(Traductions wallonnes)
Ce texte précieux et rare est l'oeuvre de "On P'tit Monne" ("Un Petit Moine"). Ce "monne" en question, un enfant spirituel du père Hubert, est un moine trappiste de pure souche wallonne. Comme exercice spirituel, le père Hubert lui avait demandé de s'atteler à cette longue et la délicate tâche de traduire tous les psaumes en wallon à partir de quatre traductions françaises différentes. Le "P'tit Monne", sur sa lancée, a aussi traduit l'Évangile de Marc (cf. infra) et les trois lettres de Jean.
Je présente ici une version bénévolement dactylographiée et corrigée selon les dernières conventions orthographiques par monsieur Jean Hamblenne à partir des photos prises aux archives de l'abbaye de Rochefort. Merci M. Hamblenne pour ce travail long et exigeant.
1-2-3-4-5-6-7-8-9-10-11-12-13-14-15-16-17-18-19-20-21-22
PSAUME 1 -Trois versions- Li Djusse èt l'Pièrdou
1. Ureûs l'ome, ci-la :
qui n'inteûre nin è l'pinsèye dès rèbèles,
ni s'campe nin a l'creûh'låde des pierdous
è n's'assît nin â cèke des mokeûx ;
2. Mins a s'plêzir è li lwè dè Signeûr
È muzèye si lwè djoû èt nut'.
3. I sèrè come l'åbe
planté â bwêrd d'ine corante êwe
qui donne ses frûts li timp v'nou
èt qu'a des foyes qui n'fènèt måy.
Tot çou qu'il intrèprind rèyussirè.
4. Tèl n'èst nin li sôrt des calins.
Parèy à l'bale qui l'vint k'sème
5. ils n'âront nin pus d'assûrance
â djoû dè djudj'mint
qui lès pièrdous
a l'assimblêye des djusses ;
6. Ca li Signeûr,
k'noh li vôye des djusses
mins li-cisse des calins
les monne a leû piète.
Psaume 1 Les deûs vôyes.
1. Bènureûs l'ome :
qui n'sût nin l'consèy dès vårins,
qui n'arèstêye nin al creûh'låde dès pièrdous,
qui n's'achî nin ès cèrke dès mokeûs.
2. Bènureûs l'ome :
qu'a mètou s'plêzîr è li lwè d'a Jahvé,
qui mûzèye si lwè djoû èt nut'.
3. Cist-ome la sèrè parèy a l'åbe
qu'a stu planté a bwèrd di l'êwe,
qui done sès frûts qwand l'tins èst la
èt qu'a dès foyes qui n'fènèt måy :
divins tot çou qu'i frè
i rèyussirè tofér !
4. Coula n'irè nin si bin po lès vårins :
zèls sèront tot fî parèy å strin
qui l'vint k'tchèsse tot-avå
5. Is n'åront nin pus d'assûrance
å djoû dè djudj'mint,
qui les pièrdous n'ènn'åront
a l'assimblêye dès djusses.
6. Ca Jahvé k'noh li vôye dès djusses ;
mins l'vôye dès vårins lès monne à leû piète.
Psaume 1 Les deûs vôyes.
1. Quéne djôye po l'ci :
qui n'sût nin l'consèy dès vårins,
qui n's'arèstêye nin a l'creûh' låde dès pièrdous,
qui n's'achît nin è cèke des mokeûs.
2. Quéne djôye po l'ci :
qui s'plêt bin è li lwè dè bon Diu,
qui mûzêye ciss-chal djoû èt nut'.
3. Ciste-ome la ravize ine åbe
qu'a stu planté å bwérd di l'êwe,
qui done ses frût' qwand i deût l'fé,
èt qu'a des foyes qui n'fènèt måy :
qu'i fêdde çou qu'i vout,
ça lî rèyussih tofér.
4. Qwand å vårins,
c'èst-st-ine ôte pêre di mantches:
zels sont parèy å strin
qui l'vint k'tchèsse hår èt hote.
5. Å joû dè djudj'mint,
tot ot'tant qu'lès pièrdous,
ènn'iront l'cowe è cou
foû d'l'assimblêye dès djusses.
6. Ca l'bon Diu
k'nohe li vôye dès djusses,
adon qui l'cisse des vårins
èlzès monne a leû piète.
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
PSAUME 2 -Deux versions- Li drame dè Mèssîye
Poqwè lès nåcions si r'mouwèt-èles tant ?
Poqwè lès peûpes comptèt-is leûs sôdårds ?
2. Lès rwès dès tére volèt t'ni tièsse å bon Diu,
les princes s'ûnihèt-st-èssonne,
po roter conte li Signeûr èt s'Mèssîye !
Is d'het inte di zèls :
“Alans-î, råyans leûs loyens,
ritapans bin lon leûs hårkès. »
4. Li Bon Diu è-st-achiou d'vins les cîrs
èt i rèye ès s'båbe;
Lu qu'lès a fêt turtos
I s'moke bin d'leûs manîres.
5. Come çoula deûre di trop a s'gos'
nosse Signeûr si mavèle,
po d'zos is ètindèt s'fureûr
èt ènnè hapèt sogne.
6. Pôr qu'ès s'colère èlzî a dit :
« D'ja mi-minme sacré mi rwè
so Sion, mi sinte hôteûr.“
7. Mi, si rwè,
dji vou fé k'nohe a turtos
l'îdèye qui l'Signeûr aveût-st-èl tièsse
li djoû qu'dj'a stu noumé rwè.
I m'a dit : « Twè, t'ès m'fi,
Oûy, dji t'a d'né l'vicårèye,
Si t'as håsse di ritchèsse,
Dji t'ènnè done so l'côp!
Ti r'çurès lès nåcions ès t'pårt d'èritèdje,
Ti dominne si stindrè disqu'å coron dès ére.
9. Ti spèy'rès lès nåcions a côp d'vèdje di fier,
ti lès broy'rès turtotes
come si èlles èstît on våse d'årzèye.
10. Asteûre, quî lès rwès sèyèsse sutî !
Qui lès djudjes dès tére tûzesse ‘ne miyète !
11. Adorez l'Signeûr tot fruzihant,
rafiyîz-v' tot tronnant d'vant nosse Diu !
12. Rabrèssîz s'fi sins pu ratinde,
sins qwè i s'måvèl'reût co bin!
Iv'tchèss'reût d'on côp so l'måle vôye
Ca s'colére s'èmonte po dès rins !
13. Quî sont-st-a houte ad'lé Lu !
PSAUME 2 Jahvé Rwè èt l'Monde... !
1 K'min don !
Vochal lès nåcions qu'ataquèt a s'compter !
Lès peûplådes qui r'cincèt leûs sôdårds !
2. Bin... Loukîz on pô !
Lès rwès s'rèbèlèt ossi !
Minme lès princes complotèt èssonne
Conte Jahvé èt conte s'Mèssèye.
3. Alons djans ! d'èt-ils : råyans leûs loyens !
Djans d'hèt-ils co :
Tapans leûs hårkès lon èri d'nos-ôtes.
4. Al copète dès cîrs,
Ci qu'ès-st-assiou so l'trône
Ni saveût s'ravu tél'mint i riyève a låmes
Lu qu'èst l'pus fwért,
Si moke bin d'zèls.
5. Mins s'colére prind feû,
i trak ‘nèye leûs jènèråls
Pwis s'colére s'èmonte,
I tape feû-èt-flames.
Is sont turtos d'vins leûs p'tits solés.
6. Mi, dj'a-stu sacrérwè,
so l'mont Sion, si sinte hôteûr.
7. Dji m'va v's-èl dire, mi,
çou qu'Jahvé a décidé dè fé :
I m'a dit : « T'ès m'Fi,
Oûy minme dji t'dinéve li djoû.
8. Dimande mi l'ritchèsse !
Dji tèl done so l'côp.
Dji t'donrè ossi lès nåcions po dôminne,
Èt minme å coron dèl tére
T'î sèrès mêsse.
9. Ti les spèyerès turtos a côps d'vèdje di fiér.
Ti les spaterès come on våse fêt d'tére di pipe.
10. Et asteûre, Rwès, sèyîz' sûtî !
Tûzez bin, mossieûs les gouverneûrs dèl tére !
11. Cervez Jahvé avou rèspèct,
èt passez vosse vèye d'vins lès transes,
omes promètous, sins fåte, al fosse.
12. Si div'nez-v gnèrveûs !
dji n'done nin tchîr d'vosse pê, comploteûx !
ca d'on côp, s'colére sét s'èmonter
come ‘n'sope å lècê.
13. Boneûrs po tos lès cis
qui s'mètèt a houte ès Lu.
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
PSAUME 3 -Deux versions- Abèye Signeûr, drèssîz-v' !
1. Tchant d'a Dåvid corant èvôye divant s'fi Absalon.
2. Signeûr, vèyez come dj'a bråmint d'innemis !
Enn'a-t-i don bêcôp a l'awète di m'vèye !
Inte di zèls is s'mokèt d'mi tot d'han :
“ci n'èst nin ès s'Diu quî s'îrè catchî!”
4. Mins vos, Signeûr, mi Rwè,
qui d'vez m'êdî èt m'mète a houte,
Vos qu'èstez m'glwère,
por qui dj'rote fîr'mint l'tièsse hôte !
5. Dj'aveus-st-a ponne èlèvé l'vwès
po houkî nosse Diu,
qu'i m'a dispièrté,
ca l'Signeûr mi pèrtéve.
7. Dji n'a nole sogne dè r'ç'ûre dès måvas côps
di totes cès målès djins a l'awète po m'aveur !
8. Drèssîz-v Signeûr !
Såvez-m' vos nosse Diu !
Elzî fåt mète a turtos dès pogns ès leû gueûye !
I fåt spiyî lès dints a tos cès vårins !
9. Vos, l'Diu qui nos sètche todis foû di spèheûr !
Fez d'hinde vosse bènèdicsion so vosse peûpe !
Psaume 3 Abèye, so pîd Signeûr !
1 Tchant di Dåvid corant èvôye po d'vant s'fi Absalon.
2. Signeûr, vèyèz-v' !
Tos lès-cis qui s'sont mètous disconte mi !
Dj'ataqué-v' a n'è fé l'compte,
Mins çoula n'våt nin les ponnes :
Ènn' arive todis pus qui m'ènnè volèt !
3. Enn'a-t-i bråmint a èsse a l'awète di m'vèye!
Avez-v' ètindou Signeûr !
Çou qui d'hèt inte di-zèls !
« Vrêmint pont d'tchance por lu ès bon-Diu,
i veûrè timpe assé qu'il èst tot seûl ! »
4. Mins vos Signeûr !
Mi rwè, qui d'vez m'êdî èt m'mète a houte !
Mi glwère qui m'fez roter l'tièsse radrèssèye !
5. Si dj'brê come on pièrdou après l'Signeûr,
i m'rèspond di s'sinte hôteûr.
6. Mi, qui dji m'coûke èt m'èdwème,
dji m'dispièrtèyerè ca l'Signeûr mi soutin.
7. Dji n'a nole sogne dès måvas côps
di totes cès målès djins qui m'traquèt
pom'haper m'vèye.
8. Abèye, rimouwez-v' Signeûr !
I va èsse timps di m'sètchî foû di m'spèheûr,
vos m'Diu-Såveur !
