 29)

Po rinde gråce qwand on-z-a hipé foû dès mins dèl mwért!

1. D'a Dåvid, îme po l'inôguråcion dè timpe.

2. Dji tchante vosse glwère, Signeûr,
ca vos m'avez r'sètchî foû d'l'abîme,
vos n'avez nin d'né a mès innemis
l'ocåzion dè rîre di mi!

3. Signeûr nosse Diu:
dji v's a houkî èt vos m'avez r'wèri!

4.Signeûr,
vos avez r'sètchî mi-åme di l'infér,
vos m'avez rindou l'vèye,
adon qu'djèsteûs dèdja ståré èl fosse
å mitan d'tos lès ôtes.

5. Tchantez nosse Diu, vos sès fruzihants,
rindez gråce po l'sint'té di s'nom!

6. Si s'colére s'èmonte nos èstans pièrdous!
Mins i done si amoûr al dilongue d'ine vèye,
si al vèsprèye vint l' nut' èt lès tchoûl'rèyes,
tot timpe å matin, nos d'vrans brêre nosse djôye.

7. Tot-z-èstant si påhûle, dji m'dihéve:
po tofér dji so sûr di mi!

8. Mins Signeûr,
voste-amoûr por mi,
m'aveût rindou l'pus fwért…
mins si v'catchîz vosse vizèdje,
dji sèrè tot foû d'mi!

9. Après vos Signeûr, dj'a brê so l'côp,
a nosse Diu dj'a d'mandé gråce!

10. Quî gangnîz-v' di pus avou m'song'?
Quî gangnîz-v' à m'mète èl fosse?
Li poussîre vis glorifiyèye-t-èle?
Est-ce lèye qui dirè vosse vrêye?

11. Hoûtez-m' Signeûr,
prindez-m' ès vosse pîtché!
Fez-m' gråce,
vinez a m'sècoûrs!"

12. Et v'la ti nin qui m'doû,
vos mèl discandjîz par 'ne danse!
Vos m'bodjîz m'cingue di crin
po m'èwalper d'vosse-amoûr!

13. Po qu'li glwère vis tchante
èt po quèl n'arèstèye måy dèl fé,
dji v'glorifiyèye a jamåy
vos, nosse Signeûr èt nosse Diu.

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

 

Psaume 31 (Vulgate 30) Deux versions.

Priyîre po qwand on-z-èst èsprové!

1. A mêsse dè tchant. Tchant d' a Dåvid.

2. Jahvé, ès vos dji so-st-a houte,
dinez-m' dè caractére po n'måy ènnè rodjî!
Disgadjîz-m', vos qu'èstez djusse!

3. Tindez voste orèye di m'costé!
Abèye! Dispètchîz-v' di m'sètchî foû d'chal!
Por mi, sèyîz' li fôrterèsse batèye so rotche !
Por mi, sèyîz' li r'fûdje qui pout m'såver!

4. Vos qu'èstez m'rotche,
vos qu'èstez m'fôrterèsse!
A cåse di vosse nom vos m'min'rez,
vos m'mosturrez l'bone vôye.

5. Sètchîz-m' foû dèl trape
qu'ils avîz-st-ètèré por mi!
Ca vos èstez mi r'fûdje,
ès vos dji m'sins si påhûle!

6. Dj'a mètou mi-èsprit inte di vos mins!
Jahvé, vos èstez l'Diu dèl vèrité
èt vos m'avez ratch'té!

7. Dji hé tos lès-cis qu'wårdèt lès îdoles dè vûde;
por mi, dji m'abann'nèye ès Jahvé!

8. Vosse gråce mi fêt fruzî,
mi coûr si rimplih di djôye,
pace qui vos vèyez m'mizère
èt qu'vos k'nohez lès toûrmints di mi-åme.

9. Vos n'm'avez nin lèyî prizonîr dès grifes di l'innemi,
vos sout'nez mès pas so l'vôye dèl lîberté.

10. Fez-m' gråce, Jahvé,
ca vor'mint, dji so må pris!

11. Mi vèye s'ènnè va tote,
èle n'èst qu'on toûrmint!
C'èst d'vins lès djèmihèdjes
qui mès annèyes passèt oute!
Tofér mi fwèce trèbouhe a stok di m'pètchî:
dj'a l'song' qui s'ènnè k'magne tot!

12. Lès-cis qui m'acåblèt ont si bon dè s'foute di mi!
dji so minme div'nou 'ne tchèdje po mès vwèzins;
Qwand is m'vèyèt a l'ouh, mès camarådes ont sogne di mi
i s'ènnè corèt bin lon èrî d'mi!

13. Come on mwért dji so roûvi d'turtos,
èstant foû d'leû coûr come on våse tapé so l'grinî.

14. Dj'ènn'ètind tot plin qui mûzèt mètchanmint,
li tèreûr si stind tot-avå
tél'mint is complotèt èssonne conte di mi!
Is tûzèt minme a haper mi-åme!

15. Mins mi Jahvé, ès vos dji m'abann'nèye,
dji dis: "C'èst vos qu'èst m'Diu!"

16. Li compte di mès djoûs è-st-inte di vos mins!
Sètchîz-m' foû dès grifes di mès innemis,
foû dès grifes di tos cès là qui m'qwèrèt tofèr mizére!

17. Qui vosse vizèdje s'illuminêye so vosse chèrviteû!
Jahvé, såvez-m' par vosse gråce!

18. Qui dji n'seûye måy honteûs di v's aveûr houkî!
Mins qui l'honte seûye pus vite so tos lès vårins,
insi is clôront leû gueûye tot d'hindant åx inférs.

19. Qui lès lèpes des minteûs sèyèsse cozowes
zèls qui avou on fîer toupet
vont k'djåzer l'djusse po tot avå!

20. Jahvé, qui vosse bonté èst foû mèzeûre!
Vos l'avez mètou d'costé
po l'djôye di vos fruzihants,
Vosse bonté è-st-ossi fête
po tos lès cis qui d'vant lès omes
ont wèzou s'mète a houte ad'lé vos!

21. Vos catchîz vos fruzihants ès li s'cret di v'vizèdje:
bin lon dèl rivålité dès omes,
bin lon dèl quarèle a côp d'linwe!

22. Qui Jahvé seûye bèni
po totes lès mèrvèyes d'amoûr
qu'il a-st-avu por mi, å d'vins di s'vèye fôrtifiyèye.

23. Portant dji m'aveût dèdja dit:
"Dji so r'tchoûki èrî d'vos oûys!"
Mins vos hoûtez m'vwès
qwand èle vis prèye,
vos avez-st-ètindou m'cri d'apèl!

24. Vos turtos sès fidèles: inmez Jahvé!
Di tot s'coûr Jahvé wåde sès fruzihants!
Mins avou lès grandiveûs
Jahvé sé èsse pice-crosse!

25 Rafwèrcihez-v', afèrmihez vosse coûr,
vos turtos qu'èstez a l'awète di Jahvé!

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 31 (Vulgate 30)

Priyîre po qwand on-z-èst èsprové!

1. A mêsse dè tchant, tchant d' a Dåvid.

2. Signeûr,
ès vos dji so-st-a houte,
èt dj'ènnè sèrè måy djinné!
Dilîvrez-m', vos qu'èstez l'djusse!

3. Tindez voste-orèye di m'costé!
abèye, dispètchîz-v' di m'sètchî foû d'chal!
Por mi, sèyîz' li rotche, li citadèle,
por mi, sèyîz' li r'fûdje qui pout m'såver!

4. C'èst vos qu'èst m'rotche,
c'èst vos qu'èst m'fôrterèsse!
Vos m'min'rez a cåse di vosse nom,
vos m'mosturrez l'bone vôye.

5. Rissètchîz-m' foû dèl trape
qu'ils avît-st-ètèré por mi!
Vos èstez mi r'fûdje,
ès vos dji m'sin si påhûle!

6. Signeûr, c'è-st- inte di vos mins
qui dj'a mètou mi-èsprit,
vos èstez l'Diu dèl vèrité
èt vos m'avez ratch'té!

7. Dji hé lès wårdeûs dès îdoles dè vûde;
por mi dji m'abann'nèye ès Signeûr!

8. Vosse gråce mi fêt fruzî,
mi coûr si rimplih di djôye,
ca c'èst vos qu'a vèyou m'mizère
qui k'nohez lès toûrmints di mi-åme.

9. Vos n'm'avez nin lèyî prizonîr dès grifes di l'innemi,
vos sout'nez mès pas so l'vôye dèl lîberté.

10. Fez-m' gråce, Signeûr,
ca vor'mint, dji so må pris!
Mi loukeûre, mi-åme, minme mi cwér
si distrûhèt tot d'vins lès toûrmints!

11. Mi vèye s'ènnè va tote,
èle n'èst qu'on toûrmint!
C'èst d'vins lès djèmihèdjes
qui mès annèyes passèt oute!
Mi fwèce trèbouhe tofér a stok di m'pètchî:
dji m' kimagne tot m'song' !

12. Lès vårins ont si bon di s'foute di mi!
Dji so-st-ine tchèdje po mès vwèzins.
Qwand dj'so so l'ouh, mès camarådes ènnè hapèt sogne,
rad'mint is s'sètchèt èvôye!

13. Come on mwért
dji so roûvi d'turtos,
dji so foû d'leû coûr
come on vî våse tapé so l'grinî.

14. Dj'ènn'ètind tot plin qu' mûzèt mètchanmint,
li tèreûr si stind tot-avå
tél'mint is complotèt disconte di mi,
is tûzèt minme a haper mi-åme!

15. Mins mi, Signeûr,
ès vos dji m'abann'nèye,
dj'a dit:
"C'èst vos qu'èst m'Diu!"

16. Li compte di mès djoûs è-st-inte di vos mins!
Sètchîz-m' don foû dès grifes di mès innemis,
foû dès grifes di tos cès-là
qui m'qwèrèt tofèr mizére!

17. Qui vosse vizèdje s'illuminêye po vosse chèrviteû!
Signeûr, par vosse gråce, såvez-m'!

18. Qui dji n'seûye måy honteûs di v's aveûr houkî!
Qui l'honte seûye pus vite so tos lès vårins,
insi tot d'hindant åx inférs
is clôront leû gueûye!

19. Qui lès lèpes des minteûs sèyèsse cozowes,
zèls qui d'on fîer toupet,
ènnè vont tot avå k'djåzer l'djusse!

20. Signeûr, qui vosse bonté èst foû mèzeûre!
Vos l'avez mètou d'costé
po l'djôye di vos fruzihants;
vosse bonté è-st-ossi fête
po tos lès cis qui d'vant lès omes
ont wèzou s'mète a houte ad'lé vos!

21. Vos catchîz vos fruzihants
ès li s'cret d'vosse vizèdje:
bin lon dèl rivålité dès omes,
bin lon d'leû quarèle a côp d'linwe!

22. Qui nosse Diu seûye bèni
po totes lès mèrvèyes d'amoûr
qu'il a-st-avu por mi,
å d'vins di s'vèye fôrtifiyèye.

23. Portant dji m'aveût dèdja dit:
"Dji so r'tchoûki èrî d'vos oûys!"
Mins qwand dji v'prèye
vos hoûtez todi m'vwès,
vos avez-st-ètindou m'cri d'apèl!

24. Vos qui lî èstez fidèles:
inmez vosse Diu!
Nosse Diu wåde sès fruzihants
di totes lès fwèces di s'coûr!
Mins avou lès grandiveûs
nosse Diu sé èsse pice-crosse!

25 Rafwèrcihez-v',
afèrmihez vosse coûr,
vos turtos qu'èstez a l'awète dè bon Diu!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

 

Psaume 32 (Vulgate 31) Trois versions.

Boneûr di l'ome qu'èst pardoné.

1. D'a Dåvid: Tûzèdje.
Quî n's èstans ureûs :
qwand n's èstans r'lèvés d'nosse fåte,
qwand n's èstans r'nètîs d'nosse pètchî!

2. Quî n's èstans ureûs :
qwand Jahvé ni nos ratind nou twért,
qwand noste èsprit sût tofér li vèrité!

3. Dji m'têhîve:
pace qu'a fwèce dè djèmi tot l'djoû
mi song' si k'magnîve tot!

4. Ca di djoû come di nut'
sor mi dji sintéve pèzer vosse min;
mi coûr èsteût tot souwé
come li foûre å solo d'awous'.

5. Dji v's a fêt k'nohe mi fåte,
dj'a riconhou mès twérts;
dji m'a dit ès mi-minme:
"dji m'va-st-a k'fèsse ad'lé Jahvé."
Et vos:
vos m'avez r'mètou m' pètchî,
vos m'avez pardoné m'fåte.

6. C'èst seûlmint qwand is sont bin strindous
qui vos èfants tûzèt a v'priyî!
Et portant les grandès-êwes montrît minme,
qui zèls sèront todis a sètch!

7. Ad'lé vos dji so-st-a houte,
vos m'disgadjîz d'mès transes,
vos m'èwalpez èl muzike
dès tchants d'dilîvrance.

8. Vos m'soflez lès bonès-îdêyes
tot m'mostrant li vôye a sûre;
Vos m'tinez a l'oûy
po poleur mî m'consî!

9. Po çoula, dji n'deûs nin èsse
come li dj'vå ou l'ågne sins rêzon;
èlzî fåt l'môr po saveûr lès miner,
èt i fåt co dèl fwèce po lès t'ni!

10. Li rèsprové va sofri bêcôp dès toûrmints;
Mins l'ci qui s'abann'nèye ès Jahvé
sèrè-st-èwalpé d'amoûr!

11. Sèyîz' djoyeûs ès Jahvé,
tchantez vos lès djusses!
Fruzihez d'amoûr
vos les coûrs dreûts!

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 32 (Vulgate 31)

Boneûr d'in ome qu'èst pardoné.

1. Di Dåvid: tûzeûre.
Ureûs li ci:
po qui li fåte est r'mètowe,
po qui li pètchî èst rabatou.

2. Ureûs l'ome:
po qui li Signeûr ne mète nin
l'indjustice so s'compte,
â qué î n'a nin è s'tièsse
totes målès-idèyes.

3. Mi silince usève mès ohês
èt dj'a rudji tot l'djoû.

4. Ca djoû èt nut' ti min pèzéve sor mi,
mi séve r'ssouwéve åx feûx di l'osté.

5. Mi fåte, dji t'l'a fêt k'noh,
dji n'a nin catchî m'pètchî.
Dj'a dit:
dj'ènn'irè ad'lé l'Signeûr,
dji li k'fèsserè m'fåte;
Et twè t'as pardoné mès twèrts,
èt twè t'as r'mètou mès pètchîs.

6. C'èst poqwè, a l'mèyeûse eûre, chaskeun' dès tonks
deût rik'noh sus fåtes,
adon pwis, qwant montront les grandès-êwes
ils ni sèront nin aksûs.

7. Signeûr,
dji m'mète à houte ad'lé twè,
ti m'wåde d'esse è l'angwèsse,
ti m'èwal'pèye dès tchants di salut.

8. Dji va t'aksègnî,
ti mostrer li vôye a sûre;
èt dji va t'consî,
taper in'oûy sor twè.

9. Ni seûye nin come li dj'vå
ou come li moulet sins rêzon,
èlzî fåt l'mor po lès t'ni.

10. Li rèsprové, lu, a bråh'mint dès toûrmints;
Mins ci qui s'fèye å Signeûr,
ci-la est strindou po s'amoûr.

11. E Signeûr,
fez des hopes di djôye,
vos les djusses!
Fruzihez di bonheur
vos les coûrs dreûts!

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 32 (Vulgate 31)

1. Qui l'ome a bon:
qwand il èst cwite di s'fåte,
qwand s'pètchî èst rabatou!

2. Qui l'ome a bon:
qwand s'Diu n'lî ratint noû twért,
qwand les målès îdèyes
ni lî montèt nin èl tièsse!

3. Dji n'dihéve pus nole:
pace qu'a djèmi tote djoû
dji fondéve tot èvôye.

4. Djoû èt nut,
vosse min s'apèzantihéve sor mi;
mi vigueûr si souwéve tote
come dè foûre å solo d'awous'.

5. Dji v's a fêt k'nohe mi fåte,
dji n'a nin catchî m'twért.
Dji m'a dit:
"Va-r'-zè å bon Diu
vasse lî k'fèsser tès pètchîs."
Et vos,
vos m'avez dishalé
dèl pèzance di m'fåte.

6. C'èst qwand tot rote li cou-z-å hôt
qui lès vosse brêyèt-st-après vos:
portant minme lès grantès êwes
èlzès lèront-st-a sètch.

7. Vos èstez por mi on rèfudje:
vos m'wårdez d'sacwantès måleûrs,
dji m'sin pwèrté po l'djôye
d'aveûr situ såvé.

8. "Dji t'rindrè sûti
èt t'mostur'rè l'vôye a sûre;
dji t'tinrè a l'oûy
tot t'dinant d'bons consèys."

9. " Po qu'ti vôye seûye påhûle,
ni ravize nin lès dj'vås ou lès moulèts
qui n'ont nole ètinde:
èlzî fåt môr èt bride po 'nn'èsse mêsse."

10. Qwand å måva,
co traze sôrs di toûrmints
lî pindèt al narène;
so l'tins qu'l'amoûr dè bon Diu èwalpêye
li ci qui s'ennè r'mète a lu.

11. Qui l'bon Diu seûye vosse djôye!
Fez don fièsse vos lès djusses!
Omes di dreûteûr,
tchantez voste-amoûr!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 33 (Vulgate 32) Deux versions.

Ime al Providince.

1. Trèssèyîz d'djôye ès Jahvé, vos lès djusses,
li louwanje dès coûrs dreûts èst si bèle!

2. Rindez gråce a Jahvé tot djouwant d'l'ôr,
tchantez-l' tot v's acompagnant dèl guitåre.

3. Por lu tchantez on noû tchant,
èt po fé ètinde vosse mèrci
tchantez turtos bin èl cadance.

4. Ca l'parole d'a Jahvé èst dreûteur
èt sès oûves sont d'ine téle fidélité!

5. Il inme li djustice èt l'dreût.
Li tére èst rimplèye di si-amoûr.

6. Jahvé djåza
èt so l'côp lès cîrs èstît fêts,
i sofla avou s'boke
èt l'milice dès cîrs fout mètowe so pîds!

7. Il ahop'lêye l'èwe dès mérs
come po-drî dès digues!
Il a mètou lès ôcèyans d'vins dès bougnous!

8. Quî tote li tére
fruzih di sogne po d'vant Jahvé,
quî totes lès djins dè monde
tronnèsse po d'vant Lu!

9. I djåze: çoula èst!
I k'mande: çoula èst fêt!

10. Jahvé k'mahe lès plans dès peûpes,
i fêt toûrner a rin lès dèssins dès nåcions!

11. Mins l'plan d'a Jahvé èst fêt po tofér,
lès îdèyes di s'coûr s'mètèt è plèce
di siéke an siéke.

12. Qué boneûr
po l'peûpe don Jahvé èst l'Diu!
Qué boneûr
po l'nåcion qu'a-stu tchûzèye po si èritèdje!

13. Jahvé r'louke al bawète dès cîrs,
i veût chaskeun' dès fis dè pére Adam.

14. Dèl pièce wice qui sîdje,
èt d'tos sès oûys,
Jahvé louke totes lès djins dèl tére.

15. Lu qu'èlzî a crèyé l'coûr,
i rik'nohe leûs oûves tot lès vèyant-st-èssone.

16. Li rwè n'èst nin såvé
pace qu'il èst pus fwért qu'ine ôte!
Li corèdjeûs ni s'rind nin lîbe
avou s'fwète pwissance!

17. C'èst-st-ine minte dè dire
qui fåt on dj'va po-z-èsse såvé!
Ci n'èst nin 'ne fwèce di dj'vå
qui v'sètch'rè foû d'la!

18. Jahvé a tapé sès oûys so sès fruzihants,
so lès-cis qu'sont-st-a l'awète di si-amoûr.

19. Jahvé èlzî råye leû åme dès mins dèl mwért,
i lès fêt viker åx djoûs dèl famène.

20. Noste åme a mètou si-èspwér ès Jahvé,
il èst nosse sécoûrs, nosse prôtècsion.

21. Qwand n's èstans-st-avou Lu
nosse coûr è-st-al fièsse!
Nos nos ènnè r'mètans
al sint'té di s'Nom!

22. Jahvé, qui voste amoûr seûye so nos-ôtes,
èt çoula come nos l'éspérans d'Vos!

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 33 (Vulgate 32)

Ime al Providince.

1. Fruzihez d'djôye ès Signeûr,
vos lès djusses,
li louwanje d'on franc coûr
èst si bèle a sès oûys!

2. Rindez gråce å Signeûr
tot djouwant d'l'ôr,
tchantez-l',
tot v's acompagnant dèl guitåre.

3. Por lu
tchantez on noû tchant,
èt po bin fé ètinde vosse mèrci
tchantez turtos bin èl cadence.

4. Ca l'parole d'å Signeûr èst dreûteur,
èt sès oûves sont d'ine téle fidélité!

5. Il inme li djustice èt l'dreûteûr,
li tére èst rimplèye di si-amoûr.

6. Nosse Diu djåza
èt so l'côp lès cîrs èstît fêts,
i sofla avou s'boke
èt l'milice dès cîrs fout mètowe so pîds!

7. Il ahop'lêye l'èwe dès mérs
come podrî dès digues!
Il a mètou lès ôcèyans
d'vins dès bougnous!

8. Quî tote li tére fruzih di sogne
divant nosse Diu!
Quî totes lès djins dè monde
tronnèsse po d'vant Lu!

9. I djåze: çoula èst!
I k'mande: çoula èst fêt!

10. Nosse Diu k'mahe lès plans dès peûpes,
i fêt toûrner a rin lès dèssins dès nåcions!

11. Mins l'plan d'å Signeûr
èst fêt po tofér,
lès îdèyes di s'coûr
s'adjins'nèt di siéke an siéke.

12. Qué boneûr po l'peûpe
don l'Signeûr èst l'Diu!
Qué boneûr po l'nåcion
qu'a-stu tchûzèye po si-èritèdje!

13. Jahvé r'louke al bawète dès cîrs,
i veût chaskeun' dès fis d' Adam.

14. Dès pièce wice qui sîdje,
nosse Diu louke di tos sès oûys
totes lès djins dèl tére.

15. Lu qui d'sès mins
èlzî a fêt l'coûr,
rik'nohe leûs oûves
tot lès vèyant-st-èssone.

16. Li rwè n'èst nin såvé
adon qu'il èst l'pus fwért!
Li corèdjeûs ni s'rind nin lîbe
par si fwète pwissance!

17. C'èst minti qu'dè dire
qui fåt-st-on dj'va po-z-èsse såvé!
Ci n'èst nin 'ne fwèce di dj'vå
qui v'sètch'rè foû d'la!

18. Nosse Diu a tapé sès oûys so sès fruzihants,
so lès-cis qu'sont-st-a l'awète di si-amoûr.

19. Nosse Diu èlzî råye leû-z-åme
dès mins dèl mwért,
i lès fêt viker
d'vins lès djoûs d' famène.

20. C'è-st-ès Signeûr
qui n's avans mètou noste-èspwér,
il èst nosse sécoûrs,
il èst nosse prôtècsion.

21. Qwand n's èstans-st-avou Lu
nosse coûr è-st-al fièsse!
Nos nos ènnè r'mètans
al sint'té di s'Nom!

22. Signeûr,
qui voste-amoûr seûye so todi so nos-ôtes,
èt dèl minme manîre
qui nos l'éspérans d'Vos!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 34 (Vulgate 33) Deux versions.

Louwanje al djustice d'a Jahvé.

1. D'a Dåvid: qwand èstant d'vant Abimèlèch i féve li ci qu'èsteût reû-sot; èl féve si bin qui ci-chal èl tchèssa èvôye. Adon pwis ènnè rala.

2. Sins r'låke dji vou bèni Jahvé,
si louwanje sèrè todi so mès lèpes.

3. Es Jahvé m'åme èst tote amadouwèye!
Lès pôves l'ètindèt
èt sont-st-èl djôye!

4. Glôrifiyez Jahvé avou mi,
tos-z-èssonne
tchantons lès mèrvèyes di s'sint nom

5. Dji qwèréve après Jahvé,
èt v'la qu'm'a rèspondou!
I m'a sètchî foû
di totes mès målès sognes.

6. Di tos vos oûys riloukîz Jahvé:
vos 'nnè sèrez tot illuminé
sins pour çoula
ènn'èsse tot djinné!

7. Vochal on pôve:
il a supliyî Jahvé,
Jahvé èl houte,
pwis èl såve di sès toûrmints.

8. L'andje d'a Jahvé monte si tinte
tot åtou d'sès fruzihants;
insi s'ènn'ont mèzåhe,
al vole èlzî pwète sécoûrs.

9. Sayîz on pô èt vos veûrez
come Jahvé a bon gos'!
Bènureûs l'ome
qui s'abann'nèye ès s'amoûr!

10. Fruzihez po Jahvé vos sès sints,
ca i n'lèye rin måker a tos sès fruzihants!

11. Lès liyons ont-st-ine mène d'afamé:
is n'trovèt pus nole prôye!
Mins quî qwîre après Jahvé
poût èsse sûr di n'måker d'rin!

12. Vinez, èfants
èt hoûtez-m' bin:
dji m'va v's ac'sègnî
a fruzi d'sogne di Jahvé!

13 Wice è-st-i l'ome,
qui s'ènamourèye dèl vèye,
qui d'zîre dès djoûs
po djouwi dè boneûr?

14. Rat'nez vosse linwe,
loukîz d'près a vos lèpes,
ca pus vite qu'on pinse
on k'djåze ou dit dès mintes!

15 Potchîz foû dè må
èt v'nez fé l'bin!
Riqwèrez l'påye,
èt qwand v'l'årez trové,
nèl lachez pus!

16. Jahvé a vèyou cès-la qu'fêt l'må
èt i s'a d'monté conte di zèls,
po distrûre leû sov'ni po tofér,
di so tote li tére.

17. Jahvé a ossi tapé sès oûys so lès djusses,
sès orèyes prindèt atincion a leûs èclameûres;

18. is brêyèt, èt Lu lès ètind,
i lès sètche foû d'leûs transes.