Fez oneûr a vosse Nom !
Elzî fåt twèrtcî l'bûzê a turtos,
èlzî fé r'moussî d'fwèce ès gozî
totes leûs mint'rèyes èt leûs malédicsions.
9. Oh ! vos l'Diu qui sètche todi foû !
Vosse bènihèdje ! fez-l' dihinde so vosse peûpe.
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 4 -Deux versions- Priyîre po l'al-nut.
1. A mêsse dè tchant po lès instrumints a cwèdes.
Tchant d'a Dåvid.
2. Acontez-m' qwand dji v'houke,
Vos m'Signeûr, vos qui m'disfindez !
Dji so strindou, disgadjîz-m' di-d-la,
Fez-m'grace, hoûtez m'priyîre !
3. Qwant a vos-ôtes lès pwissants :
disqu'a qwand alez-v' co v'moker
dèl glwère dè Signeûr nosse Diu,
disqu'a qwand inm'rez-v' lès bwègnès rêzons,
disqu'a qwand alez-v' vis complêre d'vins lès fåzès îdèyes ?
4. Sèpez don qui nosse Diu
va fé dès mèrvèyes po sès fruzihants,
qui l'Signeûr va m'hoûter
a ponne årès-dj' brê après Lu !
5. Vos n'vis sintez nin fwért påhûle... !
Mins si vos v'volez l'èsse :
Loukîz a vos èt n'pètchîz pus !
Qwand v's èstez so vosse lét,
tapez on côp d'oûy è vosse coûr
pwis d'lamèntez-v' sor vos.
6. Ofrez lès sacrifices sorlon li lwè,
adon pwis mètez tos vos espwèrs ès vosse Diu.
7. Enn'a bêcôp qui vont, tot rid'hant tofér :
« C'èst bin bê di s'ènnè r'mète å Signeûr,
mins si s'loumîre enn'alez-v' èri d'nos-ôtes,
quî d'abôrd nos fôrnirè d'qwè viker ? »
8. Vos avez mètou pus d'djôye ès m'coûr
qu'åx djoûs wice qu'is èstît ritche
di grins è d'doûs vin.
9. Pwice qui vos m'inmez,
dji m'coûke tot rimpli d'vosse påye
èt dj'm'èdwème sins pus ratinde.
Ca Vos, Signeûr, vos seûl,
Vos m'fez r'pwèzer påhûle.
Psaume 4. Djôye èt påye d'vins l'confiyance ès bon-Diu.
1. A mêsse dè tchant po lès instrumints a cwèdes.
Tchant d'a Dåvid.
2. Qwand dji brês, rèspondez-m',
oh Diu, vos qui m'disfindez !
Sètchîz-m' foû d'mès transes,
Fez-m' ine gråce,
Hoûtez m'priyîre.
3. Dihez don vos lès gros bonèts !
Disqu'a qwand alez-v' co taper a rin
li ci qu'èst tote mi glwère?
Alez-v' co longtins vis passioner por Vûde,
è prinde le pårti dès minteûrs ?
4. Sèpez don qu'li Signeûr va fé des miråkes po s'binamé
èt qu'i m'hoûtrè ossi vite qui dj'brêrè après lu.
5. Inkièt... ! Vos polez bin l'èsse,
mins wårdez-v' di pètchî.
Tapez on côp d'oûy è vosse coûr
Èt alez-è tchoûler so vosse lét.
6. Imolez dès sacrifices sèlon li lwè
adon pwis abann'nez-v' ès Signeûr.
7. Enn'a bråmint qui s'porminet tot d'hant tofér :
« Mins quî don nos donrè çou qu'nos avans mèz å he,
qwand l'clårté di v'vizèdje sèrè rèvôye èrî d'nos-ôtes ? »
8. Fes potchî m'coûr di djôye :
èt asteure,
fez brotchî lès grins foû d'leûs grinîs,
èt d'bwèrder l'doûs vin foû d'leus cåves.
9. D'vins l'påye di v'vizèdje,
dji m'coûke èt m'èdwèm' ;
ca vos Signeûr èt vos seûl,
påhûlemint mi fez r'pwèzer.
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 5 -Deux versions- Timprowès priyîres å djudje di tos lès omes.
1. Å mêsse dè keûr, al dobe flûte, tchant d'a Dåvid.
2. Tindez l'orèye a mès propôs, Jahvé,
perçûvez m'djèmihèdje !
3. Fez atincion a mès éclameûres qui v'hoûkèt,
vos mi rwè èt m'Diu !
Ca c'è-st-a vos qui dj'vou ‘nn'aveur.
4. Tot timpe å matin hoûtez m'vwès,
dji voreus plêtî m'cåse divant vos;
Dji va v's aveur a l'oûy !
5. Ca louki lès fôrfêts
ni v's èbale nin,
èt i n'a nole plèce po l'mètchant
è vosse mohone.
6. Ni pèrmètez nin âs « pô d'tchwè »
di parète po d'vant vos oûys,
ca vos n'savez oder non pus
tot lès cis qui n'fêt rin d'bon !
7. Tchoûkîz ‘lzè ès leû piète
tos cès d'heûs d'mint'rèyes :
Jahvé abôminêye l'ome dès îdoles
èt qui fraw'têye tot dè long.
8. Mins mi :
tél'mint voste amoûr èst foû mèzeûre
dji pou moussî ès vosse mohone,
mi mète a gngnos vè l'palå di v'sint'té
avå lès cis, qui ès vos fruzihèt,
å nosse Diu.
9. Admètez-m' ès vosse vèye tote intime,
mès bourias ènnè sèront tot maké !
Aplanihez vosse vôye å d'vant d'mi !
10. I n'vint vormint rin d'vrêye foû di s'gueûye,
è po s'panse i galafêye tote li djoûrnêye;
Leû gozî è-st-ine fosse tapêye grante-å-lådje,
di leû måle linwe is n'sèmèt qu'li mwèrt.
11. Fez lès pèri, Jahvé,
qu'is toumèsse ès leû prôpes èmantcheûres !
D'zos l'hopê d'leûs fôrfêts
trak'nez lès, Jahvé !
Ca c'èst vosse fwèce
qu'is sayèt di mète a l'èsproûve.
12. Is s'rèdjouwihèt tot
lès cis qu'ès vos trovèt ine a houte,
Is tchantèt po lès siékes a jam åy
èt sor zèls vos stintez vosse vwèle:
ès vos is djubilèt
lès tchorleûs d'vosse nom.
13. Awè, Jahvé,
vos bènihez l'djusse,
èt come d'ine prôtecsion
vos l'ewalpez d'vosse tinre amoûr.
Psaume 5 Priyîre po l'å matin.
1. A mêsse dè keûr, al dobe flûte, tchant d'a Dåvid.
2. Signeûr !
Tindez l'orèye vè çou qu'dji v'di,
Acontez m'djèmihèdje !
3. Dj'a tant dè må, hoûtez don m'vwès,
Vos, mi Rwè èt mi Diu !
Ca c'èst vos qu'dji vou priyî,
Vos m'Signeûr !
4. Dispôy to timpe
vos d'vez ètinde qui dji v'houke,
dispôy l' å matin
dji voreûs tant v's èspliker mès-afêres,
èt c'èst poqwè
dji so-st-a l'awête après vos!
5. Por vos nosse Diu, çoula n'vis ahågne nin
dè tofér vèyî dès lêdes ;
li mètchant n'a nin sûr
l'intrèye di vosse mohone.
6. Ni lèyîz don nin tos cès-la
fé l'fîr èt s'foute di vos,
zèls qui tchèrèt foû dèl dreûte vôye !
Dji hé come li pèsse
tot quî oûveûre al vûde!
7. Vos minez-st-a leû piète
tot cès conteûs d'mint'rèyes !
Et vos nosse Diu vos r'vômihez
tot qui court åx îdoles,
tot qui n'vike nin come èl lê ètinde !
8. Mins mi :
tot r'nov'lé par voste amoûr
dji m'mète a gngnos vè l'palå di v'sint'té
avou tos lès-cis qui come mi
fruzihèt di djôye èt d'sogne por vos
nosse Signeûr èt nosse Diu !
9. Å grand djoû, divant cès la qui m'acåblèt,
Signeûr, prindez-m' ad'lé vos, d'vins vos brès' !
Aplanihez vosse vôye po d'zos mès pîds !
10. Is n'dihèt m åy nole vrèye,
is n'sårît magnî come dès propès djins,
leû gozî è-st-ine fosse grante-å-lådje,
leû linwe sème tofér li mwért !
11. Signeûr, fez lès pèri,
qu'is s'trèbouhèsse ès leûs èmantcheûres
tot fant insi ‘ne bèle pèrtinne !
Eclawez lès d'zos l'hopê d'leûs fôrfêts,
ca c'èst conte di vos qu'is r'lèvèt l'tièsse !
12. Is sèront-st-èl djôye
lès cis qui s'sèront rèfûdjîs ès voste amoûr ;
is tchant'ront po dès sièkes
qui n'åront måy nole fin!
Ca vos lès rafûlez d'vosse vwèle,
èt is fruzihêt por vos,
pace qui inmèt vosse nom !
13. Awè, Vos Signeûr,
vos bènihez l'djusse,
èt come d'ine prôtecsion
vos l'èwalpez d'vosse tinre amoûr.
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 6 -Deux versions- Disqu'a qwand ?
1. A mêsse dè tchant po lès instrumints a cwèdes.
Tchant d'a Dåvid.
2. Jahvé:
ès vosse colére, ni m'barbotez nin,
ès vosse fureûr,
nèni, ni div'nez nin måva !
3. Fez-m' gråce, Jahvé,
dj'ènnè pou pus !
R'wèrihez-m', Jahvé,
Mès ohês dim'nèt comme sot !
4. Mi åme èst come ‘ne pièrdowe ;
Vos, Jahvé ! disqu'a qwand ?
5. Ahote ! tot doûs Jahvé !
Lèyîz-m' rihaper 'ne miyète!
Rindez-m' li vèye
A cåse di voste amoûr.
6. Ca l'ci qu'èst mwért,
I n'tûze pus a vos !
Comptez-v' qu'ès l'infér
‘ne saquî vi l'louwer !
7. Dji n'pou pus hop
a fwèce di djèmi.
Dès nut' mi lét èst tot trimpé.
Dji tchoûle tél'mint
qu'mès draps sont-st-a twèd' !
8. D'èsse èl lonne, mès oûys s'kimagnèt tot,
mi coûr si distrût d'lanwi après vos !
9. Hay ! sètchiz-v' èrî d'mi
vos turtos feûs d'fôrfêts,
ca Jahvé a-st-ètindou
qui dji'm brêyez-v' tot mwért.
10. Jahvé a-st-ètindou m'suplicåcion,
il a fêt bon-akeûy a m'priyîre.
11. Mès innemis ènnè sont tot maké,
is sont d'vins leûs p'tits solés.
Alez-r-zè turtos l'rodje å vizèdje !
Èt d'on plin côp lès v'la tot pièrdou !
Psaume 6 : Priyîre po n'nin èsse barboté.
1. A mêsse dè tchant po lès instrumints a cwèdes.
Tchant d'a Dåvid.
2. Signeûr !
Ni m'barbotez nin insi,
Vosse colére vis troûbèle !
Ni m'pûnihez nin steûre,
Vosse fureûr vis aveûle !
3. Signeûr !
Dj'ènnè pou pus,
Dj'a mèzåhe d'vosse gråce !
Rifez-m' a noû,
Mès ohês halcotèt tot !
4. Mi-åme èst vrêmint tote pièrdowe;
dihez-mèl vos m'Signeûr, disqu'a qwand ?
5. Arèstez Signeûr !
Lèyîz-m' rihaper ‘ne miyète !
C'èst l'vèye qui vos d'vrîz m'rinde
Pwice qui vos d'hez qu'vos m'inmez !
6. Ca l'ci qu'èst mwèrt
ni tûze sûr pus a vos,
èt comptez-v' qu'ès l'infér
ine saquî va v'louwer !
7. A fwèce dè djèmi dji n'pou pus hope !
Dèl nut' dji tchoûle télmint
Qui m'lét ènnè tot trimpé,
Qui mès draps sont-st-a twèd' !
8. Come dji n'arèstèye nin dè plorer
dj'a lès oûys tot k'magnî!
Mi coûr si distrût
Tél'mint i lanwih après vos !
9. Sins pus tchik'ter sètchîz-v' èri d'mi
vos –ôtes qui n'ovrer qu'a må fé,
ca nosse Signeûr a ètindou qui dj'ploréve !
10 Nosse Signeûr a étindou m'suplicåcion,
nosse Signeûr a bin aconté mès priyîres.
11. Mès innemis ènnè hapèt ‘ne bèle pawe,
ènnè div'nèt tot rodje di honte.
Ennè riv'nèt nin,
Adon ènnè r'vont tot foû d'zèls !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 7 Priyîre dè djusse qu'èst k'chèssî.
1. Ime d'a Dåvid : èl tchanta po Jahvé a propôs d'a Kush li Benjaminite.
2. Signeûr nosse Diu,
dji m'vin-st-å pus vite ad'lé vos,
sèrez-m' bin fwért divins vos brès'
po qu'dji n'fêsse pus qu'onk avou vos !
3. Såvez-m' di tos cès-la
quî m'kitchèssèt sins r'låke !
Rat'nez lès la èrî d'mi,
qu'insi is n'polèsse nin m'ac'sûre.
Is m'kihèy'rît co bin l'bûzê
tot come li liyon fêt avou s'prôye,
Sins qu'ine saquî ni s'dècidèye
a v'ni m'råyî foû d'leûs mins !
4. Signeûr nosse Diu,
åreûs-dj' don fêt ‘ne saqwè d'lêd ?
åreûs-dj' neûrcî mès mins èl trêtrîse ?
5. Signeûr nosse Diu,
si dj'a stu toûrciveûs avou m'kipagnon,
si dj'a troûblé m'binfêteûr avou dès fåzès novèles !
6. Adon qui mi-innemi m'porsûve èt m'apice,
quî tripèle mi vèye so l'pavêye,
quî hène mi feûte èl corote.
7. Es vosse colére lèvez-v' Signeûr !
Es vosse fureûr drèssiz-v',
nos avans fêt aliyance!
Vos nosse Diu,
dispètchîz-v' dè houkî vosse tribunål.
8. L'assimblèye dès peûpes èstant åtou d'Vos,
sîdjîz la d'zeûr al copète di zèls !
9. Signeûr :
Vos qui djudjîz lès målès manîres,
rindez-m' djustice sorlon mi-ènocince,
rindez-m' djustice sorlon l'dreûteûr di m'vicårèye,
vos qu'èstez l'pus hôt !
10. Qwand don sèrans-gn'cwîte
di ces vårins èt d'leû mètchanceté !
Djan, rindez sès dreûts a l'ome djusse,
vos quî graw'tez d'vins lès rins è les coûrs,
Signeûr, vos l'prumî des djusses !
11. C'èst l'Signeûr nosse Diu
qui m'deût êde èt prôtècsion,
c'èst lu qui såve lès coûrs dreûts !
12. Nosse Diu è-st-on djudje qu'on n'atch'tèye nin,
on Diu qu'on fêt måvler a tos moumints !
13 Ci qu'èst conte lu
a bê r'ssinmi si-èpèye,
il a bê tingler si-arc èt l'adjuster,
14 c'èst conte di lu-minme
qu'il aprèstèye sès agayons d'mwért
èt qu'avou sès flèches
i fêt dès djèts d'blame !
15. Loukîz-l'bin,
i qwîre a må fé!
I s'infèle tot, fîr di sès forfêts,
il a d'né l'djoû al trêtîse !
16. Il a fêt ‘ne fosse,
è l'trô a stu fêt bin parfond!
Adin il a ridé lu-minme èl fosse
qu'il aveût droviért po lès-ôtes !
17. Si toûrmint lî r'potche å vizèdje,
si radeûr lî r'tome so s'tièsse.
18. Dji rind gråce a nosse Diu po s'djustice,
dji djowe po l'nom d'nosse Signeûr,
Lu l'pus hôt !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 8 -Deux versions- Li grandeûr dè Signeûr.
1. A mêsse dè tchant, a l'manîre d'a Gath.
On tchant d'a Dåvid.
2. Signeûr, nosse mêsse !
Di quéne clårté lût vosse nom tot-avå l'tére !
Fez èclater vosse glwère so lès hôteûrs dès cîrs !
3. Vos savez tot fé !
Vos ‘nnè fez pus qu'lès jèyants
èt qu'lès omes lès mî r'noumés !
Es tére vos avez fêt on p'tit fôrt :
mins d'vant di v's î catchî
vos avez stu mûz'ler vos innemis,
li hayåve èt li r'vindjeû.
--------------------------
2' Signeûr nosse Diu !
Qu'il èst grand vosse nom tot-avå l't'ére !
Vosse glwère èst tchantèye, la hôt d'vins lès cîrs ;
3' C'èst lès èfants èt lès tot p'tits quèl tchantèt
po fé têre lès innemis èt lès rèbèles.
--------------------------
4. Di tos mès oûys dji louke lès cîrs
qui v's avez fêt tot seû,
qwand dj'veûs l'leune èt lès steûles
qui vos fez t'ni la-d'zeûr,
dji n'såreûs m'èspètchî dè tûzer,
ès mi-minme i fåt qu'dji m'dimande :
5. Qu'èst ce don l'ome
po qu'vos nèl roûvîze nin ?
Po qu'por lu vos vos féze dè må d'tièsse
adon qui n'èst tot l'minme fêt qu'd'årzêye ?
6. Tot djusse vos l'avez fêt ‘ne miyète dizor vos,
èt vos l'rafûlez èt d'glwère èt d'oneûrs !
7. So l'oûve qui v's avîz fêt vos-minme
vos lî avez d'né tot pouvwèr ;
c'èst lu l'mêsse di tot :
8. lès bèdots, lès boûfs, èt totes lès ôtès sôrs,
minme lès såvadjès bièsses,
sins roûvî lès oûhês dès cîrs
èt lès pèhons dè mér,
pus tot çou qui sût lès pazès
d'vins lès êwes dès ocèyans.
9. Signeûr nosse Diu !
Quéne glwère a vosse nom
Tot-avå l'tére!
Psaume 8. Li grandeûr di l'ome.
1. A mêsse dè tchant, a l'manîre d'a Gath.
On tchant d'a Dåvid .
2. A Jahvé nosse mêsse,
quéne loumîre tape vosse nom
avå tote li tére !
Å Bènureûs, fez sclater vosse glwère
so lès hôteûrs dès cîrs !
3. Vos polez tot fé !
Co bråmint pus qui lès jèyants
èt qu'lès pus r'noumés dès omes.
Vos avez fêt on trô,
po ‘nnè fé on p'tit fôrt ;
Mins :
D'vant d'î moussî po-z-awêtî,
Vos avez stu mûz'ler
Les cis qu'sont conte di vos,
Lès hayåves èt lès r'vindjeûs.
4. Qwand :
di tos mès oûys dji louke lès cîrs
qui v's avez fêt d'vos mins,
qui dj'veûs l'leune èt lès steûles
qui c'èst vos qu'lès fêt t'ni,
dji n'såreûs m'èspêtchî dè tûzer,
i fåt qu'dji m'dimande :
5. qu'èst-ce don l'ome,
po qu'vos nèl roûvîze nin,
ci fi la, fêt d'tére di pîpe
po qu'vos li rindéze vizite ?
6. A hipe vos l'avez crèyé
ine miyète di mons qui Diu,
èt d'pus vos l'couronez
èt d'glwère èt d'oneûrs.
7. Vos lî avez d'né d'èsse li mêsse
so tot çou qu'vos avîz fêt.
Il a-st-avu vormint tot:
8. lès p'tites èt lès grossès bièsses èssonne
avou minme lès såvadjès bièsses ;
ossi lès ouhês dès cîrs,
èt lès pèhons dèl mér,
tot çou qui sût lès pazès
qui sont-st-ès l'êwe dès ôcèyans.
9. Signeûr nosse Diu,
qué bé nom v's av' la,
on ‘nn'a måy vèyou d'parèy
avå tote li tére !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 9 -Deux versions- Nosse Signeûr è-st-on Diu qui såve lès acåblés èt qui djudje lès vårins.
1. A mêsse diè tchant. So l'mwért d'a Ben. Tchant d'a D åvid.
2. Signeûr !
C'èst d'tot m'coûr
qui dj'vou tchanter vos louwanjes !
C'èst l'eune après l'ôte
qui dj'va fé k'nohe totes vos mèrvèyes !
3. Dji vou m'rafiyî ès voste amoûr,
ènn'aveûr li coûr plin d'djôye ;
dji vou tchanter vosse nom
a vos qu'èstez å-d'zeûr di turtos !
4. L'innemi bate an r'trête,
ç a stu 'ne såv'rèye di tos lès diâles ;
is toumèt la, d'vant vosse fureûr,
is pèrihèt la d'vant vos !
5. Si v'polîz m'rinde djustice,
mi rinde mès dreûts,
pwice qui vos montez po v'mète a sîdjî,
vos l'djudje qu'èst todis djusse.
6 Vos t'nez a gogne lès îdolates
èt v'fez pèri l'vårin ;
avou 'ne gome èt po tofér
vos avoz rabatou leû nom.
7. L'innemi èst språtchî, s'payîs èst razé,
po tofér ci n'sèrè pus qu'on hopê di rwènes ;
mins ènnè fat ossi råyî tos les fond'mints
po-z-èsse sûr d'ènnè piède tote li sovnance!
8. Nosse Signeûr dimone ès l'étèrnité,
il a rafwèrcî s'sîdje po l'djudj'mint.
9. C'èst lu qui djudje li tére èl djustice,
il è-st-ossi r'noumé po s'dreûteûr
èt i chèv d'årbite po lès peûpes.
10. Quî l'Signeûr seûye li fôrterèsse
dè ci qu'èst broyî ;
qui l'Signeûr seûye si fôrterèsse
po l'tins dès måleûrs !
11. Is racirèt ad'lé vos Signeûr,
tos cès-chal plin d'feû po vosse nom,
ca vos n'lèyîz måy so l'ouh
li ci qui v'cwîre po l'bon !
12. Tchantez po nosse Diu
lu qui sîdje a Sion ;
tot avå l'tére , amon tos lès peûpes
fez k'nohe tos sès hôts fêts.