19 Jahvé èst todi ad'lé lès coûrs moudris,
i rapåftèye lès acåblés, lès rabahîs.

20. Li djusse sèrè bråmint èsprové
mins Jahvé l'risètch'rè d'totes sès mizéres,

21 ca i wète a tos sès ohês,
i n'a pont d'dandjî
qu'on 'nnè spèye on seûl!

22 Lès calin'rèyes f'ront morî l'mètchant,
lès innemis dè djusse
finihront todi èl mwért!

23. Jahvé ratch'tèye l'åme di sès chèrviteûs,
tot qui s'mète a houte ès Jahvé
ni pèrirè måy!

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 34 (Vulgate 33)

Louwanje al djustice d'å Signeûr.

1. D'a Dåvid: qwand i féve li ci qu'èsteût reû-sot po d'vant Abimèlèch; èl féve si bin qui ci-chal èl tchèssa èvôye. Adon pwis ènnè rala.

2. Dji vou bèni m'Signeûr, sins r'la,
dj' årè tofér si louwanje al boke.

3. C'è-st-ès Signeûr
qui mi-åme èst tote amadouwèye!
Lès pôves qui l'ètindèt
ènnè sont plin d'djôye!

4. Avou mi,
glôrifiyiz l'bon Diu,
tos-èssonne
tchantons lès mèrvèyes di s'sint nom

5. Dji qwèréve après nosse Diu,
èt v'la qu'm'a rèspondou!
I m'a sètchî foû
di totes mès målès sognes.

6. Di tos vos oûys loukîz don l'Signeûr,
vos 'nnè sèrez tot illuminés
sins tot ot'tant ènn'èsse djinné!

7. Vochal on pôve:
il a supliyî l'bon Diu...
Ci-chal èl houte,
adon èl såve di sès toûrmints.

8. L'andje d' å Signeûr a monté s'tinte
adlé sès fruzihants;
insi s'ènn'ont mèzåhe,
al vole èlzî pwète sécoûrs.

9. Sayîz on pô èt vos veûrez
come nosse Diu a bon gos'!
Qu'il è-st-ureûs l'ome
qui s'abann'nèye ès si-amoûr!

10. Fruzihez po l'Signeûr, vos sès sints,
ca sès fruzihants ni måk'ront måy di rin!

11. Lès liyons ont-st-ine mène d'afamé:
is n'trovèt pus nole prôye!
Mins quî qwîre après l'bon Diu,
poût èsse sûr di n'måker d'rin!

12. Vinez mès èfants,
èt hoûtez-m' bin:
dji m'va v's ac'sègnî
a fruzi d'sogne dè Signeûr!

13 Wice è-st-i l'ome,
qui s'ènamourèye dèl vèye,
qui d'zîre dès djoûs
po bin djouwi dè boneûr?

14. Rat'nez vosse linwe,
loukîz d'tot près a vos lèpes,
ca bêcôp pus rade qu'on n'pinse
on k'djåze ou lache 'ne minte!

15 Potchîz foû dè må èt v'nez fé l'bin!
Riqwèrez l'påye,
èt qwand v'l'årez trové,
nèl lachez vor'mint pus!

16. Nosse Diu a vèyou lès-cis qu'fêt l'må,
èt i s'a d'monté conte di zèls,
i distrûrè po tofér leû sov'ni,
d'al copète dèl tére.

17. Nosse Diu a tapé sès oûys so lès djusses,
sès orèyes acontèt totes leûs èclameûres;

18. is brêyèt, èt lu lès ètind,
i lès sètche foû d'leûs transes.

19 Nosse Diu èst tofér ad'lé lès coûrs moudris,
i rapåftèye lès acåblés, lès rabahîs.

20. Li djusse sofrirè d'bêcôp d'ponnes,
mins l'Signeûr lî risètch'rè foû d'sès sès mizéres,

21 ca l'bon Diu wète a tos sès ohês,
èt i n'a pont d'dandjî
qu'on n'lî ènnè spèye on seûl!

22 Lès calin'rèyes f'ront morî l'mètchant,
lès innemis dè djusse
påy'ront po tot!

23. Nosse Diu ratch'tèye l'åme di sès chèrviteûs,
tot qui s'mète a houte ès bon Diu
vik'rè po tofér!

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 35 (Vulgate 34)

Priyîre d'on djusse å qué on qwîre mizère.

1. D'a Dåvid.
Ataquez Signeûr,
lès-cis qui m'ataquèt,
asticotez Signeûr,
tos cès la qui m'asticotèt!

2. Drèssez conte zèls totes vos prôtèscions,
aspitez a m'sécoûrs!

3. Lèvez vosse lance disconte zèls,
bårez l'vôye åx cis qui m'kitchèssèt!
Mi-åme è-st-ine roûvisse,
rapèlez lî qui v's èstez m'dilîvrance!

4. Qu'on prinse l'oneûr di tos lès vårins
qui k'tchèssèt mi-åme,
qu'ènnè sèyèsse covièrt di honte!
Qu'ènn'alèsse li cou-z-å hôt,
qu'ènnè rodjihèsse disqu'åx orèyes
zèls qui complotèt po fé m'måleûr!

5. Qu'is ravizèsse å strin
qui l'vint èpwète avou lu,
qui l'andje d'å Signeûr lès k'tchèsse
sins lès lèyî r'prinde alène!

6. Qu'i lès tchoûke so 'ne vôye
qui seûye dè pus ridante,
qu'is n'vèyèsse nin foû d'leûs oûys
tél'mint il î fêt spès!

7 Ca is avît stindou leûs filèts
po m'catchî l'fosse;
is d'foncît l'tére po mi åme
èt fît çoula po rin!

8. Li distrûhèdje sèrè dèdja sor lu
qu'i n'l' årè nin co vèyou!
I s'f'rè-st-apici ès filèt
qu'il aveût catchî por mi!
I toum'rè a djonts pîs
ès s'prôpe distrûhèdje!

9. Mi- åme fruzih ès bon Diu,
èlle è-st-èl djôye ès s'dilîvrance.

10. Awè, tos mès ohês èl dîront:
"Signeûr, quî sèrè parèy a vos:
po såver l'pôve d'on pus fwért qui lu,
po disgadjî li p'tit dè ci qu'l'èpwète?"

11. Dès fås tèmons s'drèssèt conte mi,
is m'dimandèt çou qu'dji n'sé nin!

12. Po tot l'bin qu'dj'èlzî a fêt
is n'm'ont rindou qu'dès mås!

13. Et portant dji féve tot por zèls:
qwand is èstît malåde:
po fé pènitince
dj'èsteûs moussî d'on sètch,
èt tot djeunant
dji fwèrcihéve so mi-åme,
èt dj'l'a tél'mint fêt
qui m'priyîre m'a rim'nou è m'sin!

14. Dj'ènn'aléve hår èt hote
come si dj'èsteûs l'fré ou l'camaråde,
dj'enn'aléve ès neûr, tot ployî
come ès doû di m'prôpe mame!

15. Et is s'sont rafiyîs tos èssomme
di m'vèyî toumer!
Is s'rassonnît disconte di mi
èt dj'ènnè saveûs rin!
Is m'lès d'hèt totes,
is m'kihiyèt sins r'låke!

16. Is sont rimplis d'fås'tés,
c'èst dès geûyes a mok'rèyes;
is m'fêt tél'mint dès hègnes
qui leûs dints 'nnè crinèt!

17. Signeûr,
kibin d'tins alez-v' vèy tot çoula?
Disgadjîz mi-åme foû d'leûs distrûhèdje,
rissètchîz m'vèye d'inte lès liyons!

18. Dji v'glôrifiyèye èl grande assimblèye,
dji v's aclamèye d'inte lès djins d'on fwért peûpe.

19. Mès innemis sont rimplis d'mint'rèyes,
mins qu'is n'si rafiyèsse nin di m'måleûr!
Qui sins nole cåse
mès hayåves ni clignèsse nin d'l'oûy!

20. Ca inte di zèls
is n'djåzèt måy dèl påye,
is n'tûzèt qu'a djouwer d'måvas toûrs
a tos lès pahûles dèl tére.

21. Is alårdjihèt leû boke disconte di mi,
is d'hèt: " o-ho, o-ho,
nos oûys ènnè fêt l'dècouvèrte!".

22. Signeûr, vos l'vèyez ossi,
ni d'meûrez don nin mouwê,
vos qu'èst m'Diu,
ni v'rissètchîz nin èri d'mi!

23. Dispièrtez-v' Signeûr, il èst tins,
riv'nez a vos po disfinde mi bon dreût!
C'èst vos qu'èstez m'Diu,
c'èst vos qu'èstez l'mêsse di m'cåse!

24. Signeûr nosse Diu,
djudjez-m' sorlon vosse djustice;
Fez qu'tos cès vårins
n'polèsse si rafiyî a cåse di mi!

25. Qu'is n'tûzesse ès leû coûr:
" o-ho, c'èsteût nosse sohêt!"
Qu'is n'dihèsse nin non pus:
"Nos l'avans fêt disparêt!"

26. Is î pièdront leû oneûr,
ènnè d'vinront mouwês!
Zèls qui s'rafiyît di m'måleûr,
zèls qui s'fît pus grand qu'mi,
vo-l'zès la covièrt di honte,
vo-l'zès la dim'nou bin p'tit!

27. Qu'is fruzihèsse por mi cès la qu'inmèt m'djustice,
qu'is sèyèsse turtos èl djôye!
Qu'ès tot tins is polèsse dire:
"Nosse Diu èst grand, i vout l'påye po sès chèrviteûs.

28. Mi linwe mûzèye vosse djustice
tote djoû èle dirè vosse glwère!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 36 (Vulgate 35) Deux versions.

Viker avou Jahvé!

1. A mêsse dè tchant, dè chèrviteû d'a Jahvé, d'a Dåvid.

2. L'impîye vike tot-a si-åhe,
li pètchî è-st-å pus parfond di s'coûr,
nole sogne di Jahvé
n'èst d'vant sès oûys!

3. Il èst bin trop anmouraché d'lu-minme
po-z-aporçûre èt abôminer s'fåte.

4. Il a s'boke tote plinte
di rûse èt d'mètchanceté,
il èst bin trop tchèstou
po-z-èsse sûti, po fé l'bin!

5. So s'lét, i machinêye sès måvas côps,
i rote fîremint so l'vôye dè vûde,
i n'vou nin r'djèter l'må!

6. Jahvé:
voste amoûr si displôye
al dilongue dès cîrs,
èt vosse fidélité, lèye,
s'èlîve co pus hôt qu'lès nulèyes,

7. Vosse djustice èst l'minme
qui lès hôteûrs d'a nosse Diu,
vos djudj'mints ou l'grand abîme
c'èst tot fî parèy!
L'ome, vos l'mètez a si-åhe,
èt po lès bièsses vos fez l'minme!

8. Jahvé:
quéne tchance nos avans
d'avu vosse gråce!
Lès èfants dès omes vinèt s'mète a houte
ès l'ombe d'a vos éles.

9. Vosse mohone ridohe di vos bins,
èt is s'ènnè r'pahèt,
li fleûve di vos plêzîrs lès disseûlèye!

10. Ca ad'lé vos èst l'fontinne
di wice coûrt li vèye,
ès vosse loumîre,
nos riknohans Li Loumîre!

11. Ewalpez d'voste amoûr
lès cis qui v'kinohèt,
fez d'hinde vosse djustice
so lès dreûts coûrs!

12. Lès pîds dès håtins
ni m'tripèl'ront nin,
lès mins dès måvas
ni m'bouh'ront nin djus!

13 Loukîz bin:
vo-l'zès-la qu's'èscroulèt
tos cès ovrîs dè vûde,
is ont stu tapé djus
èt is n'såront s'ènnè r'lèver!

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 36 (Vulgate 35)

Viker avou l'bon Diu!

1. A mêsse dè tchant, dè chèrviteû d'a Jahvé, d'a Dåvid.

2. L'impîye vike tot-a si-åhe,
li pètchî è-st-å pus parfond di s'coûr,
nole sogne di Jahvé
n'èst d'vant sès oûys!

3. Il èst bin trop anmouraché d'lu-minme
po-z-aporçûre èt abôminer s'fåte.

4. Il a s'boke tote plinte
di rûse èt d'mètchanceté,
il èst bin trop tchèstou
po-z-èsse sûti, po fé l'bin!

5. So s'lét, i machinêye sès måvas côps,
i rote fîremint so l'vôye dè vûde,
i n'vou nin r'djèter l'må!

6. Jahvé:
voste amoûr si displôye
al dilongue dès cîrs,
èt vosse fidélité, lèye,
s'èlîve co pus hôt qu'lès nulèyes,

7. Vosse djustice èst l'minme
qui lès hôteûrs d'a nosse Diu,
vos djudj'mints ou l'grand abîme
c'èst tot fî parèy!
L'ome, vos l'mètez a si-åhe,
èt po lès bièsses vos fez l'minme!