13. Nosse Diu s'fêt des mås d'tiesse
po tos lès-cis qu'plorèt,
il a lès orèyes èstchåfèyes
a fwèce d'ètinde leûs plintes,
i n'pout må dè roûvî
li cri di tos lès målèreûs.
14. Signeûr, clintchîz-v' di m'costé !
Loukîz on pô di quéne mizére
Lès hayåves m'ont rafûlé !
Rassèchîz-m' dès pwètes dès mwért,
15. qui dj'våye disqu'åx pwètes dèl fèye d'a Sion
po î raconter vos louwanjes,
èt pwice qui v's avez m'nou a nosse sécoûrs
adon, nos porans danser èt fé fièsse.
16. Quî lès peûpes s'èfoncèsse
èl fosse qu'ils avît tapé a-lådje !
Quî leûs pîds s'èlahèsse
èl nasse qu'ils avît catchî !
17. Nosse Diu s'a d'né a k'nohe
tot rindant s'djudj'mint,
li vårin a stu èclapé
d'vins lès ovrèdjes di sès mins.
18. Quî lès vårins ènnè ralèsse åx inférs !
Qu'on n'lès veûsse pus tos cès idolates
Qu'ont stu roûvî nosse Diu !
19. Nèni, li pôve n'èst ni roûvî po todis,
l'èspwér dès målèreûs n'èst nin pièrdou po tofér !
20. Drèssîz-v' Signeûr,
quî l'ome ni vinsse fé d'sès-êrs !
C'èst d'vant vos
qu'lès îdolates d'vèt èsse djudjî !
21. Signeûr, mètez ‘lzî on môr,
quî tos cès îdolates riknohèsse
quî tot seû l'ome n'èst rin !
------------------------------------------
21'. Fez ‘lzî haper sogne, Signeûr,
èt lès peûpes såront qui sont turtos môrtèls !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 10 du texte hébreu (Suite du psaume 9 pour la Vulgate)
1. Signeûr !
Poqwè d'monéve si lon ?
Poqwè alez-v' vis catchî
Djustumint qu'on-z-a mèzåhe d'vos ?
2. L'å-d'vins d'on vårin
n'èst qu'on bouyon d'måleûrs ;
tot pîpant, sins minme riprinde alène,
i vout-st-ariver a n'fé qu'a s'vîr!
3. Awè, l'v årin s'complumintèye
so s'feû a 'nnè fé nole bone.
C'è-st-on lêd rowe
qui n'chèv pus qu'sès passions.
Li vårin s'moke bin dè bon Diu,
ènnè fêt noû cas!
4. Jamåy nosse Diu ni cwîr'rè a s'rivindjî
dè feû qui mète ès s'colére,
i n'a nin minme tchèrdjî in'andje
di lî mète dès bastons d'vins lès rôles !
-------------------------------
4'. Li vårin èst bin trop fîr èt trop sûr di lu
po r'cwèrî ‘ne saqwè,
tote si pinsèye pout s'racoûrci come çouchal :
« I n'a pont d'Diu ! »
5. Sès pazês sont florihants tote l'annèye.
Tos vos djudj'mints, Signeûr,
passèt-st-èrî d'lu,
Èt d'totes lès fwèces di s'cwér
i rètche après !
6. I s'a dit ès lu-minme :
« Dji n'brontch'rè måy,
po tos les adjes a m'ni
dji so-st-a houte dè måleûr!”
7. Sins rêzon, i djure ès nom d'a nosse Diu,
si gueûye èst plinte di fås'té èt d'rudèsse,
èt d'zos s'linwe on n'troûve
qui lêdès keûres èt tourmints.
8. I va s'mète a l'awête foû dè viyèdje,
il ahorèye l'ènocint d'vins lès neurès cwènes,
fås'mint i såye avou sès oûys
d'amadoûler l'minåbe.
9. I s'mète al rawåde po haper l'pôve,
il apice ci-chal tot l'sètchant ès s'hèrna.
10. La d'vins, tot språtchî, li målèreûs s'èfondrèye,
lès minåbes toumèt-st-insi d'vins sès grawes.
11. I s'a co dit ès lu-minme :
“Diu roûvêye, i distoûne li tièsse!
I deût sûr loukî d'in'ôte costé,
adon i n'veût nin todis tot ! »
12. So pîd Signeûr!
drèssîz vosse min!
Ni lèyîz nin lès pôves èt lès minåbes
toumer èl roûviance!
13. Li vårin va-t-i don tofér twèzer nosse Diu,
lu qui pinse ès s'coûr
qui vos n'vis vindj'rez nin !
14. Loukîz l'toûrmint par vos-minme,
vinez vèy li måle fwèce, loukîz-l' bin !
Adon, par vos-minme, di vosse min,
vos rindrez a chaskeun' çou qui lî r'vint !
Li minåbe s'abann'nèye èt voste amoûr,
vos èstez l'sécoûrs di l'ôrfulin !
15. Spiyîz l'brès' a vårin,
vindjîz-v' di s'mètchanceté !
Ca vos n'sårîz picî l'toûrciveûs
avou l'min ès sètch !
16. Nosse Signeûr èst li rwè dè tins
èt dès siékes a m'ni ;
I fåreût qu'lès îdolates
polèsse disparèt di s'tére !
17. Signeûr, acontez dont l'plinte dès pôves,
qui vosse coûr seûye todis a l'awête,
droviez bin fwèrt vos orèyes !
18. Si so l'côp, vos prindez l'disfinse
di l'ôrfulin èt d'l'acåblé,
nos n'veûrans måy pus on lêd rowe
fé sogne åx omes dèl tére.
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 11 (n° 10 selon la Vulgate) -Deux versions- Ad'lé Jahvé on n'pout må !
1. A mêsse dè tchant. Po Dåvid.
Es Jahvé,
dj'a trové a m'mète a houte.
Kimint polez-v' dimoni
a l'awète di m'åme ?
Kimint polez-v' ratinde
qu'èle s'èvole vè lès hôteurs come in'oûhê ?
2. Ca loukîz bin, la èl neûristé :
lès rèsprovés tinglèt leû arc,
is adjustèt l'flèche so l'cwède
èt çoula, po sètchî so lès dreûts coûrs.
3. Si les fond åcions
sont mètowes cou d'zeûr cou d'zos,
li djusse, lu,
mins qu'f'rèt-i don ?
4. Jahvé d'meûre å palå di s'sint'té,
Jahvé a s'sîdje d'vins lès cîrs ;
Ses oûys sont-st-a l'awète,
i nte sès påpîres i r'louke
lès omes fêt d'tére di pîpe.
5. Jahvé èst l'djusse !
I va mète a l'èsproûve
li pèrsonèdje dè rèsprové :
èt insi l'galant dèl måle fwèce
ni sét pus minme oder s'prôpe vèye.
6. I f'rè ploûre so lès vårins
dès tchôtès cindes èt dè soûfe ;
dès toûbions d'vint tot broûlant
sèront leû pårt ès leû coupe.
7. Il èst djusse, lu, l'Signeûr.
Il inme li-ci qui fêt l'bin.
Tos cès-la qu'ont l'coûr dreût
poront contimpler s'Vizèdje.
Psaume 11 (10) Ad'lé l'bon Diu on n'pout må !
1. A mêsse dè tchant. Po Dåvid.
Dj'a trové in'a houte
ès l'amoûr dè bon Diu.
Kimint polé-v' dimoni
al rawåde di mi-åme?
Kimint polez-v' ratinde
qu'èle s'èvole vè lès hôteûrs come in' oûhê ?
2. Loukîz bin la èl neûristé,
lès vèyez-v' tos cès vårins qui tinglèt leûs acs :
ils adjustèt 'ne flèche so l'cwède
po sètchî so l'ci qu'sût vosse vôye !
3. So l'tins qu'lès fondemints sont rayîs,
quî pout-i don fé, l'djusse ?
4. Nosse Diu d'meûre å palå di s'sint'té,
il a s'sîdje la-hôt d'vins lès cîrs.
Di-d'la i tint a l'oûy tote li tére,
i louke inte di sès påpîres
ca i cwîre a vèyî
disqu'å coûr dès fis d'Adam.
5. C'èst nosse Diu qu'èst « l'Djusse »,
èt l'vårin va-z-èsse mètou a l'èsproûve.
Li Signeûr hé l'ci qu'inme li rudeûre,
èt l'ci qu'fwèrcih todis so lès-ôtes.
6. I f'rè ploûre so lès rèsprovés
dès bruzis, dè feû èt dès soûfe,
èt dès broûlants toûbions d'vint
sèront leû pårt ès leû coupe.
7. Il èst djusse, lu, Jahvé :
lès dreûtès manîres, lu, i lès inme.
A s'åhe èt d'tot sès oûys
nosse vizèdje porè loukî li lwèyål.
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 12 (Vulgate 11) -Deux versions- Disconte on monde di minteûs !
1. A mêsse dè tchant. Tchant d'a Dåvid.
2. Abèye, å sécoûrs Signeûr !
Vosse fruzihant n'pout pus hope,
i n's'sét a quî s'fiyî!
3. L'ome djåze fås'mint a s'vwèzin,
dès lèpes,
i såye di l'amadoûler,
adon su'ès c'cour,
i fêt dès plans po l'distrûre !
4. Qui l'Signeûr fêsse disparèt'
totes cès dandjereûsès lèpes,
totes cès målès linwes
qui k'pwèrtèt lès fåssès îdèyes.
5. Qu'i fêsse ossi disparèt' lès brèyås
qui vont tot d'hant tot avå :
« Nosse linwe nos rint lès pus fwérts,
nos lèpes tinèt avou nos-ôtes,
quî sèrè nosse mêsse ? »
6. A cåse dès twérts qu'on fêt åx p'tits,
a cåse dès pôvès djins qui djèmihèt,
asteûre dji m'lîve, a dit nosse Dju,
dj'ènn'a m'sô d'tot çoula,
dji m'va pwèrter dès scoûrs
åx-cis qu'on rètche après !
7. Nos polans nos fiyî sins arière pinsèyes
åx promèsses d'å bon Diu :
èles sont-st-ossi peûres qui l'årdjint
qui sèt fèyes 'n-è-rote a stu purifiyî di si-årzèye !
8. Vos, nosse Diu,
vos nos prindez so vosse prôtèscion,
dispôy todis vos nos t'nez a l'oûy
po nos protèdjî dèl måle sôr !
9. Ca c'èst vos qu'èsteût, qui èst,
èt qu' sèrè po tofér.
Lès vårins toûrnikèt chal atou !
--------------------------------------------
8'. Signeûr, Vos, Vos tinrez cès promèsses !
Po tofér vos nos wårdrez d'ciste indjince la !
9'. Lès vårins rôdèt po tot avå,
I n-a todi pus d'lêdès manîres
Amon lès fis d'a Adam!
---------------------------------------------
7. Lès promèsses d'a Jajvé
sont dès peûrès promèsses :
årdjint qu'rafène ès creûzèt,
purifiyî sèt fèyes di s'tére di pîpe.
8. Vos, å Jahvé,
vos nos prindez so vosse går,
vos r'wètîz so nos-ôtes
dispay dès sièkes,
9. vos qu'èsteût, qui èst
èt qu'sèrè po tofér.
Lès rèsprovés toûrnikèt po tot åtou !
----------------------------------------
7. Promèsses d'a Jahvé,
peûrès promèsses !
årdjint qu'rafène ès creûzèt,
purifiyî sèt fèyes di s'tére di pîpe.
8. Vos, Jahvé,
vos nos prindez so vosse går,
a jamåy, vos nos mètez a houte
di cist-indjince chal !
9. Lès rèsprovés toûrnikèt tot åtou,
si d'vèrtihant dèl crasse
qui crèh todi pus
amon lès fis dès omes !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 13 (vulgate 12) -2 versions- Jahvé, m'avez-v' roûvî ?
1 A mêsse dè keûr- Tchant d'a Dåvid.
2. Disqu'a qwand, Jahvé,
alez-v' co m'roûvî?
Disqu'a qwand alez-v'co
v'distoûrner èrî d'mi?
3. Disqu'a qwand va-dj' tûziner
li dotance ès m'âme,
dispièrtant tofér lès transes
å pus parfond di m'coûr ?
Disqu'a qwand mès innemis
Vont-is m'tini a gagne ?
4 Riloukîz-m' ! Rèspondez-m' !
Jahvé, nosse Diu.
5. Esprindez m'loukeûre
qui dji n'm'èdwème èl mwért.
Qui mès innemis ni polesse dîre :
« nos l'avans batou ! »
Lès cis qu'mi tourmètèt vont s'rafiyî
di m'vèy trèbouhî.
6. Mins mi, dji m'abann'nêye
èl doûceûr di voste amoûr ;
èt m'coûr ridohe di djôye,
ca vos l'an'mètez ès vosse salut.
Dji tchante po Jahvé
qui m'a r'pahou d'sès binfêts.
Psaume 13 (12) Disqu'a qwand ?
1. A mêsse dè keûr. On tchant d'a Dåvid.
2. Dihez-mèl Signeûr, disqu'a qwand ?
Avez-v' co îdèye dè m' roûvî lontins ?
Kibin d'tins fåt-i co rawåde
po vèyî vosse vizèdje?
3. Disqu'a qwand mi-åme va-t-èle continouwer
a doter d'voste amoûr ?
Disqu'a qwand mi coûr vik'rè-t-i èl sogne
di v's aveûr pièrdou?
Disqu'a qwand mi-innemi
porè-t-i s'foute di mi?
4. Djans, r'loukîz-m' Signeûr !
Vos qu'èst m'Diu, rèspondez-m' !
5. Fez r'lûre mès oûys
sins qwè dj'toumreûs co bin ès somèy dèl mwért.
Fez qu'mi-innemi ni våye nin tot d'hant tot avå :
« Dji so l'pus fwért ! Dji l'a batou ! »
Ca lu qu'èst conte di mi potch'tèye di djôye
chake côp qu'dji måke dè toumer!
6. Dji m'a-st-abann'né
èl doûceûr di voste amoûr.
Mi coûr è-st-al fièsse
ca il èst lîbe gråce a voste amoûr.
Dji tchante po m'Signeûr
qui m'a rafûlé d'sès binfêts.
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 14 (Vulgate 13) -Deux versions- Li djusse porsûvou !
1. A mêsse dè keûr, di Dåvid.
Li reû-sot s'a dit a lu-minme :
« i n'a pont d'Jahvé ! »
Is s'sont turtos rabahî,
disbåtchî ès leûs måssèyès manîres:
Nouk di zèls ni fêt bin.
2. Al copète dès cîrs,
Jahvé monte al bådècîne;
I s'clintche po loukî lès omes,
po vèyî après-st-on sûti,
onk qui qwîrt co Jahvé !
3. Turtos s'sont distoûrnés,
l'ont r'noyî !
Essonne is s'sont disbåtchî !
Nouk ni fêt l'bin,
ni minme onk.
4. Nèl sårît-ti don nin :
Tos cès-là qui n'fêt qu'li må,
zèls lès lof'teûx di m'peûpe,
qui lof'tèt lès grins d'a Jahvé,
po lès'qués is n'ont måy fêt l'awous' !
5. Loukîz bin k'mint
qu'is rassonlèt tos èssonne ;
Mins Jahvé s'a mètou
dè costé dès djusses.
6. Is tûzèt mète ' ine ahote
a l'assimblêye dès pôvès djins,
adon qu'cès-chal sont-st-a houte
ès Jahvé lu-minme !
7. Di Sion, quî va d'ner
li dèlîvrance a Israël ?
C'èst Jahvé qu'va candjî,
fé toûrner l'sôrt di s'peûpe.
Adon Djåcob frè fièsse,
èt Israël vik'rèt-st-èl djôye.
Psaume 14 (Vulgate 13) L'ome qui n'vout noû Diu !
1. A Messe dè keûr. D'a Dåvid.
Tot s'djåzant-st-a lu-minme
li d'mèy doûs s'a dit:
“I n'pout nin aveûr di bon Diu!”
La-d'ssus is s'sont turtos rabahîs
divins totès sôrs si lêtès manîres,
dim'nant dès fèyes co pé qu'dès bièsses !
Nèni, nouk di zèls ni fêt l'bin !
2. D'al copète dès cîrs
nosse Diu s'clintche li pus possibe :
i voreût-st-ariver a loukî come i fåt
tos lès omes qui dmonèt so s'tére,
èt çoula po-z-èsse tot-a fêt sûr
qu'on sûti qwîre co après lu !
3. Mins nouk ni vout s'lèyî dîre,
èssonne is sont-st-al disbåtche !
Enn'a nouk po fé l'bin,
nèni, nin onk vis di-dj' !
4. Nèl savèt-is nin ?
Zèls qui fêt tofér li må,
qui t'nèt m'peûpe dizos leûs pîds ;
come dès boufeûs
is dorèt so l'amagnî d'å Signeûr
po lisqué is n'ont måy fêt l'awous' !
5. C'èst poqwè is vont haper ‘ne bèle sogne,
ca nosse Diu tint po lès djusses !
6. Vos avîz tûzé
qu'i n'voléve nin lès ponnes
di sûre li consèy d'on pôve...
mins v's avîz roûvî
qui c'è-st-ès Signeûr lu-minme
qui l'minåbe s'a mètou a houte...
7. Di Sion,
quî donrè l'dèlîvrance a Israël ?
C'èst l'Signeûr
qui va rinde li pwissance a s'peûpe.
Adon Djåcob frè fièsse
èt Israël vik'rè-st-èl djôye.
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 15 (Vulgate 14) -Deux versions- Quî va èsse tchûzî ?
1. Tchant d'a Dåvid.
Jahvé :
Quî alez-v' prinde ad'lé vos ès vosse tinte ?
Quî porè d'moni so vosse sinte hôteur?
2. Ci la:
qu'a todi sûvou l'dreûte vôye,
qui fêt s'possibe po èsse djusse,
qu'èst vrêye disqu'å pus parfond di s'coûr.
3. Si linwe ni k'djåze måy lès djins,
i n'djowe nin d'måva toûr a s'camaråde
èt i n'tchèdje nin d'mizères si vwèzin.
4. Li rèsprové...!
i nèl louke vormint nin,
mins l'ci qu'a sogne d'a Jahvé,
ci la, i lî fêt oneûr.
Il a promètou di tofér s'kidure d'adram,
Cosse qui cosse i tinrè s'parole.
5. I n'vou nin gangnî ‘ne seûle pèce
so lès bilèts qui prustêye,
èt i n'rèclamêye nole gadje
å ci qui moûrt-di-fin.
6. Quî fêt-st-insi n'brontch'rè måy
disqu'al fin dès sièkes.
Psaume 15 (Vulgate 14) Quî sèrè tchûzi ?
1. Tchant d'a Dåvid.
Signeûr,
Quî alez-v' prinde ad'lé vos
ès vosse tinte ?
Quî porè d'moni avou vos
So vosse sinte hôteur?
2. C'est l'ci:
qu'a todis suvoû l'dreûte vôye,
qui fêt s'possibe po-z-èsse djusse,
qu'èst vrêye disqu'ès fond di s'coûr.
3. Si linwe ni k'djåze måy lès djins,
i n'djowe nin d'måva toûr a s'camaråde,
èt i n'qwîre nin mizére a sès vwèzins.
4. I veût clér ès lu-minme
èt n'a wåde dè fé l'fîr,
i glorifiyèye tos lès-cis
qui fruzihèt-st-ès Signeûr,
il a promètou dè todis fé l'bin
èt i n'rimagn'rè nin s'parole.
5. I n'vout nin gangnî on franc
so lès pèces qui prustêye,
i n'rèclame måy noû gadje
å ci qui moûrt-di-fin.
6. Quî fêt-st-insi n'pout må dè toumer
po tos lès sièkes a m'ni !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 16 (Vulgate 15) C'èst l'Signeûr mi pårt d'èritèdje !
1. D'a Dåvid.
Wårdez-m' Signeûr,
c'è-st-ès vos qu'dj'a mètou m'fwè !
2. Dj'a dit å Signeûr,
« C'èst vos qu'èst m'Diu,
c'èst vos qu'èst m'bin,
ènn'a nouk di pus hôt qu'vos ! »
3. Qwant åx tchins qui ravadjèt tote li tére,
a tos cès rins qui assètchèt tofér mi d'zîr,
4. vochal çou qu'èlzî fåt fé :
fez ‘lzî racrèhe tos leûs mås,
adon arindjîz lès
po qu'is n'sèyèsse pus qwite di leûs langueûrs !
Qwant a mi :
Dji n'irè måy pus rispåde avou mès mins
li song' di çou qu'on towe ès leû oneûr!
Jamåy, å grand jamåy,
Dji n'pwèt'rè leûs noms à mès lèpes,
Ca çoula fêt aspiter l'måleûr !
5. Signeûr,
c'èst vos qu'èstez m'coupe, mi pårt d'èritèdje,
c'èst vos qui t'nez m'sôrt divins vos mins.
6. Por mi, li cwèrdè a marké on tèrin
qui fêt totes mès dèlices,
awè, d'ja r'çu m'pårt d'èritèdje
èt çoula m'a mètou dèl djôye ès coûr !
7. Dji bènih nosse Diu
qu'èst tofér ad'lé mi po m'consî ,
awè, tot-oute dèl nut' il èst minme la
po-z-ac'sègnî m'coûr !
8. Sins r'låke
dji m'tinrè èl prèzince dè Signeûr,
s'i vout d'moni a m'dreûte
dji n'porè må dè toumer !
9. Vola poqwè m'coûr si rafèye tot,
qui mi-åme è-st-al fièsse,
qui m'cwér lu-minme
rispwèse bin påhûlemint !
10. Jamåy vos n'avez rat'nou po mi-åme
ine plèce ès fond d'l'infér ;
vos rassètchîz minme vos fruzihants
po qu'is n'vèyèsse nin ès fond d'l'abîme.
11. Vos m'fré goster al påye qu'on troûve
tot sûvant lès pazês qui d'nèt l'vicårèye,
dji sèrè r'pahou dèl djôye
d'èsse divant vosse vizèdje,
dji sèrè tot foû d'mi
d'èsse a vosse dreûte po todis !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 17 (Vulgate 16) -Deux versions-
Li djusse si fêt prèssant ad'lé s'Diu !