8. Jahvé:
quéne tchance nos avans
d'avu vosse gråce!
Lès èfants dès omes vinèt s'mète a houte
ès l'ombe d'a vos éles.

9. Vosse mohone ridohe di vos bins,
èt is s'ènnè r'pahèt,
li fleûve di vos plêzîrs lès disseûlèlèye!

10. Ca ad'lé vos èst l'fontinne
di wice coûrt li vèye,
ès vosse loumîre,
nos riknohans Li Loumîre!

11. Ewalpez d'voste amoûr
lès cis qui v'kinohèt,
fez d'hinde vosse djustice
so lès dreûts coûrs!

12. Lès pîds dès håtins
ni m'tripèl'ront nin,
lès mins dès måvas
ni m'bouh'ront nin djus!

13 Loukîz bin:
vo-l'zès-la qu's'èscroulèt
tos cès ovrîs dè vûde,
is ont stu tapé djus
èt is n'såront s'ènnè r'lèver!

 

1à22 - 53à85 - 85à110 - 110à131 - 132à150

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

 

Psaume 36 (Vulgate 35)

Viker avou l'Bon Diu!

1. A mêsse dè tchant, dè chèrviteû d'å igneûr, d'a Dåvid.

2. Li vårin vike tot-a si-åhe,
li pètchî è-st-å pus parfond di s'coûr,
nole idèye d'aveûr sogne dè Bon Diu
ni lî vint-st-èl tièsse!

3. Il èst bin trop anmouraché d'lu-minme
po-z-aporçûre èt abôminer s'fåte.

4. Il a s'boke tote plinte
di rûse èt d'mètchanceté,
il èst bin trop tchèstou
po-z-èsse sûti, po fé l'bin!

5. So s'lét, i machinêye sès måvas côps,
i rote fîremint so l'vôye dè vûde,
i n'sé s'passer dè må fé!

6. Signeûr,
voste amoûr si displôye al dilongue dès cîrs,
vosse fidélité s'èlîve co pus hô qu'lès nulèyes,

7. Vosse djustice èst l'minme
qui lès hôteûrs dè bon Diu;
vos djudj'mints ou l'grand abîme
c'èst tot fî parèy!
Vos mètez l'ome å si-åhe,
èt po lès bièsses vos 'nnè fé ot'tant!

8. Signeûr:
quéne tchance n's avans
d'aveûr vosse gråce!
Lès èfants dès omes vinèt s'mète a houte
d'vins l'ombe fête par vos éles.

9. Vosse mohone ridoh di tos vos bins,
vos èfants s'ènnè r'pahèt,
li fleûve di vos plêzîrs
lès disseûlèlèye a jamåy!

10. Ad'lé vos èst l'fontinne qui done li vèye,
c'è-st-ès vosse loumîre qui nos riknohans L' Loumîre!

11. Ewalpez d'voste amoûr
lès cis qui v'kinohèt,
fez d'hinde vosse djustice
so lès coûrs qui sont francs!

12. Lès pîds dès håtins
ni m'tripèl'ront nin,
lès mins dès vårins
ni m'bouh'ront nin djus!

13 Loukîz bin tos cès ovrîs dè vûde,
vo-l'zès-la qu's'èscroulèt,
is ont stu tapé djus
èt is n'såront s'ènnè r'lèver!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 37 (Vulgate 36)

Li sôr dè djusse èt dè måva.
1. D'a Dåvid.
Ni t'èstchåfe nin disconte lès måvas,
ni djaloze don nin lès toûrciveûs,

2. ca tot come po lès yèbes,
tot-rade on-z-î mètrè l'få;
is s'fèn'ront turtos
come li foûre a meûs d'awous'.

3. Mèts ti fwè ès bon Diu
èt fês todi l'bin;
seûye li bèrdjî dèl fidélité
tot-z-håbitant l'tére.

4. Gostêye tot plêzîr ès Signeûr,
por twè, il acomplirè lès sohêts di t' coûr.

5. Rimèts ti vôye èl cisse dè bon Diu,
fês lî confiyince èt lu adjirè.

6. Ti djustice potch'rè ås oûys d'a turtos
tot come 'ne fwète loumîre;
ti djudj'mint f'rè cligner lès oûys
come li solo so l'côp d'doze eûre.

7. Rawåde li Signeûr tot n'dihant nole,
por lu årmêye twè d'paciyince;
ni t'èstchåfe nin so l'toûrciveûs,
lu, tot lî rèyussîh tofér.

8. R'nonce a t'colére,
lèye la t'fureûr,
ni t'estchåfe nin insi,
çoula t'monne a må fé!

9. Ca lès måvas sèront tapés foû,
lès paciyens d'å Signeûr èrit'ront dèl tére.

10. Rawåde co on pô
èt i n'årè pus nou rèprové,
ti louk'rè s'plèce
èt i n'sèrè pus la!

11. Lès p'tits åront l'tére po-z-èritèdje,
is djouwiront d'ine påye sins parèye.

12. Li rèprové complotêye conte li djusse,
disconte lu i crine dès dints!

13. Portant l'Signeûr si rèye bin d'lu,
ca i veût-st-aspiter s'djoû.

14. Lès rèprovés sètchèt l'èpèye,
is bind'lèt leû-z-arc,
po bouhî djus l'pôve èt l'pitit,
po-z-ahèssî lès-cis dont l'vôye èst dreûte.

15. L'èpèye èlzî mouss'rè-st-ès coûr,
leûs arcs sèront broyîs!

16. Li p'tite manoye dè djusse vå cint fèyes mî
qui tot l'ôr dès rèprovés.

17. Ca lès brès dès rèprovés sèront broyîs;
nosse Diu chèv' d'aspoya po lès djusses.

18. Nosse Diu k'nohe lès djoûs dès inocints,
leû-z-èritèdje èlzî èst d'né a jamåy.

19. Is n'èdur'ront nole honte ås måvas djoûs,
is sèront r'pahous ås djoûs d'famène.

20. A vrèye, lès rèprovés pèrihèt,
lès innemis d'å Signeûr passèt turtos
come flåwih li fristé d'on pré,
bin vite is ont disparètou
tél dèl foumîre qui l'vint distrût.

21. Li rèprové d'mande a pruster
mins i n'rint måy;
li djusse pardone åhèyemint
èt i done tofér.

22. Li ci qui l'djusse bènih,
ci la èritèye dèl tére;
mins lès-cis qu'sont mådis,
zèls sont tapés foû!

23. Nosse Diu soutint l'avance di l'ome,
i rafèrmih lès djambes
å ci qu'sût l'dreûte vôye;

24. S'i vint minme a toumer
i n'dimon'rè nin ès l'abat'mint
ca nosse Diu lî tint l'min.

25. Dj'a stu djonne,
asteûre dji so pus vî,
mins dji n'a måy vèyou
qu'on lèyîve on djusse su l'costé,
ni qui s'lignèdje
divéve qwèri dè pan!

26. Li djusse prustêye tofér,
il a l'coûr so l'min;
si lignèdje èst bèni!

27. Vins foû dè må,
fês l'bin,
håbite l'ètèrnité!

28. Pace qui l'Signeûr inme li djustice,
i n'lêt nin la lès tchorleûs di s'glwére,
èlzès wåde po tofér èt a jamåy;
mins li s'mince dès dånés sèrè rabatowe.

29. Lès djusses åront l'tére po-z-èritèdje,
i-z-î d'monn'ront po tofér.

30 Li boke dès djusse mûzèye li sûtisté,
si linwe fêt k'nohe li djudj'mint.

31. I pwète so s'coûr li lwè dè bon Diu,
i sût s'vôye bin fwért so sès djambes.

32. Li rèprové è-st-a l'awète dè djusse,
i qwire a l'touwer;

33. Mins nosse Diu l'tint a l'oûy
ca i n'lî a nin d'né l'vèye dè djusse:
li rèprové pout djudjer l'djusse,
nosse Diu n'tint nin compte di s'djudj'mint.

34. Rawåde li Signeûr,
sûs bin s'vôye,
nosse Diu t'èlîv'rè
po t'fé èriter dèl tére;
ti veûrè l'Signeûr
qwand lès rèprovés sèront tapés foû.

35. Dj'a vèyou l'rèprové qu'èsteût plin d'fwèce
èt qui s'disployîve come in'åbe vèrdihant;

36. Il a passé,
èt i n'èst pus!
Djèl qwîre,
èt dj'nèl ritroûve minme pus!

37. Wåde l'inocinse,
asconte li dreûteûre:
ca èlle è-st-ine av'nîr
po l'ome aimant l'påye.

38. Lès måvas sont distrût tos-èssonne,
li fin dès fin dès rèprovés sèrè rabatowe.

39. Li d'lîvrance dès djusses vint dè Signeûr,
il èst leû ç'tadèle å tins dè måleûr.

40. Nosse Diu lès sécourt,
nosse Diu lès rind lîbe,
nosse Diu lès r'sètche
foû dès mins dès rèprovés;
i lès såve ca c'è-st-ès lu
qui v'nèt s'mète a houte!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 38 (Vulgate 37)

Priyîre po qwand on-z-èst må pris.

1. D'a Dåvid. Sov'nance.

2. Signeûr:
Vos èstez bin trop d'monté,
ni m'riprindez nin asteûre,
ni pûnihez nin non pus
ca vosse colére vis aveûle!

3. Vos flèches mi trawèt houte èt houte,
vosse min s'a-st-apèzanti sor mi.

4. Vos v's avez tél'mint-st-èpwèrté
qui m'cwér ni tint pus pèce èssonne;
qwand dj'louke mi pètchî
mès ohês ènnè pièrdèt tote påye.

5. Come lès vågues dèl mér
totes mès lêdeûrs si disrôlèt-st-ès m'tièsse,
èles mi pèzèt so lès rins
tél 'ne tchape di plonk.

6. Dji n'a pus m'tièsse a mi,
mès plåyes sûnèt èt sintèt måva!

7. Dji rote tot ployî,
dji so språtchî dès pîs al tièsse;
dji rote al dilongue dè djoû
tot-z-èstant d'grigneûse oumeûr.

8. Ca mès boyès s'rimplihèt d'feû,
dji n'a pus rin d'ètîr ès m'cwér.

9. Dji m'sin vûdî,
dji so tot broyî dès pîds al tièsse,
i fåt qu'dji rudjih
tél'mint m'coûr bate à l'arèdje.

10. Signeûr,
tot mi d'zîr è-st-ad'lé vos,
dji n'vis catche nin m'sopîr.

11. Mi coûr bouhe a grands côps,
mès fwèces m'abann'nèt,
dji n'veû clér foû d'mès oûys,
is n'volèt pus m'chèrvi!

12. Mès camarådes èt lès cis qui m'inmèt
n'ènnè riv'nèt nin,
is d'monet so plèce tot vèyant mès mås,
minme mès près parints qui n'm'aprochèt pus!

13. Enn'a-st-a l'awète di mi-åme
qui m'trak'nèt sins r'låke;
dès pîlås po m'måleûr djåzèt di rwènes,
dès djoûs ètîr is sont d'vins dès complots.

14. Es mi:
come on soûrdô dji n'ètind nin,
come on mouwê dj'a l'boke cozowe.

15. Dji so come l'ome qui n'ètind pus
èt qu'n'a måy li bone rèsponse.

16. Ca dji m'atind a vosse vinowe, Signeûr,
vos m'Diu, c'èst vos qui m'acont'rez.

17. Et dj'a dit:
"Qué måleûr,
is vont co s'rafiyî a cåse di mi,
dês qu'dji sèrè toumé,
is vont s'èmonter conte mi."

18. Et dji so prèt po l'måleûr,
mi doleûr èst todi ad'lé mi.

19. Dji k'fèsse qui dj'n'a nin stu todi djusse,
dji so toûrmèté a cåse di m'pètchî.

20. Mès innemis ènnè volèt-st-a m'pê,
mès hayåves crèhèt-st-èl mint'rèye.

21. Is m'rindèt l'må po totes mès bontés,
is m'kitchèssèt tofér pace qui dj'qwîre li bin.

22. Ni m'abann'nez nin Signeûr nosse Diu,
n'ènn'alez nin lon èrî d'mi!

23. Dispètchîz-v' dè v'ni a m'sécoûrs
vos, l'Diu qui dilîvrêye!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 39 (Vulgate 38)

Divant s'Diu, l'ome n'èst rin.

1. A mêsse dè keûr, a Idithoun.
On tchant d'a Dåvid.

2. Dji m'dihéve ès mi-minme:
"Dji m'va wårder mès vôyes
insi m'linwe ni s'pièdrè nin;
tant qu'li rèprouvé s'drèsserè conte di mi
dji mètrè on bandô so m'boke."

3. Dj'a d'monou moûwê,
dj'a d'monou sins djåzer,
mins èstant d'hèssî d'tos mès bins
mi doleûr mi fêt piède li tièsse.

4. Mi coûr blame ès m'pwètrène,
dj'a dès målès îdèyes èl tièsse,
on feû broûle tot m'cwér,
adon m'linwe si mète a djåzer.

5. Signeûr,
lèyîz-m' vèyî k'mint finirè m'vèye,
rac'sèglîz-m' so l'durêye di mès djoûs,
insi dj'sårè 'ne fèye po tote
qui m'vicårèye sèrè vite oute.

6. Vochal:
c'èst d'in'aspagne
qui v's avez fêt l'totålité d'mès djoûs,
a costé dèl vosse
li durêye di m'vèye ni våt nin tripète,
l'ome qui s'drèsse
èst tot ètîr fêt d'glôriyole.