1 Priyîre d'a Dåvid.
Signeûr, volez-v' bin hoûter
mès apèls al djustice!
Mi priyîre si fêt prèssante,
acontez-l', dji v's è prèye !
Toûrnez vite voste orêye di m'costé,
hoûtez-m', mès lèpes ni v'f'ront nole frawe !
2. Quî m'bon dreût r'lûse po d'vant vos,
vos oûys savèt tofér riknohe li dreûteûr !
3. Vos polez graw'ter tot avå m'cwér,
vos polez m'kissinti l'coûr,
dèl nut' vos polez m'kiheûre,
vos polez minme vini po m'broûler :
ci n'è-nin-st-ès m'cwér qui v'vinrez trover
li pus p'tit bokèt d'rècène d'îdolatrèye !
4. Dji n'a måy drovièrt li boke
po k'djåzer vosse façon dè fé !
Vos avîz-st-a ponne rimouwé lès lèpes
qu'å pus abèye dji féve vos d'zîrs !
5. Mès dj'vèyes tinèt co bin l'côp
tot sûvant lès vôyes totes a bosses èt a fosses ;
mès pîds n'ont måy qwèrou a cori a l'avîr
foû dè pazê qui v'm'avîz mostré !
6. Signeûr, volez-v'bin m'rèsponde,
c'èst co ‘ne fèye mi qui v'houke !
Droviez bin grand vos orèyes,
djan, hoûtez don m'mèssèdje !
7. Fez toumer al rivièsse
tot qui v's abwèrdèye di sès insules !
Enn'a portant dès-ôtes
qui vodrît s'mète a houte ad'lé vos :
di vosse dreûte qui såve
tchoukîz-lzès a pårt dès cis qui v's afrontèt.
8. Loukîz sor mi come si dj'èsteûs voste oûy,
catchîz-m' ad'lé vos ès l'ombe di vos êles,
9. ca lès vårins m'ènnè volèt-st-a mwért,
come dès arèdjîs is m'kihèy'rît so plèce !
10. Leû coûr sèfoke èl cråhe
èt is fêt d'leûs-êrs po djåzer!
11. Is sont la tot-åtou a chaskeun' di nos pas,
nos t'nant tofér a l'oûy po nos taper al tére ;
12. Is sont co pé qu'on liyon
qui s'rafèye d'on carnadje,
ou qu'li p'tit dè liyon
a l'awête ès s'catchète !
13. Drèssîz-v' Signeûr,
afrontez-lès f'face !
Mostrez-v'
èt vos lès frez ployîz !
Riprindez m'vèye foû d'leûs mins,
c'est tos dè vårins qui v'qwèrèt tofér mizére !
Signeûr, massacrez lès vos-minme,
fez lès disparèt djus dèl tére dè vikants,
mètant-st-insi ‘ne fin al djouwihance
qui turtos vaît d'vos binfêts !
14. Ca Signeûr,
vos ‘lzî rimplihîz l'vinte di vos trèzors,
å pont qu'leûs èfants s'ènn'ont r ‘pahou
èt qu'lès fis d'cès-chal ont-st-avu
tot çou qui d'monéve co !
15. Por mi,
dji sé qu'å djoû d'vosse vindjince
dji porè contimpler vosse vizèdje,
a ciste eûre
wice qui l'solo d'vosse loumîre si livrè
dji porè èsse ripahou di v'veûy tot-a mi-åhe !
Psaume 17 (Vulgate 16) Li k'tchèssî qwîre ‘ne a houte ès Jahvé.
1 Priyîre d'a Dåvid.
Jahvé:
volez-v' bin hoûter m'disfinse,
èt prinde atincion a mès apèls ;
Clintchîz voste orèye vè m' priyîre :
Distrûhez tote måle linwe !
2. Quî m'bon dreût r'lûse po d'vant vos,
qui vos oûys contimplèsse mi djustice !
3. Mi coûr, vos polez l'kissinti ;
dèl nut' vos polez mi strouki ;
å feu vos polez m'broûler ;
ès mi, nole rècène d'îdolatrèye !
4. Jamåy dji n'a drovièrt li boke
po k'djåzer vosse manîre dè fé !
5. Å mwinde pitit mouv'mint d'vos lèpes
mi, dj'a todi hoûté èt sûvou vosse dèzir.
6. Mètant mès pas d'vins lès traces dès vosses,
po èsse sûr dèl vôye
ossi deûre mi sonnéve-t-èle !
Comptant so vosse êde,
po n'nin m'trèbouhî
ni m'piète avå lès cwårs !
7. C'èst mi, qui brê on côp après vos ;
Jahvé, tindez voste orèye vèr mi,
volez-v' bin hoûtez m'mèssèdje !
Fez toumer djus lès cis
qui v's abwèrdèt d'leûs måles rêzons,
èt tot quî ad'lé vos
qwîrt a s'mète a houte,
di vosse dreûte sètchîz-l' a pårt
èri dès cis qui s'drèssèt conte di vos.
.
8. Wårdez-m' come li poupå d'voste oûy !
Catchîz-m' ès l'ombe di vos êles !
9. Ca mès innemis m'ènnè volèt a mwért,
come dès arèdjîs is m'kihèy'rît so plèce !
10. Es leû cråhe is rèssèrèt leû coûr,
qwant is djåzèt is fêt d'leûs-êrs !
11. Dju n'pou pus hope !
Is sont la tot-åtou d'mi,
sins r'låke is m'tinèt a l'oûy
po sayî di m'rivièrser dè costé dès pièrdous.
12. Come on liyon qui s'rafèye di k'hatchî,
ou on p'tit dè liyon awêtant di s'catchète !
13. Drèssîz-v' Jahvé,
èt t'nez tièsse a s'måle rogne !
Fez-l'ployî !
Såvez m'vèye dès mins dè rèsprové
qu'è-st-è guére conte di vos!
Kihatchîz lès d'vosse min, Jahvé,
Fèz lès disparète d'å mitan dès vikants !
14. Di vos trèzors rimplihez leûs vintes,
qui leûs fis ènnè sèyèsse ripahou,
po insi lèyî çou qui d'meûre a leûs èfants !
15. Qwand a mi,
å djoû d'vosse vindjince
dji n'arè nin assez d'mès deûs oûys
po loukî vosse vizèdje.
A l' eûre di m'dispièrter, dji porè m'noûri
Di l'èclatante mèrvèye di voste imådje.
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 18 (Vulgate 17) Avou l'fwèce d'å Signeûr
Li rwè a-st-avu l'victwère !
1. A mêsse dè tchant; dè chèrviteû d'å Signeûr, Dåvid, qui tchantéve po l'Signeûr lès paroles di ç'tchant chal, li djoû qui l'Signeûr l'a sètchî foû dès grawes di sès innemis, èt foû dès mins d'a Saül.
Adon c'djoû la i d'héve:
2. Dji v's inme Signeûr,
èt c'èst vos qu'èst m'fwèce !
3. Li Signeûr èst m'rotche, mi c'tadèle,
il èst l'ci qui såve, il èst m'Diu !
Il è-st-ossi l'tére bin d'aplon
so lisquéne dji m'rèfûdjiyèye,
il èst m'prôtècsion, mi fôrterèsse,
il èst l'pwissance qui m' såve !
4. Quî l'Signeûr seûye louwé, a-dj'brê,
ca dji so såvé di tos mès innemis.
5. Dès loyens d'mwért m'èlahît,
li fwèce dè må aroufléve sor mi,
6. les filèts d'l'infér m'èwalpît,
lès cèps dèl mwért sayît d'm'aveûr !
7. Dj'èsteûs tél'mint strindou
qui d'ja priyî l'Signeûr,
dj'a supliyî nosse Diu
èt i m'a-st-ètindou di s'mohone,
mi èclameûre a monté disqu'a Lu,
èle lî a rimpli sès orèyes !
8. Li tére vibrèye, èle tronne tote !
Lès fondemints dès hôteûrs sont k'hoyous,
lès hôteûrs si mètèt-st-a hossî
ca l'colére d'a nosse Diu s'èvlame !
9. Dèl foumîre lî vint po lès trôs di s'narène,
si boke tape feûs-èt-flames,
si cwér n'èst qu'on fouyå broûlant èt ronflant !
10. I clintche lès cîrs
èt i d'hind!
Il a mètou ‘ne nûlèye dizos sès pîds,
11. èt come tchår i s'chèv' d'ine andje ;
adon i s'èvole avou
tot s'lèyant pwèrter so lès éles dès vints.
12. I s'èwalpèye dèl neûristé
come si moussîve ès s'tinte
åtou d'lu ci n'èst qu'êwe trûbe
èt spèssès nûlèyes.
13. D'zos l'aveûglante loûmîre
qui tchèrèye po d'vant lu,
d'on plin côp lès nûlèyes ont hiyî
tot d'vièrsant so tos mès innemis
dès gruzês come des oûs d'colon
èt dès rotchès cindes a hopês !
14. La-hôt d'vins lès cîrs,
li Signeûr disloye on såvadje orèdje :
nosse Diu fêt rèsdondî s'vwè,
adon grûzès èt rotchès cindes ritoumèt d'pus bèle !
15. I hine sès flèches après zèls,
ènnè sont tot mèsbrudjîs ;
i fêt spritchî sès côps d'aloumîre,
adon s'ènnè pôr fêt d'tos-zèls !
16. Es s'colére, nosse Diu nos man'cèye turtos ;
li sofla di s'fureûr èst tél'mint fwért,
qui mète a djoû lès abîmes dèl mér,
qui lès fondemints dèl tére si vèyèt !
17. D'al copète dès cîrs il a stitchî s'brès,
èt tot m'apiçant po l'pé dès rins
i m'a sètchî foû dès grantès êwes,
18 i m'a råyî dès mins di m'fèroce innemi,
i m'a såvé d'tos lès-cis qui m'ènnè volît
èt qu'èstît bêcôp pus fwért qui mi.
19. C'èst l'djoû qu'dj'a stu rwèné
qui turtos m'ont qwèrou mizére :
mins nouk di zèls n'aveût tûzé
qui l'Signeûr mi prustêy'reût s'dreute !
20. Nosse Diu m'a fêt ‘nn'aler,
i m'a fêt prinde li lådje,
i m'a såvé,
èt çoula pace qu'i m'inme!
21. C'èst sûvant l'djustice qui dj'pratiquèye
qui l'Signeûr rèspond a mès priyîres,
i m'rind,
sorlon l'peûreté d'mès mins,
22. ca dji sû lès vôyes d'å Signeûr
èt dji m'wåde bin d'ènnè fé dès lêdes.
24. Awè, dj'a tofér si lwè d'zos lès oûys,
dji n'a måy tchèrî foû di s'vôye !
25 Nosse Diu rèscompinse tot qui fêt l'bin,
mins i deût veûy qu'on-z-a lès mins bin nètes.
26. Avou l'ci qui fruzih d'amoûr por vos :
vos èstez l'amoûr !
A l'ome qu'èst franc :
vos ofrez vosse frankîse !
27. Avou l'ome qu'èst todis peûr :
totes vos îdèyes sont peûres !
Mins avou l'toûrciveûs :
vos savez èsse pus ruzé qu'lu !
28. Awè, c'èst vos qui såvez lès pôvès djins,
mins vos savez bin fé bahî lès fîrès oûys !
29. C'èst vos qu'illuminèye mi kinkèt,
gråce a Signeûr mi neûristé r'lût d'cint mèyes feûx.
30 Ca ès vos dji coûrs disconte lès årmêyes,
ès vos, dji potche oute des murayes !
31. Nosse Diu :
c'èst s'vôye qu'èst l'mèyeûse,
li parole d'å Signeûr a stu èsprovèye,
il èst prôtècsion po l'ci qu'acoûrt ad'lé lu !
32. Quî don èst Diu sinon l'Signeûr ?
Quî è-st-in rotche sinon nosse Diu ?
33. C'èst lu qu'm'a-st-èwalpé di s'fwèce,
lu qui droûve mi vôye vè l'pèrfècsion.
34. I rind mès pîds adrèt' come lès-cis dès bihes,
i m'fèt t'ni tot dreût so lès hôteûrs.
35. Il éduquêye mès mins a fé l'guére,
avou lu dji sé m'chèrvi d'in' arc di feûve.
36. Vos m'prustez vosse prôtècsion, vosse fwèce qui såve,
èt c'èst vosse dreûte qui m'soutint !
Vos v'rabahîz po-z-esse a m'lève,
èt po lès-ôtes çoula m'èlîve !
37. D'zor mi, c'èst vos qu'a ragrandi mès pas
ès mès dj'vèyes n'ènn'ont nin påti.
38. Dji porsû mès innemis,
dji lès rac'sû èt dj'broke sor zèls ;
dji rivins
qu'is n'sèyèsse turtos marcåcés :
39. ca dji lès spèye èt is n'polèt s'rilèver,
is sont la stindou d'zos mès pîds.
40. C'èst vos qui m'a d'né l'fwèce po fé l'guére,
vos fez ployî d'zor mi tos mès innemis,
41 vos mètez leû hanète a m'pwèrtêye,
dji språtche tos lès-cis qui n'savèt m'sinti.
42. Et is polèt bin brêre...
ènn'a nouk po m'ni lès såver,
èt s'is brêyèt-st-après l'Signeûr,
ci-chal fêt l'soûrdô !
43. Dji lès brôye come li poûssîre qui l'vint èpwète,
dji lès raheûve come dès crasses so l'pavêye.
44. Vos m'disgadjîz d'totes lès sôrs di tûzèdjes
qui s'afrontèt avå lès peûpes,
vos m'fez Prince po totes lès nåcions :
on peûpe qui dji n'kinoh nin vint m'chèrvi ;
45 Dês qu'is ètindèt m'vwès, is m'hoûtèt,
cès fis d'ètrindjîrs mi frotèt l'mantche !
46. Lès fis d'èstrindjîrs si fènèt tot èvôye ;
sont-is foû d'leû fôrteresse
qu'is tronlèt lès balzins !
47. Qui nosse Signeûr vike po tofér !
Bèni seûye nosse rotche !
Qui tote li glwère seûye rindowe
Å Diu qui nos såve !
48. C'èst l'Diu qui m'done lès vindjinces,
qui mète lès peûpes dizos mès pîds !
49. Tot m'såvant d'mès innemis,
qu'ènnè sont tos d'montés,
vos m'èlèvez al copète di tos cès vårins,
vos m'rissètchîz foû d'cès rudès omes.
50. Insi dji v'louwandjêye avå totes lès nåcions,
Signeûr, dji tchante vosse nom !
51. A si rwè, c'èst-avu lårdjèsse,
qu'i prodiguêye dès bènèdicsions,
il èst plin d'atincion po l'ci qui vint d'ond',
po Dåvid, po s'lignèdje èt çoula po tofér !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 19 (Vulgate 18) Nosse Diu è-st-on solo d'djustice !
1. A mêsse dè tchant, tchant d'a Dåvid.
2. Lès cîrs tchantèt l'glwère dè Signeûr,
li steûli mosteûre tot çou qu'a fêt lu-minme.
3. Lès djoûs, onk a l'ôte, s'ènnè contèt l'mèrvèye,
li nut', qwant-a-lèye, èl fêt k'nohe al sûvante.
4. Mins qwand is djåzèt-st-èssonne,
nos orèyes ni sårît-st-apici leû languèdje,
pace qu'is n'si chèrvèt d'nou mot,
is n'dihèt nole parole !
5. Portant c'èst foû dè monde ètîr
qui leûs sègnes sipitèt,
èt d'zos nos oûys leû mèssèdjes èst la
d'on bout dèl tére a l'ôte !
C'è-st-å mitan d'zèls, la d'zeûr,
Qui nosse Diu a drèssé ‘ne tinte po l'solo,
6. èt lu, come on marié
qwite si mohone po nn'aler a l'ovrèdje,
come on coreû
s'rafèye dè sayî ‘ne novèle vôye,
7. il aspite d'on plin côp di l'ôriyant dès cîrs,
si coûsse ènn'èwalpêye totes lès cwènes,
rin n's åreût èchaper a s'tcholeûr!
8. Li lwè d'å Signeûr n'a nou dèfôt,
èle done dèl fwèce po viker.
On pout s'fiyî å tèmwègnèdje d'å bon Diu
Ca lès d'mèy doûs ènnè r'div'nèt sîti !
9. Lès régues d'å Signeûr sont dreûtes
èles fêt crèhe li djôye ès coûr.
L'ôrde d'å Signeûr èst clér,
il illuminêye lès oûys.
10. Li parole d'å Signeûr èst peûre,
èle dimon'rè po tofer ;
lès djudj'mints d'å Signeûr sont vrêyes
èt is sont turtos djusses,
11. is valèt bêcôp pus qui d'l'ôr,
qu'on hopê d'pèces d'ôr ;
is sont pus doûs qui l'låme,
qui l'djus d'on tortê d'låme !
12. Vosse chèrviteû lu ossi,
a cåse di zèls veût bêcôp plus clér.
Po l'ci qu'vout lès wårder,
çou qu'lî advêrèt-st-après èst sins mèzeûre !
13. Lès fås pas!
qui s'ènn'apinsèye ?
Vos qu'èst nosse Diu
rik'nohez-m' inoçant di tot çou qu'èst catchî !
14. Wårdez-m' dès håtinnès idèyes,
qu'èles ni m'vwèlèsse nin vosse loumîre,
adon dji porè sûre vosse vôye li mî possibe,
racléri d'on bè chwès d'pètchîs !
15. Quî totes mès paroles vis plêhèsse tofér,
quî vou m'tini èl priyîre po d'vant vos,
vos nosse rotche, vos qui nos såve !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 20 (Vulgate 19) Priyîre po li rwè.
1. A mêsse dè tchant. On tchant d'a Dåvid.
2. Qui l'Signeûr aconte bin vosse dimande
li djoû wice qui v'sèrez må pris !
Qui rin qu'd'oyî d'biter l'nom dè Diu d'a Djåcob
Vos sèyîze plus d'feû po s'chèrvice !
3. Qui di s'sinte mohone
li Signeûr vis èvôye si sécoûrs,
qui dispôye Sion
i v'done si fwèce !
4. Qui l'Signeûr ni roûvèye nin lès ofrandes
qui v'lî avez-st-apwèrté ;
qu'i boute li feû d'vins lès bièsses qui v's ofrez
po lès distrûre disqu'å djèrin bokèt !
5. Qu'i v'done sorlon vosse coûr
èt qu'i rimplih tote vos idèyes !
6. I fåt qu'nos brêyanse nosse djôye
ca l'Signeûr è-st-avou nos-ôtes !
Nos lîvr'rans l'banîre
ès l'oneûr dè nom d'a nosse Diu !
Qui l'Signeûr aconte å mî
Totes vos priyîres !
7. Asteûre dji sé
qui l'Signeûr a såve s'mèssîye,
dè steûli di s'sint'té
nosse Diu tint avou lu,
il a mètou a s'chèrvice
li fwèce di d'lîvrance di s'dreûte !
8. Enn'a qui s'aspoyèt so l'fwèce di leûs chars,
dès-ôtes si fiyèt al fwèce di leûs dj'vås,
mins po nos-ôtes c'èst tot ôte tchwè
ca nos houkans l'Signeûr nosse Diu !
9. Zèls ont bin d'vou ployî,
is ont toumé ståré al tére ;
nos-ôtes nos nos lèvans,
nos èstans todis là !
10. Li rwè èst po nos-ôtes
li djoû qui nos l'houkans !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 21 (Vulgate 20) Té Dèyom po li rwè.
1. A mêsse dè tchant. On tchant d'a D åvid.
2. Li rwè èst tot binåhe, Signeûr,
dispôye qu'il èst fwèrt di vosse fwèce !
Come vosse sécoûrs lî a d'né l'victwère
adon il è-st-èl fièsse !
3. Vos avez r'pahou li d'zîr di s'coûr,
vos n'avez nin r'tchoûkî l'sohêt
qu'aveût m'nou sè sès lèpes.
4. Awè, v's avez stu å d'vant d'lu
avou dès bènèdicsions d'boneûr,
èt so s'tièsse
vos lî avez mètou 'ne corone d'ôr.
5. I v'dimandéve li vicårèye,
èt vos lî avez d'né,
èt po s'rawète vos î avez co djondou
dès longs djoûs po tofér èt a jamåy.
6. Gråce a vos qu'l'avez êdî po gangnî
si glwère èst k'nohowe tot avå;
vos rassonlez sor lu
li grandeûr èt l'glwère.
7. Awè, d'ine faveûr tote spèciåle
vos l'ètåblihez è bènèdicsion po tofér,
vos l'illuminez d'djôye
tot lî mostrant vosse vizèdje.
8. Ca c'è-st-ès Signeûr
qui li rwè a mètou s'confiyance,
èt tot d'monant èl gråce dè bon Diu
i n'såreût nin s'trèbouhî!
9. Vosse min a-st-ac'sû tos vos innemis.
Vosse dreûte a-st-ac'sû tos lès hay åves.
10. Li djoû qui n'porans loukî vosse vizèdje
vos alez lès trêtî come on trête on fouwå ;
vosse colére lès houm'rèt turtos,
èt l'feû n'ènnè lèy'rè pôr pus rin !
11. Djus dèl tére ètîre
vos fez disparèt' tos leûs frûts,
d'å mitan dès èfants dès omes
vos rabatez leû s'mince po todis,
12. ca is complotît èssonne po v'fé dè twért,
èt is tûzît vol'tî k'mint rûzé avou vos ;
mins conte di vos
is n'ont måy polou fé ‘ne saqwè !
13. Po ‘lzès fwèrcî a cori èvôye
di vosse corîhe vos ‘lzî lignîz l'vizèdje !
14. Ridrèssîz-v' è vosse pwissance, Signeûr,
vos polez ènn'èsse fîr !
Qwant a nos-ôtes nos low'rans,
Nos tchant'rans vosse fwèce !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Psaume 22 (Vulgate 21) -Deux versions- Espwér èt sofrance dè djusse.
1. A mêsse dè tchant. So l'bihe dès ères dè djoû.
On tchant d'a Dåvid.
2. Nosse Diu, Nosse Diu,
poqwè m'avez-v' abann'né,
adon qu'dji hoûle èt m'èclamèye,
qui dj'so co bin lon di m'dilîvrance ?
3. Dji brê-st-après vos tote djoû
èt vos n'mi rèspondez nin !