7. Awè, l'ome rote come in'ombe,
awè, l'ome si r'mowe al vûde,
i mète è crèsse
sins saveûr quî lî rascôyrè tot!

8. Et asteûre, quî pou-dju rawåde?
Signeûr, mi-èspwér c'èst Vos!

9. Disgadjîz-m' di tos mès pètchîs!
Ni m'lèyîz nin mi r'ployî so mi-minme
adon qu'on m'prid po-z-on d'mèy sot!

10. Mouwê, dji n'droûve nin l'boke
ca c'èst vos qu'adjihez por mi!

11. Signeûr, ni bouhîz pus sor mi,
dji m'va mori si vosse min m'ataque co!

12. Vos amindez l'ome a cåse di s'fåte,
èt come 'ne sitofe magnèye dès motes,
vos lî distrûhez s'bêté;
awè, tot ome èst glôriyole!

13. Etindez m'priyîre,
Signeûr, hoûtez m'cri,
loukîz totes mès låmes
èt n'dimonez nin soûrdô;
ad'lé vos dji n'so qu'in' ètrindjîr,
come mès péres dji n'fêt qui d'passer!

14. Distoûrhez d'mi vosse vizèdje
qui dji m'rapåftèye 'ne miyète,
divant qu'dj'ènnè våye
èt qu'dji n'seûye pus!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 40 (Vulgate 39)

Tchant po rinde gråce èt po brêre a sécoûrs.

1. A mêsse dè tchant. D'a Dåvid. On tchant.

2. Dj'èspéréve li Signeûr,
dji n'vikéve pus qu'd'èspwér!
Li bon Diu s'a clintchî sor mi,
èt I m'a oyou brêre!

3. I m'a fêt griper foû dè pus
wice qu'on î piède si vèye.
I m'sètche foû dè broûli,
foû d'on clapant sankis'.
Il a mètou mès pîds so rotche,
i rafèrmih mi-avance.

4. So mès lèpes in fêt m'ni on noû tchant,
mins ossi l'louwange po nosse Diu.
Is sèront top plin al vèyî èt a'nnè fruzî,
èt is åront fwè ès nosse Diu.

5. Qu'il è-st-ureûs:
l'ome qui mète si-èspwér ès Signeûr,
l'ome qui n'sût nin l'minteûr, ni l'grandiveûs!

6. Signeûr nosse Diu,
po nos-ôtes vos avez fêt saqwantès mèrvèyes,
lès tûzèdjes di vosse coûr
sont por nos, mèyeûs onk qui l'ôte;
dji racont'reûs, dji djåz'reûs:
mins èles sont trop fwètes po-z-èsse dites!

7. Lès sacrifices ni v'dihèt rin,
vos n'djèrîz après nole ofrande;
Vos m'avez graw'té ès mi-orèye,
èt asteûre dj'ô bin clér:
vos n'dimandez nin dès cråssès ofrandes,
vos n'volez nin qui n'payansse nos twérts;

8. Adon dj'a dit:
"Vo-m-chal avou l'påtch'min dè live
qu'a-stu s'crit por mi."

9. Çou qu'dji vou, nosse Diu,
c'èst fé vosse bon voulwér,
ca vosse lwè è-st-ès mi,
èle mi tind åx boyès.

10. Dji fê sèpi vosse djustice
qwand n's èstans turtos èssonne,
por Vos dj'a dès frankès lèpes,
èt vos l'savez bin, Signeûr!

11. Dji n'rafûle nin voss djustice
å pus parfond di m'coûr;
dji fê sèpi voste-amoûr,
dji fê k'nohe vosse dilîvrance,
qwand n'sèstans tos-èssonne
dji n'catche mi vosse gråce, ni vosse vrêye.

12. Signeûr, fez qu'po nos-ôtes,
vosse mizéricôr ni seûye nin èlahèye!
Fez ossi Signeûr,
qui vosse gråce èt vosse vrêye nos wårdèsse po tofér.

13. Totès sôrs di mås m'èwalpèt dès pîds al tièsse,
dji n'arive pus a 'nnè fé l'compte.
Mès pètchîs abrokèt-st-après mi,
èt dji n'pou vor'mint pus lès vèyî,
ènn'a bêcôp pus qu'dès dj'vès so m'tièsse,
dj'a l'coûr qui s'piède!

14. Si vos l'volîz, Signeûr,
vos m'sètch'rîz foû d'mès mèhins,
Signeûr, dispètchîz-v'
dè m'ni a m'sécoûrs!

15. Is sèront r'fêts turtos,
ènnè rodjiront tos-èssonne,
tos cès-la qui t'nèt mi-åme a l'awète
avou li d'zîr dèl piède po tofér;
vos alez lès r'sètchîz èn-èrî
èt v's alez lès coviért di honte;
a tos cès-la qui volèt m'måleûr
vos mètez leûs måvas d'zîrs å grand djoû.

16. Is sèront tot èstoumaké d'leû honte,
zèls qui brêyît-st-après mi: "Hê la hê!"

17. Is s'rafèy'ront tot
èt is sèront-st-èl djôye
tos lès-cis qui v'riqwèrèt,
èt qu'inmèt vosse dilîvrance;
sins r'låke is d'hèt:
"Nosse Diu èst l'pus grand!"

18. Dji n'so qu'on pôve, qu'on mizèråbe,
èt l'Signeûr tûze co a mi!
Vos qu'èstez m'sécoûrs èt m'dilîvrance,
vos nosse Diu, abèy, ni tårdez pus!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 41 (Vulgate 40)

Priyîre d'on malåde qu'è-st-abann'né.

1. A mêsse dè tchant. Tchant d'a Dåvid.

2. Qu'il è-st-ureûs ci qu'èst camaråde dè pôve,
li Signeûr vint l'såver å djoû di s'måleûr!

3. Nosse Diu el wåde ,
lî done li vèye,
i lî done on grand boneûr so l'tére,
nès lîvrant nin å pouvwér di sès innemis.

4. Qwand i soufe, ståré so s'lét,
nosse Diu el soutint;
Vos lî avez tot candjî s'lét d'mwért
adon qu'l'èsteût prèt à mori.

5. Et mi dj'a dit:
"Fez-m' gråce, Signeûr,
r'wèrihez mi-åme
ca dja pètchî disconte vos."

6. Inte di-zèls, mès innemis s'dihèt
qui dji so-st-å pus må;
"Qwand va-t-i mori" d'hèt-is,
"qu'on n'djåze pus di s'nom?"

7. Si l'innemi vint po vèyî,
si coûr ni mosteûre qui l'minte;
i rascoye çou qui n'èst nin,
adon va k'djåzer so l'pavèye!

8. Tos èssonne,
lès hayåves sussinèt disconte mi,
is sayèt dè s'fé 'ne îdèye di m'måleûr:

9. "On lî a tapé on måva sôrt" d'hèt-is
" is s'a coûkî po n'pus s'rilèver!"

10. Minme l'ome qui tûzéve conte mi,
dji lî åreûs raconté tote mi vèye,
lu qui magnîve di m'pan,
il a lèvé s'talon disconte mi.

11. Mins vos, Signeûr, fez-m' gråce,
rimètez-m' so pîds èt dj'èlzès påyerè.

12. Mågré sès målès îdèyes,
mi-innemi n'a polou m'fé twért,
c'è-st-a çoula qu'dji veû
qui vos d'zîrs sont sor mi.

13. Vos m'avez sot'nou
pwice qui dj'èsteûs-st-inocint,
asteûre èt a jamåy
vos alez m'èlèver ad'lé vosse vizèdje.

14. Qui l'Signeûr seûye bèni,
lu l'Diu d'Israël
po lès sièkes a jamåy
åmen, åmen.

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 42 (Vulgate 41) Deux versions.

Tchant d'on clêr qu'aveût l'må dè pays po l'bon Diu èt po s'mohone.

1. A mêsse dè tchant, tûzèdje, dès fis d'a Corah.

2. Comme li ciér brêt so lès-êwes
qui d'hindèt-st-al valêye,
mi-åme brêt-st-après vos
Signeûr nosse Diu.

variante 2. Mi-åme si lanwih dè bon Diu
come li bihe lanwih après dèl fris'êwe.

3. Mi-åme a seû dè Signeûr,
li Diu qu'èst l'vèye!
Qwand porè-dj'èl discoviért?
Qwand porè-dj' loukî s'vizèdje?

4. Di djoû come di nut'
mès låmes sont m'seûl amagnî,
pôr qui tote-djoû on m'dimande:
"Wice è-st-i don vosse Diu?"

5. Dji m'ènnè sovin come si c'èsteût d'îr,
mi-åme mi rimplih di sov'nance:
dji r'tûze qui tos èssonne avou lès djins
nos 'nn'alîs è porcèssion disqu'a l'mohone dè Signeûr
avou dès cris d'djôye èt d'louwandje,
avou l'ofrande d'on peûpe qu'èsteût-st-ès fièsse.

6. Qué novèle, mi-åme, on flåwih?
Qwè, v'la qu'on djèmih asteûre?
Mète ti fwè ès Signeûr,
djèl low'rè co d'tot m'coûr!
Quéne dilîvrance po turtos
li djoû qu'nos louk'rans s'vizèdje!

7. Dj'ènn'a m'sô, Signeûr,
mi-åme è-st-abatowe!
C'èst poqwè dj'tûze a vos
dispôy li payîs dè Jourdain,
dji tûze a vos dès hôteûrs di l'Hermon
dispôy li hôteûr di Mitsar.

8. L'abîme brêt vè l'abîme
divins l'arèdje di vos chutes d'êwe,
voste-êwe m'arive a flots,
totes lès vågues si d'rôlèt sor mi!

9. Tote-oute dèl djoûrnêye
li Signeûr mi k'dût a l'êde di s'gråce,
l'al nut' li tchant di si-Esprit m'èwalpèye,
c'èst m'priyîre å Diu qu'èst tote mi vèye!

10. Nosse Diu èst m'rotche èt dj'lî di:
"Poqwè m'avez-v' roûvî,
Poqwè deûs-dj' roter acåblé, abatou
dzos l'hårkê d'mès innemis? "

11. Cès måvas coûrs m'ont måltrêtî,
dj'ènn'a lès ohês tout moudri!
Tote-djoû is m'fêt dès r'proches:
"Wice don èst passé t'Diu?"

12. Qué novèle mi-åme, on flåwih?
Qwè, v'la qu'on djèmih asteûre?
Mète ti fwè ès Signeûr,
ca djèl low'rè d'tot m'coûr,
Lu qu'nos dilîvrèye tofér,
Lu qu'èst nosse Diu!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 43 (Vulgate 42)

Tchant d'on clêr qu'aveût l'må dè payîs po l'bon Diu èt po s'mohone.

1 Djudjez-m' Signeûr,
bataliez ès m'bataye
disconte on peûpe di sins amoûr!
Disgadjîz-m' dès toûrciveûs èt dès ovrîs dè må!

2. Ca, Vos qu'èst l'Diu di m'fwèce,
poqwè m'avez-v' lèyî la?
Poqwè deûs-dj' roter acåblé, abatou
d'zos l'hårkê d'mès innemis?

3. Evoyîz-m' vosse loumîre èt vosse vrêye
qu'èles mi chèrvèsse di guide;
èles mi f'ront-st-ariver al hôteûr di v'sint'té,
dj'årè l'intrèye di vos mohones.

4. Dj'ariv'rè-st-insi d'vant l'åté dè Signeûr,
qui l'djôye di m'coûr monte ad'lé vos,
dji v'fê fièsse so m'guitåre,
a vos nosse Signeûr èt nosse Diu!

5. Qué novèle mi-åme, on flåwih?
Qwè, v'la qu'on djèmih asteûre?
Mète ti fwè ès Signeûr
ca djèl low'rè co d'tot m'coûr,
Lu qu'nos dilîvrèye tofér,
Lu qu'èst nosse Diu!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 44 (Vulgate 43) Deux versions.

Qwand on-z-a stu batou!

1. A mêsse dè tchant, dès fis d'a Corah.
Tûzerèye.

2. (tchant al glwère dès tèmwègnèdjes dèl fwèce di Diu dè tins d'nos péres.)
Jahvé:
nos l'avans-st-ètindou
di nos prôprès orèyes,
nos péres racontît co vol'tî
vos hôts fêts di d'vins l'tins,
tot çou qui v's avez-st-arindjî,
ès leû tins, a vos tot seû!

3. Di vosse min:
Po poleur èlzî d'ner on payîs,
vos avez tchèssî foû dès nåcions,
po qu'is s'sitindèsse pus long,
vos avez spiyî dès peûpes.

4. Chète, ci n'èst nin leûs èpèyes
qu'èlz'ont rindou mêsse dè payîs,
ni l'fwèce di leû brès'
qu'èlzî a d'né l'victwère:
mins c'èst vosse brès', vosse dreûte
èt loumîre di vosse vizèdje,
pace qui vos lès inmîz!

(cinfiyince ès Diu-Rwè)
5. vos èstez mi rwè, Jahvé,
k'mandez l'salut po Djåcob.

6. Avou vos,
nos boutans foû nos innemis,
ès vosse nom,
nos tripèl'rans nos atakants.

7. Dji n'vou nin m'fiyî a m'arc,
mi èpèye ni såreût nin m'såver.

8. Ca c'èst vos:
qui nos sètche foû dès mins
dès cis qu'nos acåblèt,
qu'èlzî mète li rodje å front
a tos cès-la qu'nos ènnè volèt.

9. Avou Jahvé, nos avans todi avou li d'zeûr,
ossi nos fièstèy'rans vosse nom a jamåy.

(riprotches a Jahvé, a cåse dès mizères intrit'nowes pa l'innemi.

10. Mins vos nos abann'nez!
nos 'nn'èstans tot pièrdou.
Vos n'èstez pus måy
al tièsse di nos årmèyes.

11. Vos nos fez cori èvôye po d'vant l'innemi,
èt zèls polèt sins r'mwérs
nos disploum'ter a plêzîr!

12. Vos nos minez tot dreût åx abatwèrs
come on tropê d'bèrbis.
Vos nos avez k'sèmés
avå totes lès nåcions.

13. Po on rin v's avez vindou vosse peûpe,
èt on n'porè vormint dire
qui çoula v's a-st-aritchi!

14. A cåse di vos,
nos vwèzins nos trêtèt d'tos lès noms,
tot åtou d'chal, is-z-ont si bon
dè rire èt di si moker d'nos-ôtes.

15. Ca nos èstans dim'nou l'fåve
di totes lès nåcions,
turtot hossèt l'tièsse
tot djåzant d'vosse peûpe.

16. Nos n'avans pupont d'oneûr
èt dji n'a pus l'gos' dè viker,
tot-oute dè djoû
dj'ènn'a l'rodje a front;

17. dj'ènn'a m'so d'ètinde lès lêdes,
d'ètinde djurer l'nom dè bon Diu.
Ca nos innemis,
lès-cis qu'volèt nosse mwért,
sont la a brêre
tot djusse divant.

(proûve d'ènocince)
18. Nos avans-st-avu tant dès måleûrs:
èt portant,
nos n'vis avîs nin roûvî,
voste aliyance,
nos l'avans todi obsèrvé.

19. Nosse coûr ni s'a pont r'pris,
nos avans todi sûvou l'dreûte vôye!

20. Qwand vos nos avez broyîs
wice qui lès monses dimonèt,
rafûlés èl neûtristé dèl mwért.

21. Si co n's avîs roûvî l'nom d'a Jahvé,
si n's avîs tindou lès brès vè dès såvadjès dius!

22. Mins, arîs-n's polou fé tout çoula
sins qu'Jahvé nèl veûse,
lu qui k'noh tos lès sècrèts d'nosse coûr!

23. Al vrèye, c'è-st-a cåse di vos
qu'on nos ahorêye tos lès djoûs,
qu'on nos prind tofér
po dès bièsses tot djusse bonnes po-z-abate!

(priyîre po-z-avu dè s'coûrs)
24. Dispièrtez-v'!
Poqwè dwèrmez-v', vos l'pus fwért?
Dispièrtez-v'!
Ni nos abann'nez nin a jamåy!

25. Poqwè catchî vosse vizèdje,
roûvî nosse mizére, nosse acåblèmint?

26. Ca noste åme èst todi avå lès cwårs,
nos èstans coûkî al tére!

17. Abèye,
vinez a nosse sècoûrs!
Ratch'tez-nos bin vite
a cåse di voste amoûr!

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 44 (Vulgate 43).

Qwand on-z-a stu batou!

1. A mêsse dè tchant, dès fis d'a Corah, tûzèdje..

2.Signeûr:
li hôt fêt di d'vins l'tins,
qui v's avez fêt ås djoûs d'nos péres,
nos l'avans-st-oyou d'nos orèyes,
tél'mint èls racontît sovint!

3. Di vosse min:
Po 'lzî fé prinde rècène ès payîs,
vos 'nn'avez dispouyé dès peûpes,
po 'lzî fé dès plèce avår-la
vos avez broyî, fêt disparèt dès nåcions.

4. Mins c' n'èst nin l'bètchète di leû-z-èpèyes
qu'èlzî a d'né cisse tére la po-zèritèdje,
leû brès' ni polève lès såver;
mins c'èst vosse dreûte, c'èst vosse brès',
c'èst l'loumîre di vosse vizèdje,
pace qui vos lès inmîz!

5. Signeûr, c'èst vos qu'èst nosse rwè,
k'mandez don l'dilîvrance po Djåcob.

6. Avou vos,
nos bout'rans foû nos innemis,
par vosse Nom,
nos tripèl'rans nos atakants.

7. Dji n'vou nin m'fiyî a mi-årc po gangnî,
ci n'èst pus mi-èpèye qui m'såv'rè,

8. ca vos nos d'lîvrez d'cès la
qui nos t'nèt a gogne,
vos f'rez rodjî d'honte tos lès hayåves.

9. Avou nosse Diu,
c'èst nos-ôtes lès pus fwérts,
ossi a tot jamåy,
nos f'rans fièsse ès l'oneûr di vosse nom.

10. Mins vos nos abann'nez!
Vos nos coviez d'honte!
Vos n'vinez måy pus
al tièsse di nos årmèyes.

11. Vos nos fez cori èvôye po d'vant l'innemi,
nos hayåves nos disploumtèt a plêzîr!

12. Vos nos lîvrez come on tropê
djusse bon po l'tchår di bouch'rèye,
vos nos avez k'sèmés avå totes lès nåcions.

13. Vos avez vindou vosse peûpe po on rin,
mins po s'pris la,
vos n'î årez nin fêt vosse boûre!

14. Vos fez d'nos l'honte di nos vwèzins,
èt lès djins d'chal åtou n'arèstèt pus
dè rire èt di si moker d'nos-ôtes.

15. Nos èstans dim'nous l'fåve dès nåcions,
tot djåzant d'nos, lès djins hossèt l'tièsse.

16. Dj'ènn'a m'sô,
dè viker-st-insi al longue dè djoûs,
dji so tot rodje d'ènn'èsse djinné,

17. ca i nos fåt co hoûter cès-la so li d'vant
qui nos lès d'hèt totes,
noste-innemi, li r'vindjeû, a si bon
d'nos taper a rin!

18. V'la don k'mint n's èstans-st-arindjîs,
èt portant el fåt bin dire:
nos n'vis avîs nin roûvîs,
nos n'avîs nin trayî voste aliyance.

19. Nosse coûr n'a nin bizé èvôye po d'vant vos,
nosse rotèdje n'a nin tchèri foû d'vosse vôye!

20. Qwand vos nos avez broyîs ad'lé lès monses,
qwand vos nos avez rafûlés dèl neûtristé dèl mwért,

21. si n's avîs roûvî vosse sint Nom,
si n's avîs tindou lès brès après on såvadje diu,

22. nosse Diu l'åreût sûr'mint awêtî,
Lu qui k'noh lès pus p'titès cwènes dès coûrs!

23. C'èst por vos qui n's èstans k'hatchîs sins r'la,
qu'on nos trête comme po l'abatwér!

24. Dispièrtez-v'! Poqwè dwèrmez-v' Signeûr?
Dispièrtez-v'! Ni nos lèyîz nin la po tofér!

25. Poqwè catchî vosse vizèdje?
Poqwè roûvî nos mizéres,
èt l'tchèdje qui n's avans so lès rins?

26. Awè, noste åme trinne èl poussîre,
nos èstans stårès l'vinte al tére!

17. Abèye,di tote vosse hoteûr, vinez a nosse sècoûrs!
Ratch'tez-nos bin vite a cåse di voste amoûr!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 45 (Vulgate 44)

Rîmê ofrou å rwè dè bon Diu èt a s'feume li djoû d'leû nôce.

1. A mêsse dè tchant, dès fis d'a Corah, tûzèdje,
Tchant dès amoûrs.

2. Li coûr mi bouhe a grands côps
tot d'bwèrdant d'on doûs mèssèdje,
dji dèclamèye mi rîmê d'vant li rwè,
mi linwe èst l'pène d'in-adrèt grèfî.

(Po li rwè galant:)
3. Dis tos lès èfants dès-omes,
c'èst vos l'pus bê!
Li gråce florih a jamåy so vos lèpes,
ossi l'bon Diu v's a bèni po tofér.

4. Cinglez voste-èpèye so vos hantches,
corèdjeûs guèrî,
cinglez-v' ossi d'vosse glwère
èt d'voste-oneûr!

5. En-avant ès l'oneûr!
Avou l'fwèce dèl vèrité, alez, tchèrîz,
lèyîz-v' pwèrter par li p'titèsse èt l'djustice;
vosse dreûte vis f'rè fé dès hôts fêts.

6. Dès peûpes s'abatèt d'zos vos côps,
vos flèches hagnèt bin,
èles trawèt oute èt oute
li coûr dès inemis dè rwè.

7. Vosse trône, Signeûr nosse Diu,
èst po tofér èt a jamåy,
li bordon d'vosse rwèyôme
è-st-on bordon d'dreûteûr.

8. Vis inmez l'djustice èt hèyez l'dånåcion,
èt c'èst poqwè l'Signeûr vosse Diu
vis a ondou avou in'ôle di djôye
å mitan d'tos vos k'pagnons.

9. Totès sôrs di bonès odeûrs
montèt foû d'vos mouss'mints.
On fêt dèl muzike d'vins dès palås fêt d'ivwére,
èt vos 'nn'èstez tot binåhe.

10. Lès fèyes dès rwès
sont-st-avå vos binamèyes;
Li Dame si mosteûre a vosse dreûte,
èlle a mètou totes sès-ôrerèyes.

(Po l'crapôde dè Rwè)
11. Houtez m'fèye, loukîz bin,
droviez tot grand vos deûs orèyes:
"Roûvîz vosse peûpe,
roûvîz l'mohone d'a vosse popa,

12. li rwè djèrèye so vosse bêté
ca c'èst lu vosse Signeûr:
adon stindéve al tére divant lu
po mostrer vosse rèspèt.

13. Lès foû-ritches dè peûpe,
minme li fèye di Tyr,
vont v'fé totès sôrs di cadôs
po-z-èsse bin vèyou d'vos!

14. Li fèye dè rwè èst rèssèrèye,
mins èlle èst tote glorieûse
d'vins totes lès ôrerèyes
don s'cote è-st-ôrnêye!

15. Tote moussèye di dintèles
èlle è-st-ofrowe å Rwè,
sès camarådes si mètèt-st-al cowèye
po v'ni, todi vièrjes, disqu'a vos.

16. Eles sont-st-ofrowes èl djôye,
èt c'èst tot fant fièsse
qu'èlles arivèt-st-å palå dè Rwè!

17. Vos fis prindront l'plèce di vos péres,
vos 'nnè f'rez dès princes so tote li tére.

18. Dji f'rè k'nohe vosse nom
po tos lès siékes a m'ni,
insi tos lès peûpes vis low'ront
po tofér èt a jamåy.

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 46 (Vulgate 45)

Li bon Diu è-st-avou nos-ôtes!

1. A mêsse dè tchant, dès fis d'a Corah, po l'keûr, tchant.

2. Nos èstans a houte ès Signeûr,
il èst nosse fwèce,
nosse sécoûrs d'vins lès rabrouf'tèdjes:
il èst todi la!

3. C'èst poqwè nos n'årîs nole sogne
minme si l'tére rivièrséve,
minme si lès hôteûrs èstît ravalèyes
d'vins dès grandès-êwes!

4. Lès êwes porît rudji, si d'rôler,
si spiyî tot minant d'l'arèdje,
lès hôteûrs porît tronner, halcoter...:
nosse fwè è-st-ès Signeûr!

5. On fleûve èt sès canåls fêt tot l'boneûr
dèl vèye d'å bon Diu,

6. Nosse Diu î d'm'meûre ès plin mitan,
ossi èle ni halcotèye måy,
Nosse Diu lî pwète todi sécoûrs
tot timpe å matin.

7. Lès peûpes si mouwèt tot,
lès rwèyômes si låkèt,
li Signeûr fêt rèsdondi s'vwès,
li tére ènnè halcotèye.

8. Li Signeûr nosse Diu è-st-avou nos ôtes
li Diu d'a Djåcob èst nosse citadèle.

9. Vinez vite veûy lès hôts fêts d'å Signeûr,
i n'lêt qu'dès rwènes avå tote li tére!

10. Il arèstèye lès guéres disqu'å coron dèl tére,
i spèye l'arc,
i fêt-st-on fouwå avou lès tchèrètes,
i broye li lance!

11. Arèstez!
Sèpez qu'dji so vosse Diu,
dji so-st-al-copète di tos lès peûpes,
dji so-st-al copète dèl tére!

12. Li Signeûr nosse Diu è-st-avou nos-ôtes,
li Diu d'a Djåcob èst nosse citadèle!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 47 (Vulgate 46)

Nosse Diu èst Rwè d'Israël èt dèl tére ètîre.

1. A mêsse dè tchant, dès fis d'a Corah, tchant.

2. Po vosse Diu,
vos-ôtes tos lès peûpes,
batez don dès mins,
èsclatez d'vins dès tchants d'djôye!

3. Li Signeûr, li pus hôt, li tèribe,
èst l'grand Rwè d'tote li tére,

4. I plôye lès peûpes d'zos nosse hårkê,
i mète lès nåcions d'zos nos pîds!

5. Po nos-ôtes,
i tchûzih noste-èritèdje:
on grand sclat d'oneûr èt d'glwère
po Djåcob qu'il inme.

6. Nosse Diu s'èlîve å son dèl fanfåre,
nosse Diu monte ès brut
dès son'rèyes di trompètes!

7. Tchantez Diu,
tchantez-l'!
Tchantez vosse rwè,
tchantez-l'!

8. Ca li Rwè d'tote li tére:
c'èst nosse Diu!
Tchantez don l'tchant
qui v's aprind nosse Diu!

9. Nosse Signeûr ringne so tos lès peûpes,
i sîdje so l'trône di s'sint'té!

10. Lès nôbes dès peûpes si rassonnèt
po s'ûni å peûpe dè Diu d'Abraham,
ca lès pwissances dès rwès sont-st-a Diu!
Co cint fèyes, il èst louwè èt conté!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 48 (Vulgate 47)

Sion, hôteûr dè bon Diu!