Signeûr, minme dèl nut'
Mi coûr ni sé èsse påhûle !
4. Vos sîdjîz, vos qu'èst l'Sint,
èt vos r'cûvez lès louwanjes d'Israël !
5. C'è-st-ès vos
qu'nos péres avît mètou leû fwè,
èt c'èst vos
qu'lès a dilîvrés !
6. Is ont brê-st-après vos
èt v'lès avez rindou lîbe.
Is s'sont-st-abann'nés ès voste amoûr
Èt jamåy is n'ont d'vou l'rigrèter !
7. Mi dji n'so qu'on viér,
dji n'so nin in'ome !
Adon lès peûpes mi tapèt foû d'zèls,
ca po l'monde dji n'so pus nouk !
8. Tos lès-cis qui mvèyèt s'mokèt d'mi,
is fêt l'mowe tot hossant l'tièsse,
9. Is s'dihèt onk a l'ôte:
“ I vout cori ad'lé l'Signeûr...
qui ci-chal li såve don... !
Quî s'Diu l'dilîvrèye
pwice qu'i l'inme ! »
10. C'èst vos qui m'a sètchî foû dè vinte di m'mame,
portant dj'î èsteûs si bin
a houte so s'sin !
11. Dês qu'dj'a stu so l'hô di m'mame
c'è-st-ès vos qu'dj'a stu tapé!
Dês qu'dj'a stu ès vinte di m'mame
c'èst vos qu'a stu m'Diu !
12. N'ènn'alez nin trop lon
ca lès transes s'aminèt,
èt nole ôte qui vos
ni pout m'ènnè fé qwite !
13. I n'a bêcôp d'torès chal åtou d'mi,
lès boûfs di Bashan vont torade m'èclawer.
14. Li liyon lof'tèye èt rudjih ;
is drovièt leû gueûye conte di mi.
15. Dji so vûdî come on r'vièrse di l'éwe,
tos mès ohès sèront vite disclapés!
Mi coûr èst parèy al cîre...
I fond tot èvôye ès mi-minme !
16. Dj'a l'gozi qu'è-st-a sètch,
mi linwe mi plake a m'palå!
Vos m'avez rindou parèy
A dès poûssîre di mwèrt !
17. Ca dès tchins sont la tot åtou ;
ine bande di vårins aroufèle sor mi,
come on liyon,
is k'hiyèt mès mins èt mès pîds,
18. dji pou fé l'compte di tos mès ohès ;
èt zèls m'awêtèt, m'riloukèt,
19. is s'pårtajèt mès mous'mints
mins m'frak èst sètchèye al loterèye.
20. Vos m'Signeûr, ni v'sètchîz nin èn-èri,
vos m'fwèce, abèye vinez m'êdî !
21. Mètez mi-åme a houte di l'èpèye,
disgadjîz m'vèye dèl grife dès tchins !
22. Såvez-m' dèl gueûye dè liyon,
mins ossi dès cwènes dès såvatjès boûfs !
Ni m'ritcoûkîz nin,
dji v's è prèye !
23. Dj'anoncèy'rè vosse nom a tos mès frés,
dji tchant'rè vosse glwère å mitan d'turtos !
24. Louwanjez-l', fruzihants d'å Signeûr !
Glorifiez-l', vos-ôtes, lignèdje d'a Djåcob !
Tronlez turtos d'vant lu,
vos qu'èstez di s'peûpe Israël !
25. Ca i n'a nin loukî d'hôt
èt i n'a nin condåné l'doleûr dè pôve,
i n'lî a måy catchî s'vizèdje
èt il ètind tofér si-apèl!
26. Å grandès assimblèyes
c'èst vos qu'èst tote mi louwanje,
dji rimplih mès veûx
åx oûys di tos vos fruzihants.
27. Lès pôves magn'ront èt sèront r'pahous,
qui l'ci qui cwîre li Signeûr
tchante ossi sès louwanjes.
Quî vosse coûr vike po tofér !
28. Totes lès cwènes dèl tére ènn'åront l'sov'nance,
di tot avå on r'vinrè ad'lé vos Signeûr,
èt tot v'vèyant d'face
tos les peûpes toum'ront-st-a gngnos !
29. Ca c'èst l'Signeûr qui ringne so turtos,
c'èst lu qui dominêye so lès peûpes !
30. Po d'vant lu
lès pwissants dèl tére font dès couroubètes
ènnè f'ront-st-ossi
cès-la qui div'nèt dèl poûssîre di mwért.
31. On lignèdje èl chèrvirè,
on f'rè k'nohe li Signeûr å siéke.
32. Is vinront èt f'ront sèpi s'djustice
å novè peûpe qu'Il a mètou å monde.
Psaume 22 (Vulgate 21) Li chèrviteû sofrant
1. A mêsse dè tchant, so l'bihe dè ères dè djoû,
tchant d'a Dåvid.
(brèyèdje tchoûkî d'å pus parfond d'l'abann'mint).
2. Jahvé ! Jahvé !
Poqwè m'av' abann'né,
Lon èrî di m'salut,
åx èclameûres di m'rudjih'mint ?
3. Jahvé !
Dji brê tot-oute dè djoû
èt vos n'rèspondez nin,
minme dèl nut',
mins por mi nou rapåftèdje !
(loukeûre tapèye so Jahvé l'Diu d'nos péres)
4. Vos portant, li sint, vos sîdjîz !
Vos, li louwanje d'Israël,
5. ès vos, nos péres s'abann'nît,
èt, v'lès avez sètchî foû di spèheûr !
6. Is ont brê vèr vos
èt is ont stu lîbes,
ès vos is s'abann'nît,
èt is n'l'ont måy rigrité!
(Tchoûl'rèyes a cåse dès mok'rèyes)
7. ès mi :
dji sos-st-on viér,
bin mons s'ine ome ;
rahis' po l's onks,
tchinis po l's ôtes.
8. Tos lès cis qui m'vèyèt
smokèt d'mi,
is fêt l'mowe
tot hossant l'tiesse.
9. “ I qwîre Jahvé,
qu'èl sètche don foû d'la !
Qu'èl råye èri d'sès mizéres
pwice qu'i l'inme... ! »
10. O vos qui m'avez r'sètchî
foû dè vinte di m'mame !
Djî èsteûs si bin,
A houte so s'sin !
11. Es vos dji fou tapé
dispôy qui d'j'sos so l'tére,
dés l'ho di m'mame
c'èst vos qu'èst m'Diu !
12. N'ènn'alez nin trop lon,
ca lès transes s'aminèt,
èt nol ôte qui vos
ni pout m'rinde påhule !
(novèlès transes å mitan dès innemis)
13. On n'såreût fé l'compte
dès torès qu'sont là, åtou d'mi,
èt v'la co pôr dès boûfs di Bashan,
dji m'va èsse sipaté inte-di-zèls !
14. Come li liyon rudjih èt k'hèye :
insi is drovièt leû geûye conte di mi !
15. Dji so dispårdou come di l'êwe,
tos mès ohès halcotèt, prèt' a toumer !
Come dèl cîre al cwène dè feû
mi coûr ènnè va tot èvôye !
16. Mi fwèsse èst flouwèye come l'årzèye,
mi linwe plake a m'palå,
vos m'avez rabatou
èn-ine poûssîre di mwert.
17. Awè, lès tchins sont chal åtou
m'rèssèrant todi pus.
Ine bande di moûdreûs a doré sor mi
tot os'tan qu'dès liyons arèdjîs,
Is ont trawé mès mins
Èt ossi mès pîds.
18. Dji pou r'ciner tès mès ohès,
is m'awêtèt, is m'riloukèt !
19. Is ont pårtajé mès mousseûres,
èt dès mèyeûse pèce
ènn'ont fêt ‘ne lot'rèye.
(Priyîre po qu'seûye èvoyî l'salut)
20. O vos Jahvé, n'ènn'alez nin,
vos m'divine fwèce !
Abèye, å sécours,
djans dispètchîz-v' !
21. Såvez m'åme di l'èpèye,
mi vèye dèl grife dès tchins ;
22. sètchîz-m' èri dèl gueûye dè liyon
èt dès cwènes dès såvadjès boûfs,
ètindez m'priyîre,
po k'mander vosse dreûte!
23. Dji f'rè sèpi vosse nom a tos mès frés,
å mitan d'turtos dji tchant'rè vosse glwère.
(Li dèlîvrance rindowe prèzinte po d'vant sès oûys)
24. Fruzihants d'a Jahvé,
louwez-l' » !
Tot l'lignèdje d'a Djåcob,
Glôrifiez-l' !
Tronlez d'vant Lu,
Lignèdje d'Israël !
25 Ca I n'a nin loukî d'hôt, ni bl åmé
lès mizéres èt doleûrs dè pôve ;
d'vant lu I n'a nin catchî s'vizèdje,
Il a bin ètindou qu'èl houkîz-v' !
(l'assimblêye bagne ès boneûr)
26 Dj'èlîve mi louwanje
qwand n's èstans tos èssonne,
dji rimplirè mès veûx
d'vant tos vos fruzihants.
27. Lès pôves èt lès p'tits magn'ront
ès is sèront r'pahous.
Is low'ront Jahvé
lès cis qu'èl riqwèrèt !
Qui vosse coûr vike a jamåy !
(Candjemint d'vèye dèl tére ètîre)
28. Qui disqu'å coron dèl tére
on n'rouvèye måy,
qui d'totes lès cwènes dèl tére
on r'vinse vè Jahvé,
totes lès famile dès peûpes
s'mètront a gngnos d'vant s'vizèdje !
29. Ca Jahvé a l'rigne
èt l'dominåcion so lès peûpes.
30. D'vant Lu tot seû, is s'mètront a gngnos
tos lès fwérts dèl tére ètîre !
Is s'ploy'ront po d'vant s'vizèdje
tos lès cis qui d'hindèt èl poûssîre !
(Li louwanje dès djènèråcions di d'min)
31. Mi åme vik'rèt por Lu,
mi lignèdje èl chèrvirè.
On f'rè k'noh li Signeûr
åx djènèråcions di d'min.
32. On f'rè sèpi totes sès accions
fêtes po nos såver,
on lès f'rè sèpi a tos lès peûpes
qui d'vèt co m'ni so l'tére.
Ca insi èst s'ovrèdje !
1-2-3-4-5-6-7-8-9-10-11-12-13-14-15-16-17-18-19-20-21-22
23à52 - 53à85 - 85à110 - 110à131 - 132à150
Retour au début
Ce texte précieux et rare est l'oeuvre de "On P'tit Monne" ("Un Petit Moine"). Ce "monne" en question, un enfant spirituel du père Hubert, est un moine trappiste de pure souche wallonne. Comme exercice spirituel, le père Hubert lui avait demandé de s'atteler à cette longue et la délicate tâche de traduire tous les psaumes en wallon à partir de quatre traductions françaises différentes. Le "P'tit Monne", sur sa lancée, a aussi traduit l'Évangile de Marc (cf. infra) et les trois lettres de Jean.
Je présente ici une version bénévolement dactylographiée et corrigée selon les dernières conventions orthographiques par monsieur Jean Hamblenne à partir des photos prises aux archives de l'abbaye de Rochefort. Merci M. Hamblenne pour ce travail long et exigeant.
*********************
*********************