1. Tchant, priyîre dès fis d'a Corah.

2. Li Signeûr èst grand,
dègne d'oneûr èt d'glwére
ès l'vèye d'a nosse Diu
so l'hôteûr di s'sint'té.

3. Li vûzion èst d'ine bêté sins parèye,
c'ènn'è-st-ine fièsse po l'tére ètîre,
ca Sion, li hôteûr mistèrieûse dè nôrd
èst l'vèye dè grand rwè.

4. Nosse Diu èst la, d'vins sès tchèstês,
i s'î fêt k'nohe come "li ç'tadèle".

5. Ca vochal li clike dès rwès qui s'amonne,
èssonne, is wèzèt s'disployî tot åtou,
is contèt n'ènnè fé qu'ine bètchèye!

6. Mins leûs prôprès oûys ont vèyou,
ènn'ont stu tot foû d'zèls,
çoula 'lzî a k'mahî lès îdèyes,
al vole is volît cori èvôye!

7. So plèce, on tronnèdje lès a-st-apici,
is s'racrampi come 'ne acoûkèye!

8. Di l'ôriant vos fîz tchèssî dès toûbions d'vint
po s'piyî lès batês qui v'nît d'Tarsis.

9. Sovint nos avîs-st-oyou contér vos hôts-fêts,
s'côp chal nos v'lès avans vèyou fé,
èl vèye dè Signeûr dès årmèyes,
èl vèye d'a Nosse Diu;
Qui l'Signeûr l'afèrmih a jamåy!

10. Nos ratûzans a voste-amoûr, Signeûr,
å-d'vins dèl mohone di v'sint'té.

11. Tél èst vosse nom, Signeûr,
tél èst vosse louwanje,
disqu'å coron dèl tére;
vosse dreûte èst tote plinte di djustice!

12. Li hôteûr di Sion è-st-èl fièsse,
lès crapôdes d'a Djudas potchèt d'jôye
a cåse di tos vos djudj'mints.

13. Fez l'toûr di Sion,
sûvez 'nnè sès murayes,
comptez 'nnè sès torètes,

14. pwèrtez ès vosse coûr totes sès fôrtificåcions,
loukîz avou plêzîr sès tchèstês,
po poleûr èl raconter
åx jènèråcions di d'min!

15. Vochal li Signeûr nosse Diu,
Il èst po tofér èt a jamåy,
lu-minme nos monne oute dèl mwért!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 49 (Vulgate 48)

Li "rin du tout" dès ritchèsses po d'vant l'mwért.

1. A mêsse dè tchant, dès fis d'a Corah, tchant.

2. Oyez çouchal, vos turtos,
vos tos lès peûpes,
hoûtez don,
vos qui peûplez l'tins;

3. Oyez çouchal
vos lès p'titès djins,
vos lès parvinous dèl tére,
ritches èt pôves tos èssonne!

4. Mi boke f'rè sèpi l'sûtisté,
li tûzèdje di m'coûr
djudje dè bin èt dè må!

5. Dji tind mi-orèye vè quéquès spots,
èt c'èst tot tchantant 'ne pitite êr
qui dj'veû clér ès mi-ad'vina.

6. Vo-l'-chal:
Poqwè fruzi qwand vint l'måleûr,
qwand dji m'sin rafûlé
d'zos l'måle fwèce dès toûrciveûs?

7. Zèls mètèt leû-z-èspwér
d'vins tos leûs aveûrs!
Zèls si complumintèt
pace qui sont foû ritches!

8. Nouk ni porè jamåy ratch'ter s'fré,
néni,
on n'pour d'ner å bon Diu
s'prôpe ratch'tèdje!

9. Li ratch'tèdje di s'vèye cosse bêcôp trop tchîr
po poleûr si payî s'plèce po l'êtèrnité,

10. ès lisquéne on porsûreût todi s'vicårèye
sins måy ariver a l'årtike dèl mwért!

11. Chète, on l'veût tos lès djoûs:
lès sûtis morèt,
mins l'reû-sot èt li lwègne pèrihèt-st-ossi
lèyant å réz tos leûs êdants!

12. Es leû coûr,
èlzî sonnèt qu'leûs mohones sont po tofér,
is tûzèt qu'leûs batihèdje èst fêt a jamåy,
n'ont-is nin loyî leû nom a leû tére!

13. Mins ès s'grandeûr,
l'ome ni sé t'ni l'côp,
i n'våt nin mî
qui l'bièsse qu'on-z-abat'!

14. Tél èst l'vôye di tos cès-la
qui n'si fiyèt qu'a zèls-minme;
podrî zèls, å son d'leû vwès
on-z-acoûrt po lès-z-ètinde!

15. Come 'ne trope ènnè vont vè l'infér,
li mwért èst leû bèrdjî;
Tot timpe å matin
lès djusses lès mêstrihèt;
leû cwér n'èst pus qu'ire rwène,
l'infér èst leû d'morance.

16. Awè,
nosse Diu ratch'tèye mi-åme,
i m'prind ad'lé lu,
i n'mi lêt nin po l'infér.

17. Ni v's èwarez nin, d'monez påhûle,
si dès cis qu'i-n-a div'nèt foû ritche,
si glwère di leû mohone
si ståre tot avå!

18. Ca l'djoû di s'mwért,
ènn'irè lès mins vûdes,
sès ritchèsses èt tote si glwére
ni sårît l'sûre wice qui va!

19. Ca mågré qu'ès s'vèye i s'complumintéve,
mågré qu'on l'louwéve d'èsse florihant,

20. i irè r'djonde li lignèdje di sès péres:
is n'veûront måy li loumîre!

21. Mins ès s'grandeûr,
l'ome n'a nole consyince,
i n'våt nin mî
qui l'bièsse qu'on-z-abat'!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 50 (Vulgate 49) Deux versions.

Li vrèye vènèråcion po Jahvé.

1 On tchant d'a Asaph.
(Jahvé acuzêye si peûpe!)
Jahvé,
li Signeûr nosse Diu, djåze,
i houke tote li tére,
dispôy la qu'li solo s'èlîve,
disqu'a wice qui va djus.

2. Bêté sins parèye
come on 'nn'a co måy vèyou,
d'å-d'zeûr di Sion
Jahvé lût come cint-mèyes solo.

3. Jahvé nosse Diu vint,
èt i n'såreût nin s'têre.
On violant feû
broûle tot po d'vant lu,
tot fant qu'tot åtou
s'ènonte on såvadje tins:
neûrès nûlèyes, toûbions d'vint,
tonîre rôlant vå lès cîrs,
neûrité èt côps d'aloumîre!

4. Dès hôtès vôsseûres
Jahvé houke li tére èt lès cîrs,
I va djudjî s'peûpe.

5. Rassonlez por mi
tos mès mès binamés,
lès cis qu'ont plonkî mi aliyance
avou leû sacrifices.

6. Lès cîrs fêt sèpi s'djustice,
ca nosse Diu èst l'seûl djudje!

(Prumîre acuzåcion: sacrifices d'ofrande må compris!)
7. Houte bin m'peûpe,
dji m'va djåzer;
Israël, mi, Jahvé vosse Diu,
dji tèmwègn'rè disconte di twè.

8. Si n'èst nin a cåse di tès sacrifices
qui dj'èmantchèye on procès avou twè.
Dj'a tès ofrandes tofér po d'vant lès oûys.

9. Nèni, dji n'prindrè nin:
ni l'torê di t'mohone,
ni l'bouc di t'bèrdjirèye,

10. ca totes lès bièsses dès grands bwès
sont d'a meune,
totes lès cisses so lès montagnes,
dès mèyes, d'a meune!

11. Dji k'noh chaskeun' dès oûhès dès hôteurs,
èl djibî dès tchamps èst co d'a meune!

12. Si dj'aveûs håsse di magnî,
tèl direûs-dj'?
adon qu'por mi dj'a l'monde ètîr,
avou tot çou qui n'a d'vins!

13. Va-dju magnî l'tchår dès torês,
beûre li song dès boucs?

14. Po lès lî d'ner,
prèzinte a Jahvé tès accions d'gråce,
èt n'roûvèye nin
d'acwiter lès veûx fêt å Fwért-hôt.

15. Adon brê-st-après mi
li djoû qu'ti sèrès strindou;
Dji t'sètch'rè foû di spèheûr
èt ti m'f'rè oneûr.

(Deûzinme acuzåcion: l'aliyance èst spiyèye so l'manîre di s'kidûre å d'divant dès-ôtes.
16. Mins Jahvé d'mande å rèsprové:
"Qu'as-s' a fé l'compte di mès lwès,
a pwèrter mi aliyance so t'boke?

17. "Twè qu'abôminêye d'èsse mètou å pas,
qui r'tape po-drî twè tos mès mèssèdjes,

18. " qwand ti veûs l'moudreû,
t'è-st-on fré avou lu!
T'as t'pårt amon lès cis
qui pètchèt conte li tchår,

19. "ti lês aller t'boke åx lêdès keûres
ti linwe machinèye tofér li rûse,

20." assiou, ti k'djåze ti fré,
ti prind l'oneûr dè fi di t'mame.

21." Vola tot çou qu't'as fêt,
èt dji n'dîreûs rin!
adon ti tûz'reûs vormint
qui dj'sos parèy a twè!
Ossi, conte twè, dji pwète 'ne acuzåcion
èt dj'tèl plak'rè d'zos t'narène!

(Avèrtih'mint po fini...)
22. " Di gråce, droviez tot grand vos orèyes,
vos, lès roûvis' dès bon Diu,
di sogne qui dji n'vis k'hêye
sins 'ne saquî po v'sètchî foû!

23. " Quî ofe on sacrifice d'accion d'gråce
mi rind glwère,
èt il èst so bone vôye!
Dji lî f'rè vèyî l'salut d'a Jahvé."

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 50 (Vulgate 49)

Li vrèye vènèråcion po l'Signeûr.

1 On tchant d'a Asaph:
Nosse Signeûr èt nosse Diu,
li Diu dès dius, nos djåze:
I houke ad'lé lu
tos lès omes dèl tére,
dispôye l'ôriyant ous'lîve li solo
disqu'a wice qui va djus.

2. Il èst d'ine bêté sins parèye!
D'å-d'zeûr di Sion, nosse Diu r'glatih
come pus d'cint-mèyes solos!

3. Nosse Diu vint,
èt i n'wåde nin l'silince,
on fouwå broûle po d'vant s'vizèdje;
qu'tot åtou on såvadje tins groûle a l'arèdje.

4. Dès hôtès vôsseûres,
I houke li tére èt lès cîrs,
po poleûr djudjî s'peûpe.

5. Rassonnez por mi tos mès mès binamés,
zèls qui par leû sacrifice
ont-st-avou pårt a mi-aliyance.

6. Lès cîrs fêt sèpi s'djustice,
ca nosse Diu èst l'seûl djudje!

7. Houte bin m'peûpe,
dji m'va djåzer;
Israël, dji sèrè tèmon conte di twè,
mi, l'Signeûr qu'èst t'Diu!

8. Nèni,
dji n'ti r'prind nin po tès sacrifices,
ni po l'lårdjèsse di tès ofrandes,
dj'èlz'a tofér divant mès oûys.

9. Nèni,
dji n'prindrè nin:
ni l'torê di t'mohone,
ni l'bouc di t'bèrdjirèye;

10. totes lès bièsses dès grands bwès
ni sont-èles nin d'a meune,
pus dès mèyes d'ôtes
qui sont so lès hoteûrs?

11. Dji k'noh chaskeun' dès oûhès
qui d'monèt la d'zeûr!
El djibî dès tchamps,
n'èstît nin co d'a-meune?

12. Dj'åreûs minme îdèye dè magnî,
poqwè tèl dîre?
Dj'a por mi l'monde ètîr:
dji n'a qui l'tchûse
d'vins totes lès sôrs di bièsses
qu'i-n-a so l'tére!

13. Va-dj' magnî dèl 'tchår di torês,
Va-dj'beûre ine jate di song' di bouc?

14. Rinds gråce å bon Diu;
acwites lès veûs qu't'as fêt å Fwért-hôt,

15. Adon ti pous m'houkî dês qu'ti sèrè strindou;
Dji t'disgadj'rè, èt twè ti m'glôrifiyèy'rè!

16. Mins l'Signeûr a dit å vårin:
qu'as-s' a fé l'compte di mès lwès?
Qu'as-s' a tofér djåzer di mi aliyance?

17. Twè,
qui nouk n'a polou mète å pas,
twè qui stope tès orèyes
po n'rin ôre di mès mèssèdjes!

18. Qwand ti veûs on moudreû,
t'è-st-on fré por lu!
Ti mousse amon lès adultéres
come ès t'mohone!

19. Ti boke si lêt aller å må,
ti linwe machinèye li rûse!

20. Assiou, ti k'djåze ti fré,
ti prinds l'oneûr dè fi di t'mame!

21. Vola tot çou qu'ti féves,
èt come dji n'dîhéve nole,
adon t'as wèzou tûzer
qui dj'èsteûs parèy a twè!
Ossi dji m'va t'pûni come i fåt,
èt dj'tèl mosteûr'rè sins tårder!

22. Djan, droviez tot grand vos orèyes,
vos, lès roûvis' dès bon Diu,
di sogne qui dji n'vis k'hêye
sins qu'ènn'åye nouk po v'såver!

23. Quî m'rind gråce, mi glorifiyèye!
Il èst so bone vôye!
Dji lî f'rè vèyî l'dilîvrance dè Signeûr!

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 51 (Vulgate 50) Trois versions.

Mizèréré!

1. A mêsse dè tchant. Tchant d'a Dåvid.

2. Qwand l'proféte Nathan li dèrit sès vrêyes
pace qu'i s'ètindez-v' pôr trop bin avou Bethsabée.

(Priyîre po k'mincî.)
3. Es vosse bon coûr, Jahvé,
prindez pîtché d'mi!
Vos, qui n'polez rat'nî vosse mizèricôr,
roûvîz mès fôrfêts!

4. Rinètîz-m' di m'tètche come i fåt,
purifiyez-m' di m'pètchî!

(Riknohance èt k'fèssion dèl fåte)
5. Ca dji k'noh mès forfêts,
dj'a todi m'pètchî d'vant lès oûys.

6. D'a fêt l'må disconte di Vos,
çou qui n'èsteût nin a v'gos'.
Dji riknoh li djustice di vosse parler
èt l'peûrté d'vosse djudj'mint.

7. Vochal:
dj'a-stu mètou å monde èl fåte,
mi mame m'a fêt pècheûr.

8. Vochal:
vos inmez bin qu'on seûye fidéle
minme divins 'ne saqwè d'catchî.
Vos m'ac'sègnîz k'mint viker
disqu'a d'vins lès sècrètès afêres.

(Dimande po èsse purifiyî dè pètchî)
9. Purifiyez-m' avou d'l'hysope
èt dj' sèrè peûr;
Rinètî-m',
èt dj'sèrè pus blanc qu'li nîvaye.

10. Fez-m' fruzi
di djôye èt d'ètêt'mint,
qui potchèsse di djôye
lès ohês qu'vis avez broyîs.

11. Distournez vosse vizèdje
di mès pètchîs;
Rouvîz
tot mès fôrfêts.

(Priyîre po-z-aveûr l'èsprit r'tapé a noû)
12. Jahvé, crèyez por mi
on peûr coûr!
Es mi
rinov'lez on fèrme èsprit!

13. Ni m'ritapez nin èrî d'vosse vizèdje,
ni m'riprindez nin l'èsprit d'vosse sint'té.

14. Rindez-m'
li djôye di vosse salut,
èt qu'l'èsprit d'ofrande
mi soutinsse.

(Promèsse di rinde gråce)
15. Dji m'va mostrer lès vôyes a sûre
åx cis, qui s'sont-st-èmontés conte vos;
Lès pècheûrs rivinront ad'lé vos.

16. Savez-m' dè song rispårdou,
Jahvé di m'salut;
Mi boke tchant'rèt vosse djustice.

17. Jahvé, droviez mès lèpes,
mi boke publèy'rèt vosse glwère.

18. Ca vos n'inmez nin lès sacrifices
èt si dji v'prèsinte in' ofrande ètîre,
vos 'nè vorez nin!

19. Lès sacrifices po Jahvé:
in'èsprit qu'èst-st-å r'pinti,
on coûr ripintant èt broyî;
çoula, Jahvé n'lès r'louke nin d'hôt!

(Intercèssion po Sion)

20 Es vosse binvèliance,
fez dè bin a Sion,
r'batihez lès murayes di Jèruzalèm!

21. Adon vos ahågn'rez lès sacrifices dè djusse,
lès ofrandes qui n'sèront nin dèl furtoye!
Adon pwis, dès djônes torês
mont'ront so voste åté.

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 51 (Vulgate 50)

Mizèréré!

1. A mêsse dè tchant. Tchant d'a Dåvid.

2. Qwand l'proféte Nathan vint l'trover
pace qu'il aveût stu ad'lé Bethsabée.

3.Mizèricôr, Signeûr nosse Diu!
Rabatez-m' mès fôrfêts,
fez-l' sorlon vosse gråce,
sorlon l'grandeûr di vosse mizèricôr!

4. R'nètîz-m' come i fåt,
dj'a stu m'hèrtchî èl corote!
Purifiyez-m' di m'pètchî!

5. Ca dji k'nohe mès forfêts,
mi pètchî si r'drèsse todi d'vant mi!

6. D'a pètchî conte di Vos, conte Vos seûl,
dj'a fêt çou qu'vos d'hez èsse li må,
insi v's èstez èl vrêye ès vosse sintince,
vos èstez peûr par vosse djudj'mint.

7. Vèyez-v':
dj'a-stu mètou å monde
tchèrdjî dèl fåte,
mi mame m'a cové
tot-z-èstant-st-ès pètchî.

8. Mins v's inmez l'vrêye
qu'è-st-å fond dè coûr,
fez-m' kinohe
vosse manîre tote sûtèye dè viker!

9. Purifiyez-m' di m'pètchî avou d'lizipe,
adon dj' sèrè nèt!
R'nètîz-m',
po qu'dji d'vinsse pus blanc qu'dèl nîvaye.

10. Fez-m' fruzi d' djôye,
qui dj'seûye ès fièsse,
qui lès ohês qui v's avîz broyîs
ènnè potchèsse di djôye!

11. Distournez vosse loukeûre di mès pètchîs;
rouvîz don tot mès fôrfêts!

12. Signeûr, fez por mi on coûr tot peûr,
rinov'lez-st-ès m'cwér, on fèrme èsprit!

13. Ni m'ritapez nin èrî d'vosse vizèdje,
ni m'riprindez nin l'èsprit d'vosse sint'té.

14. Rindez-m' li djôye di vosse dilîvrance,
sout'nez-m' par l'èsprit d'ofrande

15. Dji mosteûr'rè vos vôyes åx rèbèles,
lès pècheûrs rivinront ad'lé vos.

16. Signeûr,
savez-m' dè song'
vos l'Diu di m'dilîvrance,
mi linwe tchant'rèt vosse djustice.

17. Nosse Diu, droviez mès lèpes,
qui mi boke fèsse sèpi tote vosse glwère.

18. Ca lès sacrifices qui dji v'offre,
vos n'lès inmez nin!
Vos n'volez nin d'ofrande di bièsse!

19. Vochal çou qu'inme nosse Diu:
in'èsprit spiyî, å r'pinti,
on coûr tot spiyî èt broyî!
çoula, nosse Diu l'aconte so l'côp!

20. Fez todi pus d' bin a Sion,
r'batihez lès murayes di Jèruzalèm!

21. Adon vos djêr'rez so lès sacrifices dè djustice,
vos djêr'rez so l'ofrande di bièsse,
so 'ne clapante ofrande,
adon lès torês mont'ront vè voste-åté.

 

 

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

Psaume 51 (Vulgate 50)

Mizèréré.

1. A mêsse dè tchant. Tchant d'a Dåvid.

2. Qwand l'proféte Nathan li dèrit sès vrêyes
pace qu'i s'ètindez-v' pôr trop bin avou Bethsabée.

3. Signeûr nosse Diu,
vos qu'èst l'amoûr,
lèyîz-v' a dîre...
Vos qu'a bon coûr,
rabatez m'fåte.

4. Rinètî-m' come i fåt
di m'pètchî,
qui dj'ènnè seûye purifiyî.

5. Awè,
dji k'nohe mi fåte,
dji l'a tofér dizos lès oûys.

6. Dj'a pètchî conte di vos,
conte vos tot seû:
çou qui n'vis plêt nin,
mi dj'l'a fê...
Insi è vosse sintince
vos èstez l'dreûteûr minme
èt i-n-a rin a r'dire
so nouk di vos djudj'mints.

7. Mins mi,
dj'a m'nou å monde èl fåte,
è vinte di m'mame
dj'èsteûs dèdja pètchî.

8. Il èst clér por vos
qui l'vrêye deût håbité
è fin fond di m'coûr;
è m'neûr nut',
vos m'ac'sègnî a èsse sûti.

9. Purifiez-m' avou l'lizipe
po qu'dji tére après vos,
rinètîz-m'
qui dji d'vinsse pus blanc
qui dèl nîvaye.

10. Fez-m' ètinde lès tchants,
qui dj'åye pårt al fièsse:
adon lès ohês qu'vos broyîz
ratak'ront-st-a danser.

11. Ni loukîz nin mès pètchîs d'trop près,
bouhîz foû totes mès fåtes.

12. Nosse Diu,
fez por mi on noû coûr,
rinov'lez ossi mi-èsprit,
afèrmihez-l' è m'cwéz.

13. Ni m'ratchèssîz nin èrî d'vos,
ni r'houkîz nin vosse Sint-Esprit.

14. Rindez-m' li djôye qu'ont lès djins
qui s'sèpèt såvés;
qu'ine-èsprit plin d'èhowe
mi soutinsse.

15. Dji mosteûr'rè vosse vôye ås måvas,
lès foû-vôyes rariv'ront ad'lé vos.

16. Signeur nosse Diu,
vos qu'èstez m'såveûr,
fez-m' cwite dè song' rispårdou
èt m'boke tchant'rè vosse dreûteûr.

17. Droviez mès lèpes,
qui dj'fêsse sèpi vosse louwandje.

18. Si dj'fê dès sacrifices,
is n'sont nin a vosse gos';
si dji v's ofe dès bièsses,
vos 'nnè volez nin...

19. Li sacrifice qui v's ahågne
c'è-st-ine èsprit moudri.
Nèni,
vos n'rèbalez nin
on coûr broyî èt moudri.

20. Fez don dè bin a Sion,
ritapez lès meûrs di Jèruzalem.

21. Adon vos acon'rez lès sacrifices,
lès ofrandes ètîres,
èt sacwant' sôrts di bièsse.
Adon pwis,
on v's ofrirè dès torês
so voste-åté.

23-24-25-26-27-28-29-30-31-32-33-34-35-36-37-38-39-40-41-42-43-44-45-46-47-48-49-50-51-52

1à22 - 53à85 - 85à110 - 110à131 - 132à150

 

 

Psaume 52 (Vulgate 51)

Djudj'mint dè må-honteûs.

1. A mêsse dè tchant. On sûti spot d'a Dåvid.

2. Qwand Doeg l'Edomite vint po fé sèpi a Saül:
"Dåvid è-st-arivé amon Abimélech."

3. Qwè, fwért ome, ti bråk'lèye co,
to binåhe dè fé l'må!
Li gråce dè bon Diu
èst po tote li djoûrnêye.

4. Ti linwe èst pé qu'on fin rèzeû,
a twè, l'fordjeû d'mèskeûres.

5. T'inmes li må bin pus qu'li bin,
t'inmes mîs dès mint'rèyes
qui dès vrêyès paroles.

6. T'inmes totes lès d'vises qui distrûhêt,
sacri måle linwe!

7. Ossi po tofér:
Nosse diu va t'rivièrser,
i va t'apici,
i va t'tchèssî dèl tinte,
i t'råy'rè djus dèl tére dès vikants.

8. Lès djusses èl veûront,
èt ènnè fruziront,
is s'rèy'ront bin d'lu!

9. Vo-l'-chal li fwért ome,
qui n'mètéve nin s'fwèce è bon Diu,
mins qu'inméve mîs s'fiyî
å hopê d'sès ritchèsses,
èt qui d'pus, si glôrifiyéve
dè fé l'må par plêzîr!

10. Mins mi, dji so come l'olîvî
qu'a stu planté èl mohone d'å Signeûr,
la, i r'vèrdih èt pwète dès frûts,
insi dji m'abann'nèye
al gråce dè bon Diu
po tofér èt a jamåy.

11. Signeûr:
Dji vou v'fièstî a jamåy
po tot çou qu'vos avez fêt,
dji f'rè k'nohe vosse nom,
- il èst l'bin -
èt djèl f'rè
d'vant tos vos tchorleûs.

 

 

Ce texte précieux et rare est l'oeuvre de "On P'tit Monne" ("Un Petit Moine"). Ce "monne" en question, un enfant spirituel du père Hubert, est un moine trappiste de pure souche wallonne. Comme exercice spirituel, le père Hubert lui avait demandé de s'atteler à cette longue et la délicate tâche de traduire tous les psaumes en wallon à partir de quatre traductions françaises différentes. Le "P'tit Monne", sur sa lancée, a aussi traduit l'Évangile de Marc (cf. infra) et les trois lettres de Jean.

Je présente ici une version bénévolement dactylographiée et corrigée selon les dernières conventions orthographiques par monsieur Jean Hamblenne à partir des photos prises aux archives de l'abbaye de Rochefort. Merci M. Hamblenne pour ce travail long et exigeant.

 

*********************

Menu (Fr) - Menu (En)

Accueil - Welcome

*********************

Webmaster - Contact

www.STYLITE.net - www.AIDS-HOSPICE.com - www.PREVAIDS.org